Lajme

Tolaj reagon ndaj Ministrisë së Kulturës: Mjaft manipuluat – Kaluan tre javë nga shkarkimi im dhe akoma artistët e Ansamblit janë në rrugë!

Ish-drejtori i Ansamblit Shqiptar të Këngëve dhe Valleve në RMV, Shkodran Tolaj, përmes një letre publike të publikuar në rrjetin social Facebook ka pyetur Ministrinë e Kulturës së përse edhe pas 3 javëve prej shkarkimit të tij nga posti i drejtorit, statusi i pjesëtarëve të Ansamblit mbetet i pazgjidhur, pasi të njejtët ende nuk janë sistemuar me vendime në vendet e tyre të punës.

Tolaj shkruan se po manipulohet me artistët, pasi deklaratat e ministrit dhe zëvendësministrit të Kulturës nuk janë në përputhje më njëra tjetrën, madje dhe kryeministri Hristijan Mickoski e ka tërhequr ligjin për këta artistë pa dhënë asnjë spjegim.

“Po e shkruaj këtë letër të hapur për ministrin e zëvendësministrin e kulturës si shqetësim i thellë që vjen nga unë si artist por dhe si ish drejtor i atij institucioni ku realizuam shumë ëndërra, prekëm shumë suksese të paimagjinueshme dhe u ndjemë krenarë anë e kënd globit!

Sot jam këtu për ti qëndruar në ballë një padrejtësie që po u bëhet artistëve që nuk e kanë mundësinë të dalin dhe të kërkojnë fajtorin e as ta akuzojnë pushtetin aktual nga i cili pritet hapja e konkursit dhe punësimi i tyre! Jam këtu për të bërë disa pyetje esenciale pa dashur ta kujtoj odisejadën e rezistencës time tre mujore kundrejt një maqinerie të tërë të pushtetit i cili nuk kurseu asnjë formë për shantazh, kërcënim dhe puç brenda institucionit! Përkundër faktit që me datë 28 qershor e 5 korrik u anuluan të gjitha konkurset në nivel të shtetit, zhurma e paguar e disa mediave nga “protagonistë të ditur tashmë” arriti që tek një pjesë e opinionit të shkaktojë dilema afatshkurtëra lidhur me fajtorin që la në rrugë 33 artistët e ansamblit, por sot, gjërat janë shumë të qarta! Për opinionin publik po kujtoj se nga data 11 shtator kur është bërë shkarkimi im në formën më arbitrare deri më sot kanë kaluar plot 3 javë andaj kur “pengesë” nuk është më “drejtori i padëshiruar” ku qëndron problemi; çfarë po ndodhë me ansamblin shqiptar, ku është pëlqimi për konkurs, kë do fajësojnë tutje përfaqësuesit tanë në qeveri për këtë të keqe të madhe që po i bëhet kulturës kombëtare? Si është e mundur që një ministri të kulturës mos i interesojë fare problemi me punësimet dhe kërkesa ime për marrje të masave të hasë në vesh të shurdhër nga data 1korrik 2024, deri me 26 gusht kur paturpësisht deklaroi në të gjitha mediat e vendit se pëlqimi për punësime nga Ministria e financave është siguruar, pritet vetëm inspektimi në ansambël dhe shkarkimi i drejtorit! Për të qenë dhe më e thellë kjo gënjeshtër publike e ministrit Zoran Ljutkov, me 12 shtator sërish deklaroi se me shkarkimin e drejtorit, ushtruesi i detyrës menjëherë do të realizojë konkursin për ti kthyer artistët në punë! Sot jemi me datë 1 tetor, pra plot tre muaj institucioni është në gjendjen “vend- numëro” pa zgjidhje konkrete dhe asnjë hap përpara! Sot dua ti shtroj disa pyetje edhe zëvendësministrin Sedat Sulejmani i cili në vend se të pranonte bashkëpunimin me datë 25 korrik dhe të angazhoheshim bashkërisht për zgjidhje të problemit me punësime ai zgjodhi të shantazhojë: “jep dorëheqje se do kesh probleme të mëdha nga individë e media- konkursin do e zhvillojë njeriu i yni me lista partiake; ti trego a don ndonjë shërbim dhe jep dorëheqje menjëherë” Sot dua ta pyes zëvendësministrin se çfarë i duheshin deklaratat e pamenduara me 3 gusht në Alsat M kur premtonte se do ketë vendime të përhershme pune dhe 6 gusht në TV 21 kur thoshte që do ketë konkurs dhe audicion për kontrata të reja pesëvjeçare për artistët e ansamblit! Sikur mos të mjaftohej me këto deklarata kontradiktore, me 12 gusht, me plot krekosje manipuloi me ligjin e ri për kulturë që e mori të gatshëm nga qeveria e kaluar LSDM- BDI dhe tha bindshëm se do të miratohet shpejtë me çka artistët do të kenë vendime të përhershme pune! Dhe pas gjitha këtyre akrobacioneve, caktohen dy seanca në Parlament, me 13 gusht dhe 16 shtator dhe këtë ligj e tërheq përfundimisht kryeministri Kristian Mickovski me 18 shtator, duke mos dhënë askush asnjë arsye!”, shkruan Tolaj.

Tolaj shton se me këto veprime mund të ketë një skenar që ky institucion kulturor i shqiptarëve të shkatërrohet.

“Nëse skenari dhe kjo lojë ka për qëllim shkatërrimin apo shkrirjen graduale të ansamblit shqiptar, duke vepruar në formën më nënçmuese si me gjuhën, flamurin e shumë çështje të rëndësishme kombëtare, kjo nuk do kalon sepse shkarkimet e ngarkimet e drejtorëve dhe interesat e politikës tuaj ditore janë zero përballë kësaj të keqeje të cilën nuk e tolerojnë shqiptarët dhe komuniteti artistik mbarëkombëtar që ka investuar për tu krijuar e ngritur ky ansambël i krenarisë së shqiptarëve në Maqedoninë e Veriut!

Tani është koha vërtetë për veprim: ktheni artistët në punë që të jehojë kënga e vallja shqipe sikur pesë vite kur nuk ishte kjo qeveri antishqiptare! Nëse përfaqësuesit shqiptar në qeveri nuk janë në gjendje ta rregullojnë edhe këtë çështje, atëherë vërtetohet kartëcipërisht se s’kanë takat për asnjë punë të mirë andaj kanë zgjedhur heshtjen para çdo dështimi, fyerje e nënçmimi që po u bëhet shqiptarëve!”, përfundon reagimin e tij Tolaj. /tvklan.mk

Lajme

Shërbimi i detyrueshëm ushtarak kthehet në rajon, por jo në Maqedoni

Disa nga vendet e rajonit kanë njoftuar tashmë kthimin e shërbimit të detyrueshëm ushtarak. Përgatitjet në Serbi janë drejt përfundimit, ndërsa në Kroaci do të nisë nga 1 janari 2025, edhe pse ende nuk është vendosur nëse do të jetë dy apo tre muaj. Një diskutim i gjerë po zhvillohet edhe në Bullgari.

Prandaj shtrohet pyetja nëse edhe autoritetet maqedonase po mendojnë për kthimin e mandatit?

Ministria e Mbrojtjes për “Fokus” thotë se tani për tani nuk ka nevojë për shërbim të detyrueshëm ushtarak.

– Mundësia e shërbimit vullnetar ushtarak për një periudhë tre mujore është e disponueshme për të gjithë shtetasit që kanë mbushur moshën 18 vjeç, por nuk kanë mbushur moshën 26 vjeç. Ata mund të bëjnë të njëjtën gjë duke paraqitur një kërkesë personale pranë Departamentit të Mbrojtjes për rajonet e Ministrisë së Mbrojtjes. Sipas vlerësimeve të institucioneve të sigurisë, për momentin nuk është konstatuar nevoja për kthim në shërbimin ushtarak. Ushtria e Maqedonisë është një ushtri profesionale dhe sipas dokumenteve strategjike dhe planit afatgjatë për aftësitë mbrojtëse, fokusi është që Armata jonë të jetë e përgatitur dhe e pajisur maksimalisht sipas standardeve të NATO-s, thonë nga ministria e Mbrojtjes.

Kryetarja e vendit, Gordana Siljanovska Davkova, para pak kohësh tha se në ushtri duhet shkuar, por vullnetarisht.

“Po, mendoj se duhet menduar”. Mendoj se ka njerëz që duan të bëjnë vullnetarisht shërbimin ushtarak dhe pse jo ta lejojnë këtë. Mendoj se atëherë qëndrimi ndaj ushtrisë do të jetë edhe më pozitiv. Të hapet tema, të diskutohet, të dëgjohen argumentet”, tha Siljanovska Davkova.

Megjithatë, që nga viti 2006, me heqjen e shërbimit të detyrueshëm ushtarak, Ligji parashikon mundësinë e shërbimit vullnetar.

Shërbimi profesional përfundon në moshën 45 vjeçare. Por më pas me mundësi punësimi në një nga organet e administratës shtetërore ose marrjen e 20 pagave mesatare.

Një ndarje ka edhe tek publiku ekspert, i cili në periudhën e kaluar ka ndarë mendimin e tij. Sipas disave, shërbimi i detyrueshëm ushtarak është i domosdoshëm në plejadën aktuale të marrëdhënieve ndërkombëtare, dhe disa e konsiderojnë të panevojshëm, veçanërisht përsa i përket kostove të larta financiare dhe duke marrë parasysh faktin se Maqedonia e Veriut është anëtare e aleancës më të madhe ushtarake, NATO-s, nga viti 2020.

Shërbimi i detyrueshëm ushtarak do të kthehet së shpejti në Serbi, pasi pak ditë më parë presidenti i Serbisë, Aleksandar Vuçiq, nënshkroi marrëveshjen për shërbimin e rregullt ushtarak prej 75 ditësh. Sipas Vuçiqit, nevoja për një ushtri të fortë nuk ka qenë kurrë më e rëndësishme për mbrojtjen e vendit.

“Dua të besoj se të gjithë e kuptoni se sa e nevojshme është të kesh një ushtri të fortë”. “Ne do të duhet të blejmë dhe zhvillojmë armë të reja, të ndërtojmë dhe forcojmë”, tha Vuçiq.

Ai theksoi se, megjithëse Serbia nuk po planifikon një sulm ndaj asnjë vendi, shërbimi i detyrueshëm ushtarak është çelësi për forcimin e aftësive mbrojtëse.

Rekrutimi u hoq më 1 janar 2011, kur Serbia kaloi në një forcë të armatosur profesionale. Që atëherë, të rinjtë mund të shërbejnë vullnetarisht në ushtri, por tani Qeveria e Serbisë po e rishikon këtë model për të rritur kapacitetet e saj mbrojtëse.

Lajme

Gruevskit sot i skadoi dënimi me burg për Mercedesin luksoz

Ish-kryeministri i Maqedonisë së Veriut Nikolla Gruevski sot shpëtoi plotësisht nga vuajtja e dënimit me burg dy vite për blerjen e Mercedesit luksoz prej 600 mijë eurove, i njohur ndryshe si rasti “Tanku”, raporton Portalb.mk.

Më 4 tetor 2018 Gruevski u dënua ndërsa deri sot (4 tetor) kanë kaluar gjashtë vite, ku sipas Kodit Penal të RMV-së skadon vuajtja e dënimit.

Ndërkaq për të njëjtin rast, Gordana Jankulloska është dënuar me 4 vjet burgim, ndërsa Gjoko Popovski me 4.6 vjet. Ata e vuajtën dënimin.

Shqiptimi i burgut për rastin e Mercedesit ishte arsyeja e Gruevski të u arratis nga vendi më 8 nëntor 2018. Shumë shpejt atij iu dha azil nga autoritetet hungareze, miq ende aktualë të partisë së tij VMRO-DPMNE, ai ndodhet ende në Hungari.

Herën e fundit Ministria e Drejtësisë ka kërkuar ekstradimin e Gruevskit në vitin 2019, për të gjitha rastet për të cilat është lëshuar fletarrest ndërkombëtar ndaj tij.

Nga Ministria e Drejtësisë për SDK theksuan se Hungaria e ka refuzuar kërkesën për ekstradim më 05.08.2019 me arsyetimin se Nikolla Gruevskit i është dhënë azil dhe sipas ligjit të tyre personi nuk mund të dorëzohet në shtetin nga i cili ka ikur.

“Nuk kemi paraqitur kërkesë tjetër për ekstradim sepse do të ishte e pakuptimtë. Për sa kohë që një person gëzon azil, autoritetet hungareze refuzojnë ekstradimin. Situata po monitorohet me kujdes dhe kur të krijohen kushtet, sigurisht që do të paraqesim kërkesë të re, e cila është e njëjtë si për çdo rast ekstradimi”, thanë nga Ministria e Drejtësisë.

Pas ndryshimeve në Kodin Penal, u vjetërsuan lëndët TNT, për prishjen e kompleksit “Kosmos” dhe “Trajektorja”, për komisionet për ndërtimin e autostradave. Ndryshimet e shpëtuan edhe Gruevskin nga akuza për rastin “Shkupi 2014”, “Feniks”.

Gruevski mbetet i akuzuar për çështjet “Talir 1” dhe “Talir 2”, mbi të cilat varet edhe paqartësia se si do të përfundojnë, si dhe në rastin “Titanik”, ku akuzohet për shpërdorim fondesh për financimin e fushatës zgjedhore dhe cenimin e të drejtës së votës.

Lajme

Norvegji, numri i makinave elektrike tejkalon ato me benzinë

Në Norvegji, vendi evropian i pasur me naftë dhe gaz natyror, numri i automjeteve elektrike e tejkaloi atë të automjeteve me benzinë.

Sipas të dhënave të shpërndara të Këshillit norvegjez të Informacionit për Trafikun Rrugor, nga 2.8 milionë automjete pasagjerësh të regjistruara në vend 754.303 janë elektrike ndërsa 753.905 janë me benzinë.

Norvegjia është prodhuesi më i madh i naftës dhe gazit natyror në Evropë, me një prodhim ditor të naftës prej 4 milionë fuçi.

Përderisa vendi synon të jetë neutral ndaj karbonit në vitin 2030, investimet në këtë fushë pritet të mbeten në nivel të fortë në 2025, ku këtë vit janë realizuar një nivel rekord i investimeve në naftë dhe gaz natyror.

Megjithatë, interesimi ndaj makinave elektrike në Norvegji është në një nivel mjaft të lartë. Gjithashtu, parashikohet se në rrugët e Norvegjisë deri në vitin 2030 do të ketë 3.1 milionë automjete elektrike.

Norvegjia ofron lehtësime në tatime në blerjet e automjeteve elektrike.

Përderisa Norvegjia ofron lehtësime në tatime në blerjet e automjeteve elektrike, personat që posedojnë automjete elektrike në shumë lokacione mund të gjejnë mundësinë e karikimit të makinave të tyre pa pagesë.

Dhjetë nga 9 automjete në vend janë elektrike ndërsa përdorimi i automjeteve elektrike inkurajohet në çdo fushë.