Lajme

Zjarr në një ndërtesë në Çair, 30 persona kërkuan ndihmë për shkak të tymit

Një zjarr ka shpërthyer mëngjesin e sotëm në një depo poshtë një ndërtese banesore në Çair të Shkupit duke përfshirë edhe dyqane. Më shumë se 100 qiramarrës u evakuuan, ku disa banorë, një zjarrfikës dhe një punonjës policie kanë kërkuar ndihmë mjekësore mëngjesin e sotëm pasi kanë thithur tym.

Në vendngjarje ka qenë edhe komandanti i Brigadës së Zjarrfikësve në Qytetin e Shkupit, Zvonko Tomevski, i cili tha se në zjarrin në lagjen Çair të Shkupit janë djegur rreth 1000 m2.

Zvonko Tomovski, komandant i Brigadës së Zjarrfikësve në Qytetin e Shkupit.

“Diku rreth orës 02:00 kemi marrë njoftim për zjarr në një bodrum në rrugën Shkupi. Është një hapësirë më e madhe, e mbushur me gjëra të ndryshme. Po punohet aktivisht për të ndalur djegien, por po përballemi me një temperaturë të lartë, sepse është një hapësirë nëntokësore. Diku rreth 1000m2 është hapësira e djegur. Përveç një kolegu që u ankua për thithjen e tymit, nuk kemi kolegë dhe qytetarë të lënduar më rëndë që banojnë në ndërtesë. Nuk kam prova të plota, janë evakuuar diku më shumë se 60 persona me shkallë, ndërsa të tjerët janë evakuuar nëpër hyrje. Nuk mund t’ua them numrin e saktë”.

Nga Klinika e Toksikologjisë kanë konfirmuar se kanë kërkuar ndihmë 30 persona me simptomat tipike të helmimit nga tymi, ku katër që kanë pasur simptoma më të rënda dhe janë më të moshuar janë mbajtur për trajtim spitalor. Ndërsa nga Klinika e Fëmijëve kanë konfirmuar se janë sjellur 12 fëmijë ku më i vogli është 5 muajsh dhe më i madhi 11 vjeç.

E banorët e kësaj ndërtese ende me trishtim dhe me lotë në sy, treguan se si ka ndodhur kjo dhe sa e vështirë ka qenë për të dalur jashtë ndërtesës në ato moment.

Muadin Nesimi, qytetar

“Kur zbrita në katin e tretë kishte më shumë. E vendosa kështu bluzën dhe zhdrypa në katin e dytë, kur zhdrypa në katin e dytë u ngulfata më shumë dhe në moment, mu kujtua të kthehen prapa dhe kur u ktheva prapa gruaja ime tha, nuk mundemi të dalim prej këtu, nuk ka dalje. U paraqitem te fqinjët të shohim se a janë zgjuar ato dhe rastësisht thanë se duhet të vendosim lecka të lagura në fytyrë. Unë e mora djalin tim 11 vjeçar i cili më tha, babi unë nuk do të marrë frymë deri poshtë, deri sa të zbresim dhe ashtu zbritëm, dolëm. Por, në panik nuk mund të të kujtohet se çfarë të bësh. Kur veç më zbritëm poshtë gjithçka ishte ndryshe por, nuk pash askënd që qëndroi, të gjithë zbritën.”

Osman Iseni, një banor tjetër i kësaj ndërtese ato që i ka përjetuar i shpjegoi me një fjal “trishtim”, mirëpo shqetësim më i madh në ato momente ishin fëmijët e tyre.

Osman Iseni, qytetar

“Kjo ndodhi përnjëher, rast i papritur. U zgjuam nga ora 02:00 e mëngjesit dhe u habitëm, e pamë tymin nga koridori kryesor i zgjuam fëmijët dhe ia, shyqyr Zotit shpëtuam të gjithë. Nuk e di çfarë të them, me të vërtetë. Unë banoj në katin e gjashtë. Të gjitha katet ishin të vështira për të dalur, ishte një tym i zi, i paparë me të vërtetë. Ishte trishtuese, një trishtim i madh, u trishtuan fëmijët. Jo nuk ka t lënduar në familjen time, shyqyr Zotit jo.”

Në vendgjarje kishte edhe banorë të tjerë që thanë se edhe pse nuk munden të bëjnë diçka për ata, të paktën të qëndrojnë afër tyre.

Qytetar

“Kjo tragjedi sot që ndodhi këtu në lagjen Serov, është mërzi për të gjithë ne, do të thotë kemi ardhur në emër të personave me nevoja të vecanta këtë mërzi ta ndajmë bashkarisht me pronarët që i njoh i kam shok, dashamirë dhe së paku me bë lutje për ata sepse nuk po mundem me ndihmu.”

Banorët e kësaj ndërtese thanë se ndërtesa ashtu si ndërtesat e tjera nuk ka shkallë ndihmëse për evakuim mirëpo përsëri falë zjarrfikësve dhe ndihmës së shpejtë që kanë ardhur në kohë kanë shpëtuar.

Ndërkohë, Ministria e Punëve të Brendshme ka njoftuar se po ndërmerren masa për zbardhjen e rastit.

Lajme

Shërbimi i detyrueshëm ushtarak kthehet në rajon, por jo në Maqedoni

Disa nga vendet e rajonit kanë njoftuar tashmë kthimin e shërbimit të detyrueshëm ushtarak. Përgatitjet në Serbi janë drejt përfundimit, ndërsa në Kroaci do të nisë nga 1 janari 2025, edhe pse ende nuk është vendosur nëse do të jetë dy apo tre muaj. Një diskutim i gjerë po zhvillohet edhe në Bullgari.

Prandaj shtrohet pyetja nëse edhe autoritetet maqedonase po mendojnë për kthimin e mandatit?

Ministria e Mbrojtjes për “Fokus” thotë se tani për tani nuk ka nevojë për shërbim të detyrueshëm ushtarak.

– Mundësia e shërbimit vullnetar ushtarak për një periudhë tre mujore është e disponueshme për të gjithë shtetasit që kanë mbushur moshën 18 vjeç, por nuk kanë mbushur moshën 26 vjeç. Ata mund të bëjnë të njëjtën gjë duke paraqitur një kërkesë personale pranë Departamentit të Mbrojtjes për rajonet e Ministrisë së Mbrojtjes. Sipas vlerësimeve të institucioneve të sigurisë, për momentin nuk është konstatuar nevoja për kthim në shërbimin ushtarak. Ushtria e Maqedonisë është një ushtri profesionale dhe sipas dokumenteve strategjike dhe planit afatgjatë për aftësitë mbrojtëse, fokusi është që Armata jonë të jetë e përgatitur dhe e pajisur maksimalisht sipas standardeve të NATO-s, thonë nga ministria e Mbrojtjes.

Kryetarja e vendit, Gordana Siljanovska Davkova, para pak kohësh tha se në ushtri duhet shkuar, por vullnetarisht.

“Po, mendoj se duhet menduar”. Mendoj se ka njerëz që duan të bëjnë vullnetarisht shërbimin ushtarak dhe pse jo ta lejojnë këtë. Mendoj se atëherë qëndrimi ndaj ushtrisë do të jetë edhe më pozitiv. Të hapet tema, të diskutohet, të dëgjohen argumentet”, tha Siljanovska Davkova.

Megjithatë, që nga viti 2006, me heqjen e shërbimit të detyrueshëm ushtarak, Ligji parashikon mundësinë e shërbimit vullnetar.

Shërbimi profesional përfundon në moshën 45 vjeçare. Por më pas me mundësi punësimi në një nga organet e administratës shtetërore ose marrjen e 20 pagave mesatare.

Një ndarje ka edhe tek publiku ekspert, i cili në periudhën e kaluar ka ndarë mendimin e tij. Sipas disave, shërbimi i detyrueshëm ushtarak është i domosdoshëm në plejadën aktuale të marrëdhënieve ndërkombëtare, dhe disa e konsiderojnë të panevojshëm, veçanërisht përsa i përket kostove të larta financiare dhe duke marrë parasysh faktin se Maqedonia e Veriut është anëtare e aleancës më të madhe ushtarake, NATO-s, nga viti 2020.

Shërbimi i detyrueshëm ushtarak do të kthehet së shpejti në Serbi, pasi pak ditë më parë presidenti i Serbisë, Aleksandar Vuçiq, nënshkroi marrëveshjen për shërbimin e rregullt ushtarak prej 75 ditësh. Sipas Vuçiqit, nevoja për një ushtri të fortë nuk ka qenë kurrë më e rëndësishme për mbrojtjen e vendit.

“Dua të besoj se të gjithë e kuptoni se sa e nevojshme është të kesh një ushtri të fortë”. “Ne do të duhet të blejmë dhe zhvillojmë armë të reja, të ndërtojmë dhe forcojmë”, tha Vuçiq.

Ai theksoi se, megjithëse Serbia nuk po planifikon një sulm ndaj asnjë vendi, shërbimi i detyrueshëm ushtarak është çelësi për forcimin e aftësive mbrojtëse.

Rekrutimi u hoq më 1 janar 2011, kur Serbia kaloi në një forcë të armatosur profesionale. Që atëherë, të rinjtë mund të shërbejnë vullnetarisht në ushtri, por tani Qeveria e Serbisë po e rishikon këtë model për të rritur kapacitetet e saj mbrojtëse.

Lajme

Gruevskit sot i skadoi dënimi me burg për Mercedesin luksoz

Ish-kryeministri i Maqedonisë së Veriut Nikolla Gruevski sot shpëtoi plotësisht nga vuajtja e dënimit me burg dy vite për blerjen e Mercedesit luksoz prej 600 mijë eurove, i njohur ndryshe si rasti “Tanku”, raporton Portalb.mk.

Më 4 tetor 2018 Gruevski u dënua ndërsa deri sot (4 tetor) kanë kaluar gjashtë vite, ku sipas Kodit Penal të RMV-së skadon vuajtja e dënimit.

Ndërkaq për të njëjtin rast, Gordana Jankulloska është dënuar me 4 vjet burgim, ndërsa Gjoko Popovski me 4.6 vjet. Ata e vuajtën dënimin.

Shqiptimi i burgut për rastin e Mercedesit ishte arsyeja e Gruevski të u arratis nga vendi më 8 nëntor 2018. Shumë shpejt atij iu dha azil nga autoritetet hungareze, miq ende aktualë të partisë së tij VMRO-DPMNE, ai ndodhet ende në Hungari.

Herën e fundit Ministria e Drejtësisë ka kërkuar ekstradimin e Gruevskit në vitin 2019, për të gjitha rastet për të cilat është lëshuar fletarrest ndërkombëtar ndaj tij.

Nga Ministria e Drejtësisë për SDK theksuan se Hungaria e ka refuzuar kërkesën për ekstradim më 05.08.2019 me arsyetimin se Nikolla Gruevskit i është dhënë azil dhe sipas ligjit të tyre personi nuk mund të dorëzohet në shtetin nga i cili ka ikur.

“Nuk kemi paraqitur kërkesë tjetër për ekstradim sepse do të ishte e pakuptimtë. Për sa kohë që një person gëzon azil, autoritetet hungareze refuzojnë ekstradimin. Situata po monitorohet me kujdes dhe kur të krijohen kushtet, sigurisht që do të paraqesim kërkesë të re, e cila është e njëjtë si për çdo rast ekstradimi”, thanë nga Ministria e Drejtësisë.

Pas ndryshimeve në Kodin Penal, u vjetërsuan lëndët TNT, për prishjen e kompleksit “Kosmos” dhe “Trajektorja”, për komisionet për ndërtimin e autostradave. Ndryshimet e shpëtuan edhe Gruevskin nga akuza për rastin “Shkupi 2014”, “Feniks”.

Gruevski mbetet i akuzuar për çështjet “Talir 1” dhe “Talir 2”, mbi të cilat varet edhe paqartësia se si do të përfundojnë, si dhe në rastin “Titanik”, ku akuzohet për shpërdorim fondesh për financimin e fushatës zgjedhore dhe cenimin e të drejtës së votës.

Lajme

Norvegji, numri i makinave elektrike tejkalon ato me benzinë

Në Norvegji, vendi evropian i pasur me naftë dhe gaz natyror, numri i automjeteve elektrike e tejkaloi atë të automjeteve me benzinë.

Sipas të dhënave të shpërndara të Këshillit norvegjez të Informacionit për Trafikun Rrugor, nga 2.8 milionë automjete pasagjerësh të regjistruara në vend 754.303 janë elektrike ndërsa 753.905 janë me benzinë.

Norvegjia është prodhuesi më i madh i naftës dhe gazit natyror në Evropë, me një prodhim ditor të naftës prej 4 milionë fuçi.

Përderisa vendi synon të jetë neutral ndaj karbonit në vitin 2030, investimet në këtë fushë pritet të mbeten në nivel të fortë në 2025, ku këtë vit janë realizuar një nivel rekord i investimeve në naftë dhe gaz natyror.

Megjithatë, interesimi ndaj makinave elektrike në Norvegji është në një nivel mjaft të lartë. Gjithashtu, parashikohet se në rrugët e Norvegjisë deri në vitin 2030 do të ketë 3.1 milionë automjete elektrike.

Norvegjia ofron lehtësime në tatime në blerjet e automjeteve elektrike.

Përderisa Norvegjia ofron lehtësime në tatime në blerjet e automjeteve elektrike, personat që posedojnë automjete elektrike në shumë lokacione mund të gjejnë mundësinë e karikimit të makinave të tyre pa pagesë.

Dhjetë nga 9 automjete në vend janë elektrike ndërsa përdorimi i automjeteve elektrike inkurajohet në çdo fushë.