Lajme

Shqipëria hap sot negociatat me BE-në për grup-kapitullin e parë!

Takimi do të nisë në orën 08:00 dhe Shqipëria do të përfaqësohet në këtë konferencë nga Kryeministri Rama, kryenegociatorja Majlina Dhuka si dhe ministri i Punëve të Jashtme, Igli Hasani.

Në tryezë për palët shqiptare do të jenë edhe të gjithë zv.ministrat, të cilët përfaqësojnë sektorët e kapitujve të negocimit që do të hapen ditën e sotme, të njohura si “Themeloret”. Çdo shtet ka një agjendë të ndryshme të negocimit dhe Shqipëria do ta nisë këtë proces me grupkapitujt me “Reformën e administratës publike”, “Gjyqësori dhe të drejtat themelore”, “Drejtësia, liria dhe siguria”, “Kriteret ekonomike”, “Prokurimi publik”, “Statistikat”, “Kontrolli financiar” si dhe “Funksionimi i institucioneve demokratike”.

Ky grupkapitull hapet i pari dhe mbyllet në fund të procesit të integrimit. Progresi në këtë grup do të përcaktojë ritmin e përgjithshëm të negociatave. Ndërkohë, dita e nesërme shënon edhe mbajtjen e Konferencës së dytë Ndërqeveritare BE-Shqipëri. Praktika e Bashkimit Europian është e tillë që me grup-kapitullin që hapen negociatat, ato janë edhe kapitujt që mbyllet në fund të procesit të integrimit. Ecuria e përmbylljes së tyre do të varet nga ritmi i ekipit negociator shqiptar.

Kroacia, shteti i fundit që është bërë anëtar i Bashkimit Europian më 2013, hapi kapitujt e parë në 2006. Data 15 tetor e vitit hyn në historikun e marrëdhënieve të Shqipërisë me Brukselin si moment kur vendit tonë i mundësohet nisja e shqyrtimit të grup-kapitujve të parë, ato për çështjet themelore. Një rrugë e gjatë që nis me nënshkrimin në vitin 1991, kohë kur Shqipëria vendosi marrëdhëniet diplomatike me Komunitetin Evropian.

Pas 15 vitesh, në 12 qershor të vitit 2006, vendi ynë arriti të nënshkruajë marrëveshjen e Stabilizim-Asociimit me BE-në. BE është në këto tri dekada donatori më i madh financiar i Shqipërisë. U deshën tri vite që më 28 prill të vitit 2009, në Pragë, gjatë presidencës çeke, Shqipëria të aplikonte për statusin e vendit kandidat për anëtarësim në BE. Ndërkohë në muajin dhjetor të vitit 2010 u materializua edhe liberalizimi i vizave për shqiptarët në zonën Shengen. Pas pesë vitesh pritjeje, më 24 qershor 2014, Shqipëria do të merrte statusin e vendit kandidat për në BE. Anëtarësimi i Shqipërisë dhe vendeve të Ballkanit Perëndimor është ndikuar ndjeshëm edhe nga dinamikat e zhvillimeve në gjirin e vetë Bashkimit Evropian.

Vendi ynë nuk arriti për dhjetë vitet në vijim të merrte një datë për hapjen faktike të negociatave i penguar edhe nga veto e Francës dhe Holandës e deklaruar në vitin 2018 me pretendimet për rezultate të pakta në luftën ndaj krimit dhe korrupsionit në vend. Për Shqipërinë, kushtet themelore përfshinin hartimin dhe zbatimin e një reforme zgjedhore, rezultate konkrete në luftën kundër krimit dhe korrupsionit, krijimin e SPAK, Prokurorisë Antikorrupsion, Byrosë së Hetimeve, përparimin e vetingut, ndjekjen penale të prokurorëve dhe gjyqtarëve të përjashtuar nga vetingu.

Edhe pse Shqipëria nuk ka forca politike antiperëndimore, vonesat në procesin e integrimit kanë të bëjnë edhe me mungesën e konsesusit politik mes partive kryesore në vend për reformat e kërkuara nga Brukseli në vite. Sfidat e integrimit evropian edhe në vijim kanë të bëjnë me përparimin e vendit në konsolidimin e demokracisë, sundimin e ligjit dhe të ekonomisë së tregut. Shqipëria pretendon që të anëtarësohet në BE në vitin 2030. Shqipëria aplikoi për anëtarësim në Bashkimin Europian në prill të vitit 2009 dhe iu dha statusi kandidatit për në BE në qershor 2014. BE mbajti Konferencën e parë Ndërqeveritare me Shqipërinë në korrik 2022.

Lajme

Pamje të rënda: Biznesmeni amerikan vritet pas shpine, autori arratiset me biçikletë

Oficerët e policisë së qytetit të New York-ut po përdorin teknologjinë e fundit për të identifikuar nëpërmjet kamerave identitetin e personit që vrau shefin ekzekutiv të United Healthcare, Brian Thompson të mërkurën në mëngjes.

Të shtënat ndodhën jashtë hotelit Hilton në Midtown Manhattan në Times Square, ndërsa Thompson ishte planifikuar të fliste në një konferencë. Sipas policisë, i dyshuari mbante një maskë të zezë për fytyrën dhe dukej se po priste Thompson jashtë hotelit Hilton ku pritej të fliste. Brian Thompson sapo mbërriti në hotel u qëllua në shpinë e në këmbë, dhe ndërroi jetë më vonë në spital.

Vrasësi u largua nga vendi i ngjarjes pa marrë asnjë nga sendet e Thompson. Policia beson se ai kishte planifikuar paraprakisht vrasjen. Video tregon atë duke ikur në këmbë nga vendi i ngjarjes dhe u pa për herë të fundit në Central Park me një biçikletë elektrike. Policia zbuloi se i dyshuari ishte fotografuar më herët në një Starbucks para të shtënave.

Hetuesit deri më tani nuk kanë identifikuar një motiv për vrasjen. Bashkëshortja e Thompson tha se kishte pasur disa kërcënime kundër tij më herët, megjithëse ajo nuk dha detaje. Një atentat ndaj drejtuesit te kompanisë së sigurimeve kishte ndodhur edhe më parë, në qytetin e lindjes së Thompson, Maple Grove, Minnesota në vitin 2018.

Lajme

Sot është dita botërore e kafes turke

Sot është dita botërore e kafesë turke, e cila është një nga elementët e pazëvendësueshëm të trashëgimisë kulturore të kuzhinës tradicionale turke.

Kultura dhe tradita e përgatitjes dhe konsumimit të kafesë turke u përfshi në Listën Përfaqësuese të UNESCO-s të Trashëgimisë Kulturore Jomateriale të Njerëzimit në vitin 2013 dhe 5 dhjetori u shpall “Dita Botërore e Kafes Turke”.

Kafeja turke bëhet nga kokrrat e kafesë me cilësi të lartë me origjinë nga Brazili dhe Amerika Qendrore, në shumicën e rasteve të pjekura ngadalë dhe më pas të bluara shumë shumë imët.

Besohet se kjo lloj pije është ndër llojet më të konsumuara të kafesë në botë, së bashku me ekspresin.

Pija shërbehet në gota të vogla së bashku me një gotë ujë. Vetë tradita është një simbol i mikpritjes, miqësisë dhe argëtimit që përshkon të gjitha sferat e jetës. Kafja turke luan një rol të rëndësishëm edhe në raste të ndryshme si fejesa dhe të gjitha llojet e festave. Sedimenti i mbetur në filxhanin bosh përdoret shpesh për të parashikuar fatin e një personi.

Kafeja turke besohet se është futur në Stamboll nga Jemeni në vitin 1543 nga Özdemir Pasha, i cili ishte vali i Jemenit.

Në një kohë shumë të shkurtër, falë tregtarëve, udhëtarëve dhe diplomatëve që vizituan Stambollin, kafeja turke u përhap fillimisht në Evropë dhe më pas në të gjithë botën.

Sipas të dhënave të Universitetit Aydan në Stamboll, vitet e fundit ka pasur një rritje të konsiderueshme të konsumit të kafesë turke në Turqi. Ndërsa në vitin 2011 konsumi mesatar vjetor i kafesë për person në vend ishte 350 gramë, në vitin 2021 konsumi u trefishua në 1.1 kilogramë për person.

Lajme

Ka reshje të dobëta të borës në Kodër të Diellit, Strazhë dhe Mavrovë!

Borë e dobët bie në Kodrën e Diellit dhe në Strazhë dhe Mavrovë, ndërsa është ulur dukshmëria për shkak të mjegullës deri në 50 metra në Pletvar, informojnë nga Lidhja Auto Moto e Maqedonisë.

Komunikacioni në rrugët shtetërore po zhvillohet në kushte dimërore, vende-vende nëpër rrugë kryesisht të lagështa. Intensiteti i komunikacionit në akset rrugore jashtë mjediseve urbane është mesatar.

Në vendkalimet kufitare nga ana e Maqedonisë nuk ka vonesa të gjata për hyrje dhe dalje nga shteti.

Nga LAMM u rekomandojnë shoferëve shpejtësi të adaptuar të lëvizjes, respektimin e sinjaleve të vendosura të komunikacionit e veçanërisht drejtim të kujdesshëm të automjetit, posaçërisht në rrugët nëpër gryka malore dhe lugina të lumenjve ku ekziston mundësia e rrëshqitjes së dheut. Kjo vlen veçanërisht për akset rrugore Katllanovë – Veles, Mavrovë – Dibër – Strugë, Vinicë – Berovë dhe Koçan – Dellçevë.