Lajme

Nikollovski thirrje Prokurorisë Publike për rastet ndaj Merkos

Ministri i Transportit dhe Lidhjeve, Aleksandar Nikollovski, i bëri thirrje Prokurorisë Publike që të bëjë punën e saj, të procedojë të gjitha rastet që kanë të bëjnë me kryetarin aktual të komunës së Strugës, Ramiz Merko si dhe me zyrtarët e tjerë, për të cilët ai ka dërguar denoncime përkatëse në Prokurori. Për momentin ndaj Merkos janë aktive tetë lëndë. Disa prej tyre tashmë janë në gjykim në Gjykatën Themelore në Strugë.

“Deri kur do të tolerohet kryetari i komunës së Strugës? Aty me vite plazhet funksionojnë në mënyrë ilegale dhe pa marrëveshje për koncesion? Është pyetje e shkëlqyer për Prokurorinë. I bëj thirrje Prokurorisë Publike të veprojë. Deri më tani si ministër kam dërguar më shumë se 15 lëndë në Prokurorinë Publike. Shpresoj se ata kanë nevojë për kohë për t’i zgjidhur ato. Për zyrtarë të ndryshëm nga niveli më i ulët deri tek ai më i lartë. Në Strugë ka hetime aktive dhe Prokuroria Publike duhet t’i kryejë dhe shpresoj që ata që bëjnë shkelje të shkojnë në gjykatë dhe të dënohen”, tha Aleksandar Nikollovski- ministër i Transportit dhe Lidhjeve.

Më 28 nëntor Merko do të paraqitet në gjykatë lidhur me emërimin e paligjshëm të drejtorëve në shkollat fillore në fshatrat Veleshtë, Llabunishtë, Podgorcë dhe Vëllezërit “Milladinov”. Në cilësinë e dëshmitarit duhet të paraqitet ish ministri i Arsimit, Jeton Shaqiri. Ministria e Arsimit nuk e përjashton mundësinë që Merkos t’i merren kompetencat edhe për shkollat e tjera fillore, pasi atij tashmë i janë marrë kompetencat për dy shkolla fillore në fshatin Podgorcë dhe Dërsllajcë.

“Nuk ka kompetenca të hequra në shkollat e tjera. Dhe nëse do të merren, do ta dimë pasi të marrim procesverbalin nga Inspektorati. Procedurat janë ende në vazhdim”, u shpreh Ministria e Arsimit.

Ish inspektori i Arsimit Gjorgi Ilievski thotë se Merkos duhet t’i hiqen tërësisht kompetencat në arsim.

“Vlerësoj që atij duhet t’i merren kompetencat në të gjitha shkollat fillore në Strugë dhe rrethinë, sepse veprimet kundërligjore, kryerja e krimit edukativo-arsimor, që nuk është diçka e re, është prezent edhe sot. Prandaj mendoj që Ministria e Arsimit duhet t’ia heqë sa më parë të gjitha kompetencat në të gjitha shkollat fillore”, deklaroi Gjorgi Ilievski – ish inspektor i arsimit.

Ndaj Merkos në fillim të tetorit është ngritur edhe një akuzë për emërimin e paligjshëm të drejtorit në shkollën e fshatit Ladorishtë. Ndaj Merkos aktiv është edhe procesi gjyqësor, për blerjen e makinës luksoze, në kohën kur komuna kishte llogari të bllokuar. /Alsat.mk

Lajme

Pamje të rënda: Biznesmeni amerikan vritet pas shpine, autori arratiset me biçikletë

Oficerët e policisë së qytetit të New York-ut po përdorin teknologjinë e fundit për të identifikuar nëpërmjet kamerave identitetin e personit që vrau shefin ekzekutiv të United Healthcare, Brian Thompson të mërkurën në mëngjes.

Të shtënat ndodhën jashtë hotelit Hilton në Midtown Manhattan në Times Square, ndërsa Thompson ishte planifikuar të fliste në një konferencë. Sipas policisë, i dyshuari mbante një maskë të zezë për fytyrën dhe dukej se po priste Thompson jashtë hotelit Hilton ku pritej të fliste. Brian Thompson sapo mbërriti në hotel u qëllua në shpinë e në këmbë, dhe ndërroi jetë më vonë në spital.

Vrasësi u largua nga vendi i ngjarjes pa marrë asnjë nga sendet e Thompson. Policia beson se ai kishte planifikuar paraprakisht vrasjen. Video tregon atë duke ikur në këmbë nga vendi i ngjarjes dhe u pa për herë të fundit në Central Park me një biçikletë elektrike. Policia zbuloi se i dyshuari ishte fotografuar më herët në një Starbucks para të shtënave.

Hetuesit deri më tani nuk kanë identifikuar një motiv për vrasjen. Bashkëshortja e Thompson tha se kishte pasur disa kërcënime kundër tij më herët, megjithëse ajo nuk dha detaje. Një atentat ndaj drejtuesit te kompanisë së sigurimeve kishte ndodhur edhe më parë, në qytetin e lindjes së Thompson, Maple Grove, Minnesota në vitin 2018.

Lajme

Sot është dita botërore e kafes turke

Sot është dita botërore e kafesë turke, e cila është një nga elementët e pazëvendësueshëm të trashëgimisë kulturore të kuzhinës tradicionale turke.

Kultura dhe tradita e përgatitjes dhe konsumimit të kafesë turke u përfshi në Listën Përfaqësuese të UNESCO-s të Trashëgimisë Kulturore Jomateriale të Njerëzimit në vitin 2013 dhe 5 dhjetori u shpall “Dita Botërore e Kafes Turke”.

Kafeja turke bëhet nga kokrrat e kafesë me cilësi të lartë me origjinë nga Brazili dhe Amerika Qendrore, në shumicën e rasteve të pjekura ngadalë dhe më pas të bluara shumë shumë imët.

Besohet se kjo lloj pije është ndër llojet më të konsumuara të kafesë në botë, së bashku me ekspresin.

Pija shërbehet në gota të vogla së bashku me një gotë ujë. Vetë tradita është një simbol i mikpritjes, miqësisë dhe argëtimit që përshkon të gjitha sferat e jetës. Kafja turke luan një rol të rëndësishëm edhe në raste të ndryshme si fejesa dhe të gjitha llojet e festave. Sedimenti i mbetur në filxhanin bosh përdoret shpesh për të parashikuar fatin e një personi.

Kafeja turke besohet se është futur në Stamboll nga Jemeni në vitin 1543 nga Özdemir Pasha, i cili ishte vali i Jemenit.

Në një kohë shumë të shkurtër, falë tregtarëve, udhëtarëve dhe diplomatëve që vizituan Stambollin, kafeja turke u përhap fillimisht në Evropë dhe më pas në të gjithë botën.

Sipas të dhënave të Universitetit Aydan në Stamboll, vitet e fundit ka pasur një rritje të konsiderueshme të konsumit të kafesë turke në Turqi. Ndërsa në vitin 2011 konsumi mesatar vjetor i kafesë për person në vend ishte 350 gramë, në vitin 2021 konsumi u trefishua në 1.1 kilogramë për person.

Lajme

Ka reshje të dobëta të borës në Kodër të Diellit, Strazhë dhe Mavrovë!

Borë e dobët bie në Kodrën e Diellit dhe në Strazhë dhe Mavrovë, ndërsa është ulur dukshmëria për shkak të mjegullës deri në 50 metra në Pletvar, informojnë nga Lidhja Auto Moto e Maqedonisë.

Komunikacioni në rrugët shtetërore po zhvillohet në kushte dimërore, vende-vende nëpër rrugë kryesisht të lagështa. Intensiteti i komunikacionit në akset rrugore jashtë mjediseve urbane është mesatar.

Në vendkalimet kufitare nga ana e Maqedonisë nuk ka vonesa të gjata për hyrje dhe dalje nga shteti.

Nga LAMM u rekomandojnë shoferëve shpejtësi të adaptuar të lëvizjes, respektimin e sinjaleve të vendosura të komunikacionit e veçanërisht drejtim të kujdesshëm të automjetit, posaçërisht në rrugët nëpër gryka malore dhe lugina të lumenjve ku ekziston mundësia e rrëshqitjes së dheut. Kjo vlen veçanërisht për akset rrugore Katllanovë – Veles, Mavrovë – Dibër – Strugë, Vinicë – Berovë dhe Koçan – Dellçevë.