Lajme

Bashkim Ramosaj takon banorët e Maznikut dhe Dashinocit: Përkrahja juaj është forca jonë për të vazhduar më tutje

Në kuadër të takimeve të rregullta me qytetarët, kryetari Bashkim Ramosaj është takuar mbrëmjen e sotme me banorët e fshatrave Maznik dhe Dashinoc. Takimi u zhvillua në një atmosferë të ngrohtë dhe mbështetëse, ku qytetarët shprehën përkrahje të fuqishme për Liderin Ramush Haradinaj dhe për subjektin politik Aleanca për Ardhmërinë e Kosovës (AAK).

Kryetari Ramosaj falënderoi përzemërsisht qytetarët për besimin dhe përkrahjen e tyre të vazhdueshme, duke theksuar se kjo përkrahje është ajo që i motivon për të vazhduar me punë konkrete dhe projekte në shërbim të komunitetit.

“Ashtu si gjithmonë, si në ditët më të vështira, edhe sot ju dëshmuat përkrahjen tuaj të palëkundur për Liderin Haradinaj dhe për Aleancën. Faleminderit për përkrahjen dhe besimin tuaj të madh ndaj meje si kryetar dhe ndaj kandidates për Asamble, Elmedina Sadikaj”, theksoi Ramosaj në fjalën e tij.

Ai shtoi se lidhja me qytetarët është e fortë dhe e ndërtuar mbi besim, angazhim dhe rezultate konkrete, duke premtuar se kjo marrëdhënie do të vazhdojë edhe në të ardhmen.

“Jemi bashkë dhe do të mbetemi gjithmonë bashkë!”, përfundoi Ramosaj, duke përcjellë një mesazh uniteti dhe përkushtimi ndaj qytetarëve të komunës.

Kjo vizitë është pjesë e takimeve intensive të Aleancës me qytetarët, në kuadër të mobilizimit për zgjedhjet dhe për fuqizimin e komunikimit të drejtpërdrejtë me komunitetin lokal.

📌 #FLASIMmePUNË | #AAK174

Lajme

Ali Ahmeti pret sportistin e ri nga Tetova, Muhammed Dauti

Kryetari i Bashkimit Demokratik për Integrim, z. Ali Ahmeti, sot priti në takim sportistin e ri 12-vjeçar nga Tetova, Muhammed Dauti, i cili ka arritur një sukses të veçantë në paraqitjen e tij të parë në disiplinat Kickboxing & MMA.

Muhammed Dauti u shpall fitues në Garat Ballkanike të Sporteve Marciale, të zhvilluara në Tetovë, duke dëshmuar talentin, disiplinën dhe përkushtimin e tij në këtë fushë sportive.

Gjatë takimit, z. Ali Ahmeti e përgëzoi sportistin e ri për këtë rezultat të rëndësishëm dhe vlerësoi angazhimin e tij, duke theksuar rëndësinë e mbështetjes së të rinjve që me punë, vullnet dhe përkushtim arrijnë suksese dhe bëhen shembull për gjeneratat e reja.

Me këtë rast, Muhammed Dauti shprehu mirënjohjen e tij për pritjen dhe përkrahjen, duke i dedikuar z. Ali Ahmeti medaljen dhe diplomën e tij të parë si shenjë respekti dhe falënderimi për mbështetjen gjatë rrugëtimit të tij.

Ky takim ishte një moment motivimi për sportistin e ri, i cili synon të vazhdojë me përkushtim rrugën e tij sportive dhe të sjellë shumë suksese të tjera për Tetovën dhe vendin tonë.

Urime Muhammed Dautit për këtë arritje dhe suksese të mëtejshme në karrierën e tij sportive!

Ja postimi plotë:

Sot pata kënaqësinë të mirëpres sportistin e ri 12-vjeçar nga Tetova, Muhammed Dauti, i cili ka arritur një sukses të jashtëzakonshëm në paraqitjen e tij të parë në disiplinat Kickboxing & MMA, duke u shpallur fitues në Garat Ballkanike të Sporteve Marciale, të organizuara në Tetovë.

Ky sukses është dëshmi e talentit, përkushtimit dhe punës së palodhur të Muhammedit, si dhe një motivim për të gjithë të rinjtë që merren me sport.

I urova Muhammedit suksese të vazhdueshme në rrugëtimin e tij sportiv, me bindjen se ky është vetëm fillimi i një karriere të ndritur dhe i shumë arritjeve të tjera që do ta bëjnë krenare Tetovën dhe vendin tonë.

Urime për këtë sukses të merituar!

Lajme

Zeqiri: Uji në Tetovë është i pijshëm, qytetarët mund ta konsumojnë lirisht

Pas rastit me ndotjen e ujit në Gostivar, në Tetovë po bëhen çdo ditë analizat e ujit, përcjell TV21. Drejtor i NPK “Sharri”, Valon Zeqiri siguroi se në Tetovë uji është i pijshëm.

“Analizat na tregojnë se uji në Tetovë është i pijshëm dhe nuk ka asnjë problem, prandaj qytetarët mund ta konsumojnë lirisht”, tha mes tjerash Zeqiri.

Lajme

Një grua e moshuar është lënduar nga rënia e një peme në Karposh

Më 20.7.2026 në orën 20:25, SPB Shkup ka marrë njoftim se në zonën e Karposhit ka rënë një pemë dhe K.M. (86) nga Shkupi ka pësuar lëndime të rënda trupore, pas së cilës është transferuar në Institucionin Shëndetësor Publik “Shën Naumi i Ohrit” për ndihmë mjekësore.

Gjithashtu, një qytetar ka raportuar se, gjatë kërkimit të çantës së gruas së lënduar, ka gjetur një mjet shpërthyes, i cili më vonë është marrë nga vendi i ngjarjes për veprime të mëtejshme.

Prokurori publik është njoftuar dhe po merren masa për sqarim të ngjarjes./Telegrafi/