Lajme

Tre shtylla për rritjen e standardit të jetesës në Maqedoninë e Veriut

Shkruan Ardit Shaqiri

Maqedonia e Veriut meriton një ekonomi që shërben çdo qytetar, një ekonomi që rritet jo vetëm me shifra në letër, por që ndjehet si përmirësim real i jetesës në çdo familje. Rruga drejt këtij qëllimi kërkon vizion të qartë dhe veprim të vendosur mbi tre shtylla themelore dhe të ndërlidhura: politikë ekonomike e përgjegjshme, modernizim i thellë i arsimit dhe nxitje e fuqishme e prodhimit vendas.

Këto tri elemente, kur bashkëveprojnë krijojnë një sinergji që ndryshon rrjedhën: një arsim më i mirë prodhon fuqi punëtore të aftë për industri moderne; politika e përgjegjshme krijon besim dhe hapësirë për investime; dhe prodhimi vendas mban fitimin dhe punësimin brenda vendit.

1. Themeli: Politikë Ekonomike e Përgjegjshme

Një qeverisje e përgjegjshme me paratë publike është më shumë se kursim; është menaxhim strategjik për rritje afatgjatë. Ky themel ndërtohet mbi disa angazhime kyçe:

Investimet e Qëlluara: Përqendrimi i buxhetit në infrastrukturë kritike (rrugë, energjetikë, digjitalizim) që rrisin direkt konkurrueshmërinë e sektorit privat. Investimet duhet të jenë transparente dhe të shërbejnë për të mirën e përbashkët, jo interesat e veçanta.

Disiplina Fiskale dhe Besimi: Kontrollimi i kujdesshëm i deficitit dhe borxhit publik është jetik. Së bashku me këtë, është thelbësore lufta e pakompromis kundër korrupsionit dhe rritja e transparencës. Çdo denar i shpenzuar duhet të jetë i verifikueshme, vetëm kështu ndërtohet besimi i investitorëve dhe qytetarëve.

Mbështetja për Motorin e Punësimit: Bizneset e vogla dhe të mesme (NVM-të) dhe startup-et janë motori i punësimit. Ato kanë nevojë për më pak burokraci, procedura të thjeshta dhe instrumente financiare të favorshme (kredi, garancione bankare).

2. Inovacioni: Modernizimi i Arsimit

Në shekullin XXI, kapitali njerëzor është pasuria më e madhe e një kombi. Arsimi nuk mund të mbetet i ndarë nga nevojat e tregut; ai duhet të jetë një investim i vazhdueshëm.

Lidhja me Tregun e Punës: Programet mësimore duhet të përditësohen për të theksuar aftësitë digjitale, mendimin kritik, shkencat dhe aftësitë praktike (aftësitë e buta, komunikimi, puna në grup). Arsimi profesional dhe ai teknik duhet të forcohen si opsione tërheqëse dhe fitimprurëse.

Bashkëpunimi i Trefishtë: Duhet të institucionalizohet bashkëpunimi midis shkollave, universiteteve dhe komunitetit të biznesit përmes praktikave të detyrueshme dhe programeve të sipërmarrjes që përgatisin studentët për realitetin e punës.
Mësimi Gjatë Gjithë Jetës: Me ndryshimet e shpejta teknologjike, shteti duhet të ofrojë mbështetje për trajnimin e vazhdueshëm, rikualifikimin dhe zhvillimin e aftësive të punëtorëve, veçanërisht në sektorët në zhvillim ose në rënie.

3. Qëndrueshmëria: Nxitja e Prodhimit Vendas

Një vend nuk mund të ketë ekonomi të fortë nëse vetëm importon dhe konsumon. Forcimi i prodhimit vendas është thelbësor për të rritur vlerën e shtuar në vend dhe për të krijuar vende pune më të mirëpaguara.

Konkurrueshmëria dhe Inovacioni: Prodhuesit vendas kanë nevojë për lehtësime tatimore dhe instrumente financiare që mbështesin investimin në teknologji moderne, efikasitet energjetik dhe certifikim të cilësisë. Kjo është mënyra e vetme për t’u bërë konkurrues në tregjet rajonale dhe ndërkombëtare.

Simplifikimi Administrativ: Reduktimi i barrierave administrative, lejet e shpejta dhe shërbimet digjitale janë të domosdoshme. Koha e një biznesi është para.

Fuqia e Brendit “Made in Macedonia”: Duhet të mbështesim klasifikimin e bizneseve dhe të punojmë në një strategji të qartë marketingu dhe promovimi për produktet vendase, duke theksuar cilësinë, origjinën dhe qëndrueshmërinë.

Çfarë fitojnë qytetarët?

Përmes këtij trilogjie, qytetarët do të ndjejnë një rritje të punësimit me paga më të larta, do të kenë qasje në shërbime publike dhe infrastrukturë më të mira dhe, më e rëndësishmja, do të shohin më shumë mundësi për të rinjtë në shtëpi, duke ngadalësuar kështu emigrimin ekonomik dhe duke rritur qëndrueshmërinë ekonomike të vendit në kohë krizash.
Kjo nuk është një strategji për një mandat, por një plan afatgjatë për transformimin e Maqedonisë në një vend modern dhe konkurrues. Kërkesa jonë ndaj qeveritarëve dhe institucioneve nuk duhet të jetë për premtime boshe, por për hapa konkretë, të matshëm dhe të përgjegjshëm. Është detyra jonë kolektive si qytetarë, të kërkojmë transparencë, të mbështesim reformat në arsim dhe të blejmë prodhime vendase. Vetëm me veprime të përbashkëta mund të sigurojmë një të ardhme më të fortë dhe më dinjitoze.

Lajme

Burri dhe gruaja dogjën vilën duke përgaditur hajvarin

Burri dhe gruaja shkaktuan zjarr në fshatin Gorno Sonje ndërsa po bënin ajvar, pasi hirit nga soba me thëngjill e derdhën pranë shtëpisë. Policia intervenoi dhe zjarri u shua pa të lënduar.

Sipas informacioneve të MPB-së, dje rreth orës 19:50 në polici u raportua se në fshatin Gorno Sonje, pranë Shkupit, kishte filluar zjarr, ku ishte djegur një vilë dhe bari.

“Policët e SPB Shkup dolën në vendngjarje dhe biseduan me D.M. (74), pronarin e vilës, i cili shpjegoi se me bashkëshorten po bënin dimërishte dhe pranë shtëpisë kishin derdhur hirin nga soba, në të cilën ka të ngjarë të kishte thëngjill, dhe ishin larguar, pas së cilës kishte filluar zjarri», thonë nga MBP-ja.

Nuk pati të lënduar, ndërsa ekipi i Brigadës së Mbrojtjes nga Zjarri Shkup e shoi zjarrrin.

Lajme

VLEN merr dy poste të tjera të zëvendësministrave: Priten rokada në eshallonin e dytë qeveritar

Koalicioni VLEN pritet të marrë pozicionet e zëvendësministrave në dikasteret e Shëndetësisë dhe të Politikës Sociale, pas bisedimeve dhe marrëveshjes së arritur me kryeministrin Hristijan Mickoski.

Burime nga koalicioni konfirmojnë se propozimet konkrete me emrat e kandidatëve i janë dorëzuar tashmë kryeministrit për konfirmim përfundimtar, përcjell INA.

Ndryshimet në eshallonin e dytë vijnë si rrjedhojë e riorganizimit të kabinetit qeveritar në korrik, gjatë të cilit VLEN mbeti pa drejtimin e këtyre dy ministrive. Argumenti kryesor i koalicionit është ruajtja e balancit politik brenda partnerëve të pushtetit.

Për të marrë këto dy poste pa ndryshuar peshën e përgjithshme në qeveri, VLEN do të duhet të heqë dorë nga dy pozita të tjera zëvendësministrash.

Është pothuajse e sigurt se koalicioni do të lirojë postin e zëvendësministrit në Bujqësi (ku ministri është nga lëvizja ZNAM), vend i cili pritet t’i kalojë VMRO-DPMNE-së.

Po ashtu do lirohet edhe posti i zëvendësministrit të Kulturës, që pritet t’i takojë VMRO-DPMNE-së ose lëvizjes ZNAM, pasi ministri aktual i Kulturës është nga radhët e VLEN-it.

Kjo parti gjithashtu pret të marrë edhe një tjetër post zëvendësministri, përveç atyre që ka në Energjetikë dhe Transformim Digjital.
Kryeministri Mickoski ka paralajmëruar se kompletimi dhe rokadat në eshallonin e dytë qeveritar do të përmbyllen brenda gjysmës së dytë të tetorit.(INA)

Lajme

Qytetarët ofrojnë garancion për Artan Grubin!

Vazhdon seria e deklaratave publike në mbështetje të Artan Grubit. Pas reagimeve të Asllan Kokës dhe Uka Shaqirit, edhe Blero Arifi nga Velesi ka bërë të ditur se është i gatshëm të vendosë në dispozicion të gjithë pasurinë e tij si garanci për lirimin e Grubit informon Tetovasot.

Përmes një postimi në rrjetet sociale, Arifi ka shkruar se, me mirëkuptimin e familjes, është i gatshëm të vendosë në garanci edhe pasurinë e saj.

“Edhe unë jam gati të vë në garanci gjithçka që kam — pasurinë time dhe, me mirëkuptimin e familjes, edhe pasurinë e saj për lirimin e Artan Grubit,” ka shkruar Blero Arifi.

Ai ka sqaruar se këtë qëndrim e merr për shkak të bindjes së tij personale.

“E bëj këtë sepse besoj në pafajësinë e tij dhe besoj se ndaj tij po zhvillohet një përndjekje politike,” është shprehur Arifi.

Në fund të postimit, ai shton se bindjet duhet të mbështeten me veprime.

“Kur beson te drejtësia, nuk mjafton vetëm të flasësh. Duhet të jesh i gatshëm të qëndrosh pas bindjes tënde edhe kur kjo të kushton,” ka përfunduar ai.

Deklarata e Blero Arifit vjen pas disa reagimeve të ngjashme të mbështetësve të Artan Grubit, të cilët ditët e fundit kanë shprehur publikisht gatishmërinë për të ofruar pasurinë e tyre si garanci.

Ndërsa, tetovari Asllan Koka ka bërë një deklaratë publike, duke shprehur gatishmërinë që pasurinë e tij të paluajtshme ta vendosë si garanci pasurore për ish-zëvendëskryeministrin Artan Grubi.

Përmes një postimi në rrjetet sociale, Koka ka shkruar se është i gatshëm ta japë shtëpinë e tij si garanci me qëllim që Grubit t’i kthehet pasaporta.

“Edhe pasuria e paluajtshme e ime është në dispozicion të Artan Grubit për t’u vendosur si garanci pasurore, me qëllim që t’i kthehet pasaporta,” ka shkruar Asllan Koka.(INA)