Qyteti i Tetovës ka mirëpritur këtë javë delegacionet e larta të Unionit të Bashkive Shqiptare në Rajon (UBSHR), në një takim që shënon një gur themeli për konsolidimin e bashkëpunimit ndërshqiptar në Ballkanin Perëndimor dhe më gjerë.

Takimi mblodhi kryetarë komunash dhe përfaqësues nga Shqipëria, Kosova, Maqedonia e Veriut, Mali i Zi, Lugina e Preshevës, si dhe përfaqësues të komunave arbëreshe nga Italia, duke i dhënë ngjarjes një karakter të plotë kombëtar dhe kulturor.

Strategjia 2026-2028: Fokus te fondet e BE-së dhe zhvillimi i qëndrueshëm

Gjatë punimeve të Asamblesë së Përgjithshme, vëmendja kryesore u përqendrua te Strategjia Afatmesme 2027–2028 dhe prioritetet e punës për vitin aktual. Diskutimet u fokusuan në tri shtylla kryesore:

• Integrimi Evropian: Përafrimi i standardeve të qeverisjes lokale me ato të Bashkimit Evropian.

• Thithja e Investimeve: Rritja e kapaciteteve teknike të komunave për të aplikuar dhe implementuar projekte ndërkufitare të financuara nga fondet e BE-së.

• Ekonomia dhe Turizmi: Promovimi i një pakete të përbashkët turistike që lidh trashëgiminë kulturore të të gjitha trevave shqipfolëse.

Një Union që po rritet

Pjesëmarrja e komunave arbëreshe këtë vit reflekton rritjen e vlerës së këtij Unioni, jo vetëm si një instrument administrativ, por edhe si një urë lidhëse shpirtërore dhe ekonomike me diasporën historike.

Asambleja mbylli punimet me një zotim të përbashkët për të intensifikuar shkëmbimin e përvojave në sferën e urbanizmit, mjedisit dhe kulturës, duke e parë Unionin si një aktor kyç në stabilitetin dhe zhvillimin e rajonit.

Diaspora do të përjashtohet nga procesi i regjistrimit të popullsisë që pritet të realizohet në vitin 2031. Këtë e paralajmëroi numri një i Entit të Statistikave Dejan Stankov duke u bazuar në vendimin e Gjykatës Kushtetuese.

“Ne si Ent Shtetëror për Statistika do ta marrim parasysh propozimin e Gjykatës Kushtetuese e cila është sjellë para një periudhe të caktuar. Në përputhje me metodologjinë statistikore dhe standardeve ndërkombëtare nuk ka nevojë që të ndajmë qytetarët, në kuptimin nuk ka nevojë të përfshijmë popullsinë jo rezidente sepse qëllimi i regjistrimit është përcaktimi i popullsisë rezidente, gjegjësisht popullsinë që jeton në shtet dhe kjo është definicioni themelor statistikor”, deklaroi Dejan Stankov – Drejtor i Entit të Statistikave.

Ministri i Transformit Digjital thotë se dikasteri i tij po bashkëpunon me të gjitha institucionet të cilat bartin të dhënat e qytetarëve. Para regjistrimit elektronik, do të bëhen testime të metodologjisë.

“E dini se si parti politike e kemi kritikuar regjistrimin e kaluar dhe kishim arsye se pse. Një pjesë e madhe e të dhënave nuk ishin mbledhur në mënyrën e duhur të metodologjisë. Regjistroheshin njerëz nga mërgata të cilët fare nuk janë rezident të shtetit nën rrethana të paqarta. Kujtojmë se kishte pako me pasaporta të cilët regjistroheshin sikur janë njerëz dhe këtë nuk guxojmë ta lejojmë në regjistrimin e ardhshëm dhe mirë është që kemi filluar më herët që secili të punojë në regjistrat e tij”, tha Stefan Andonovski – Ministër i Transformimit Digjital.

 Vitin e kaluar Gjykata Kushtetuese shfuqizoi dispozita të metodologjisë të cilat ndanin popullsinë e Maqedonisë në rezident dhe jo rezident. Sipas Kushtetueses, ky kategorizim ishte bërë pa bazë ligjore sepse ligji për regjistrim nuk parashihte një ndarje të tillë me akt nënligjor.  Në regjistrimin e fundit të popullsisë, shtetas të Maqedonisë së Veriut janë regjistruar 2 milion e 97 mijë e 319 persona prej të cilëve 1 milion e 836 mijë e 713 persona janë rezident. Ndërkohë si jorezidentë janë regjistruar 260 mijë 606 persona. Prej tyre rreth 180 mijë apo 66,4 për qind janë shqiptarë, ndërsa mbi 12 mijë apo 24,5 për qind janë maqedonasë. /Alsat/

Në një atmosferë dhimbjeje dhe respekti, u mbajt mbledhje komemorative për mësimdhënësin e ndjerë Hazbi Topojani (1974–2026), në organizim të SHFK “Hasan Prishtina” në bashkëpunim me Komunën e Çairit.

Në këtë tubim përkujtimor morën pjesë familjarë, kolegë, miq dhe përfaqësues institucionalë. Fjalë rasti mbajti edhe Zëvendëskryeministri i parë, Bekim Sali, i cili e kujtoi të ndjerin si një njeri të përkushtuar ndaj arsimit dhe një mik të afërt, duke vlerësuar kontributin e tij në edukimin e brezave.

Drejtoresha e shkollës, Esma Fazlija, nënvizoi rolin dhe përkushtimin e tij në arsim, ndërsa kolegu Xhelal Ramadani ndau kujtime personale nga bashkëpunimi i tyre ndër vite. Nga Komuna e Çairit, Mjellma Gashi theksoi angazhimin e tij institucional, duke veçuar edhe drejtimin e Shkollës për të rritur “Anton Semejnoviq Makarenko”.

Në fund, në një moment tejet emocional, djali i tij, Ermal Topojani, ndau disa fjalë prekëse për babain e tij.

Kujtimi për Hazbi Topojanin do të mbetet i përjetshëm.