Lajme

Roth: BE-së i mungon interesi strategjik për Ballkanin Perëndimor

Ish-ministri gjerman për Evropën, Michael Roth, ka vlerësuar se Bashkimit Evropian i mungon një interes i qartë strategjik për Ballkanin Perëndimor, duke paralajmëruar se vakuumi i krijuar në rajon është shfrytëzuar nga fuqitë e tjera si Rusia, Kina dhe Turqia.

Në një bashkëbisedim në podcastin PIKË me publicistin Veton Surroi, Roth ka thënë se BE-ja është e përqendruar kryesisht te lufta në Ukrainë, por kjo duhet të shërbejë si një “zile zgjimi” për t’i kushtuar më shumë vëmendje Ballkanit Perëndimor, shkruan KOHA.

“Ekziston një mungesë e madhe e interesit strategjik për Ballkanin Perëndimor. Kjo zbrazëti politike është mbushur nga kinezët, rusët dhe turqit, dhe ky është një problem i madh për ne”, ka thënë ai.
Sipas Rothit, përgjegjësia për ngecjen e procesit integrues nuk bie vetëm mbi vendet e rajonit, por edhe mbi qendrat vendimmarrëse evropiane si Brukseli, Berlini dhe Parisi, të cilat, sipas tij, nuk kanë arritur të mbajnë premtimet ndaj vendeve të Ballkanit.

Ai përmendi edhe rastin e Kosovës, duke theksuar se pesë shtete të Bashkimit Evropian ende nuk e njohin pavarësinë e saj, ndërsa kritikoi mungesën e një strategjie afatgjatë për Bosnjë-Hercegovinën dhe zhvillimet politike në Serbi, të cilën e cilësoi si një shtet me prirje autoritare.

Roth u ndal edhe te rasti i Maqedonisë së Veriut, duke thënë se vendi bëri kompromise të mëdha për t’iu afruar BE-së, përfshirë ndryshimin e emrit, por më pas u përball me kushte të reja nga disa vende anëtare, gjë që, sipas tij, kontribuoi në dobësimin e forcave pro-evropiane dhe forcimin e partive nacionaliste e euroskeptike.

Ai shprehu shpresën se Bashkimi Evropian do të nxjerrë mësime nga gabimet e së kaluarës dhe do të investojë më shumë angazhim politik, financiar dhe diplomatik në Ballkanin Perëndimor.

Lajme

Mbeturinat para shkollave dhe kopshteve në Tetovë ngrenë shqetësim, drejtori i NPK-së Samet Bislimi: Grumbullimi falas nga dera e secilës shtëpi dhe objekt

Jepet zgjidhje konkrete për mbeturinat e vëllimshme në Tetovë – drejtori i NPK-së u bën thirrje qytetarëve ta shfrytëzojnë shërbimin falas për një qytet më të pastër.

Grumbullimi i rregullt i mbeturinave dhe ruajtja e pastërtisë publike mbeten ndër sfidat kryesore në Tetovë, veçanërisht në zonat pranë çerdheve dhe shkollave, ku grumbullimi i kontejnerëve dhe hedhja e mbeturinave të vëllimshme krijojnë probleme për mjedisin dhe qytetarët.

Përballë kësaj situate, drejtori i Ndërmarrjes Publike Komunale (NPK) në Tetovë, Samet Bislimi, thekson se qytetarët kanë në dispozicion një zgjidhje konkrete dhe pa pagesë për largimin e mbeturinave të vëllimshme nga shtëpitë e tyre.

“Ekipi shkon deri te dera e çdo qytetari dhe ia merr mbeturinat e vëllimshme, pa pagesë. Këtë shërbim e kemi organizuar që ta kemi qytetin më të pastër dhe qytetarët të kenë një zgjidhje se ku mund t’i hedhin këto mbeturina”, deklaroi Bislimi.

Shërbimi u mundëson qytetarëve të largojnë mobiliet e vjetra dhe sendet e tjera të mëdha pa pasur nevojë t’i lënë pranë kontejnerëve, në trotuare apo në hapësira publike, ku shpesh krijohen deponi të vogla ilegale.

Nga kompania Saubermacher Tetovë, përgjegjëse për zbrazjen e kontejnerëve dhe transportimin e mbeturinave drejt deponisë rajonale, thonë se ekipet e tyre po bëjnë përpjekje që grumbullimi i mbeturinave të kryhet rregullisht, madje edhe më shumë se një herë në ditë, aty ku paraqitet nevoja.

Sipas të dhënave të kompanisë, nga janari deri në shtator të këtij viti janë grumbulluar dhe transportuar mbi 25.000 tonë mbeturina komunale, si dhe afro 2.900 tonë mbeturina të vëllimshme. Gjatë kësaj periudhe, automjetet e kompanisë kanë përshkuar rreth 225.000 kilometra.

Vulnet Sela nga Saubermacher Tetovë theksoi se këto shifra dëshmojnë përmasat e punës së përditshme që nevojitet për të siguruar grumbullimin e mbeturinave në të gjithë territorin e Komunës së Tetovës.

Thirrje për përgjegjësi qytetare: mbeturinat e mëdha të mos lihen pranë kontejnerëve

Një nga problemet që rëndon pastërtinë e qytetit është hedhja e pakontrolluar e mbeturinave të vëllimshme, përfshirë mbetjet ndërtimore, mobiliet e vjetra dhe sendet e mëdha plastike, të cilat shpesh lihen pranë kontejnerëve ose drejtpërdrejt në tokë.

Kjo praktikë jo vetëm që krijon pamje të papastër, por kontribuon edhe në formimin e deponive të vogla në hapësira publike.

Nga NPK-ja e Tetovës u bëjnë thirrje qytetarëve që, në vend se t’i hedhin këto mbeturina në mënyrë të pakontrolluar, të kontaktojnë ndërmarrjen dhe të kërkojnë shërbimin falas të grumbullimit. Si alternativë, mbeturinat e vëllimshme mund të dërgohen edhe në qendrën grumbulluese të Saubermacher-it.

Ndërkohë, disa çerdhe dhe shkolla kanë kërkuar që kontejnerët pranë objekteve të tyre të zhvendosen në lokacione më të përshtatshme. Kjo e bën edhe më të rëndësishëm bashkëpunimin ndërmjet institucioneve, ndërmarrjeve publike dhe qytetarëve.

Nën drejtimin e Samet Bislimit, NPK-ja e Tetovës u bën thirrje qytetarëve që të shfrytëzojnë shërbimin falas për grumbullimin e mbeturinave të vëllimshme, duke kontribuar kështu në parandalimin e deponive ilegale dhe në krijimin e një ambienti më të pastër për të gjithë.

Lajme

Gjest i madh, 18 vjeçari gjen kuletën me 18 mijë € dhe i’a kthen pronarit

Një i ri 18 vjeçar ka treguar ndershmëri dhe përgjegjësi qytetare, pasi ka gjetur dokumente personale dhe një shumë të konsiderueshme parash, të cilat i ka dorëzuar në polici, njofton Ministria e Punëve të Brendshme.

Sipas njoftimit të MPB-së, dje, në orën 14:00, në Stacionin Policor në Delçevë, një 18-vjeçar nga ky qytet ka dorëzuar dokumentet personale të gjetura dhe para në vlerë prej 114.000 denarësh dhe rreth 2.000 eurosh.

I riu i kishte gjetur paratë dhe dokumentet në bulevardin „Maqedonia“ në Delçevë. Bëhej fjalë për një dokument udhëtimi, letërnjoftimin e një banori të Delçevës, si dhe shumën e lartpërmendur të parave.

Pas gjetjes së tyre, ai kishte vepruar me përgjegjësi dhe i kishte dorëzuar të gjitha në stacionin policor.

Ministria e Punëve të Brendshme e përshëndeti këtë veprim, duke theksuar se ai përbën një shembull pozitiv të ndershmërisë, ndërgjegjshmërisë dhe përgjegjësisë së lartë qytetare, veçanërisht te të rinjtë.

„Veprime të tilla meritojnë mirënjohje publike dhe përbëjnë një nxitje për kultivimin e vlerave shoqërore, besimit të ndërsjellë dhe sjelljes së përgjegjshme në komunitet“, theksuan nga MPB-ja.

Lajme

“Plumbin e kam ende në sy”, para nisjes drejt Italisë rrëfehet 28-vjeçari që u plagos në protestë

Një goditje, dy hapa dhe më pas rrëzimi në tokë. Kështu e përshkruan Erjon Vishkulli momentin kur u plagos në sy nga një plumb gome gjatë protestës.Mes dhimbjes dhe pasigurisë për shikimin, ai rrëfen për herë të parë ekskluzivisht për gazetarin e Top Channel Endi Tufa çfarë ndodhi, pak para se gjithçka të ndryshonte.

Plumbi ndodhet ende në syrin e tij të majtë, ndërsa shpresa tashmë është te mjekët dhe një ndërhyrje më e specializuar.“Shkova të takoja shokët dhe do të ikja. Kisha hequr maskën e oksigjenit dhe në atë moment takova një shok gazetar. I kisha diku 30 metra larg policët, pa asnjë reagim, pa asgjë. Vetëm kur më vjen një goditje, eca rreth dy metra dhe rashë në tokë”, tha ai.

Gjithçka ndodhi në pak sekonda. Erjoni tregon se pas goditjes ishte vetëm pjesërisht i vetëdijshëm. Kujtimet për atë që ndodhi më pas janë të pakta, por ai mban mend ndihmën e një shoku, i cili e transportoi me makinë. Pas kësaj, nisi një tjetër betejë, këtë herë në spital, me dhimbjen dhe frikën se mund të humbasë shikimin.“Isha pak i vetëdijshëm, ndërkohë që një shok më shoqëroi me makinë. Kaq mbaj mend pastaj”, u shpreh ai.

Plumbi i gomës ndodhet ende në syrin e majtë të Erjonit. Pasojat e goditjes dhe rreziku për shikimin mbeten shqetësimi kryesor. Ai nuk e fsheh dhimbjen, ndërsa për atë që mund të ndodhë në vijim, ende nuk ka siguri.“Vazhdoj ta kem ende plumbin e gomës në sy. Nuk e di tani të them se sa i lartë është rreziku, por e lehtë nuk është, sepse kam shumë dhimbje”, u shpreh ai për Top Channel.

Në këto kushte, trajtimi i specializuar është kthyer në shpresën kryesore për të shpëtuar syrin e dëmtuar. Pas kontaktit të Top Channel me stafin e spitalit, mjekët dhe të afërmit e Erjonit, është siguruar transporti i tij drejt një spitali në Romë, ku pritet të niset pasditen e sotme për të marrë kujdes më të specializuar mjekësor.Mes dhimbjes dhe pasigurisë, Erjoni mbyll dëshminë e tij me dy fjalë: “Vetëm fitore”. Një shprehje që, pas asaj që ka përjetuar, merr një kuptim edhe më të fortë.

“Vetëm fitore”, thotë ai.Endi Tufa: Çfarë do të thotë kjo?

“Shqipëria është e jona”, e mbyll ai intervistën./ Top Channel