Argjentina e ka nisur me fitore fushatën në Kupën e Botës, duke mposhtur Algjeria me rezultat 3-0 në ndeshjen e Grupit J të zhvilluar në Kansas City.

Heroi i takimit ishte kapiteni Lionel Messi, i cili realizoi të tre golat në minutat 17, 60 dhe 76, duke udhëhequr kampionët në fuqi drejt një fillimi perfekt në turne.

Ndeshja nisi me ritëm të lartë, me dy gola të anuluar brenda tetë minutave të para. Fillimisht Messi shënoi në minutën e 4-t, por goli u anulua për pozicion jashtë loje, ndërsa pak më vonë Fares Chaïbi shënoi për Algjerinë, por goli i tij u anulua gjithashtu.

Në minutën e 17-të, Argjentina kaloi në avantazh. Rodrigo De Paul asistoi për Messin, i cili u fut në zonë dhe realizoi me një goditje të saktë nga rreth 17 metra.

Me këtë gol, të 14-tin e tij në historinë e Kupave të Botës, Messi iu bashkua emrave si Kylian Mbappé dhe Gerd Müller në listën e golashënuesve më të mirë historikë të turneut.

Në pjesën e dytë, Argjentina e vulosi fitoren. Në minutën e 60-të, pas një tentative të Alexis Mac Allister që u devijua nga portieri Luca Zidane, Messi ishte i pari në top dhe e dërgoi në rrjetë për 2-0.

Ky ishte goli i tij i 15-të në Kupën e Botës, duke e barazuar me Cristiano Ronaldon në listën historike të realizuesve.

Het-triku u kompletua në minutën e 76-të, pas një kombinimi me Nicolás González, kur Messi realizoi bukur nga kufiri i zonës për 3-0 final.

Në minutën e 79-të, trajneri Lionel Scaloni e zëvendësoi Messin, ndërsa i gjithë stadiumi e përcolli me duartrokitje.

Përveç fitores, Messi vendosi edhe rekorde historike: arriti 200 paraqitje me kombëtaren dhe u bë lojtari i parë që luan në gjashtë Kupa Bote të ndryshme.

Argjentina e nis kështu me dominim të plotë mbrojtjen e titullit botëror.

Shkëndija ka njoftuar se mesfushori nigerian Ibrahim Alhassan nuk do të jetë pjesë e skuadrës në sezonet e ardhshme, pasi kontrata e tij me klubin ka skaduar me përfundimin e sezonit 2025/26.

Pas dy vitesh të kaluara me fanellën kuqezi, palët ndajnë rrugët me respekt dhe mirënjohje të ndërsjellë, duke i uruar njëra-tjetrës suksese në vazhdim.

Alhassan iu bashkua Shkëndijës në verën e vitit 2024 dhe gjatë qëndrimit të tij në Tetovë ishte një nga lojtarët e rëndësishëm të mesfushës. Në sezonin e tij të parë kontribuoi në fitimin e titullit kampion, ndërsa një vit më vonë ishte pjesë e skuadrës që realizoi suksesin më të madh në historinë e klubit në arenën ndërkombëtare.

Mesfushori 25-vjeçar ndihmoi ekipin në kualifikimin historik në fazën e Ligës së UEFA Conference League, si dhe në arritjen deri në fazën play-off të këtij kompeticioni, duke lënë gjurmë në një periudhë të suksesshme për klubin tetovar.

Shkëndija e ka falënderuar Alhassanin për kontributin, përkushtimin dhe profesionalizmin e treguar gjatë kohës së kaluar në klub, duke i uruar shëndet, mbarësi dhe shumë suksese në vazhdimin e karrierës së tij.

Pjesa e parë e ndeshjes mes Spanjës dhe Kepit të Gjelbër në raundin e parë të Kampionatit Botëror është mbyllur pa gola, me rezultatin 0:0.

Spanja ka qenë skuadra më e rrezikshme gjatë dyzet e pesë minutave të para dhe ka krijuar disa raste të mira për shënim, por nuk ka arritur ta gjejë rrugën drejt rrjetës.

Rasti më i mirë ka ardhur në minutën e tridhjetë e nëntë, kur Ferran Torres ka goditur nga afërsia, por topi ka përfunduar në traversë. Në vazhdim të aksionit, Mikel Oyarzabal e ka provuar me kokë, por portieri Vozinha ka reaguar mirë për ta shpëtuar portën e tij.

Vetëm pak minuta më vonë, në minutën e dyzet e pestë, Ferran Torres ka humbur një tjetër mundësi të artë. I pambuluar brenda zonës, ai ka goditur drejt këndit të poshtëm të portës, por sërish Vozinha ka qenë në vendin e duhur për të ndalur tentativën.

Në kohën shtesë të pjesës së parë, pas një goditjeje nga këndi, Aymeric Laporte ka kërcyer më lart se mbrojtësit kundërshtarë dhe ka goditur me kokë drejt portës, por tentativa e tij nuk ka qenë mjaftueshëm e fortë për ta mposhtur portierin e Kepit të Gjelbër.

Megjithëse dyzet e pesë minutat e para kanë përfunduar pa gola, ndeshja mbetet plotësisht e hapur.