Lajme

27 vjet nga transformimi i UÇK-së

27 vjet pas vendimit historik për transformimin e Ushtrisë Çlirimtare të Kosovës, procesi i demilitarizimit dhe themelimi i Trupave Mbrojtëse të Kosovës mbeten ndër momentet më të rëndësishme në konsolidimin e institucioneve të sigurisë në vend.

Ky tranzicion, i realizuar nën mbikëqyrjen ndërkombëtare pas përfundimit të luftës, krijoi bazat për ndërtimin e kapaciteteve vendore të sigurisë dhe mbrojtjes, duke kulmuar vite më vonë me themelimin dhe zhvillimin e Forcës së Sigurisë së Kosovës, si institucioni kryesor në mbrojtje të sovranitetit dhe integritetit territorial të vendit.

Njëzet e shtatë vjet më parë, në malet e Berishës, udhëheqja e Kosovës mori vendimin për transformimin e Ushtrisë Çlirimtare të Kosovës, duke hapur një kapitull të ri në rrugën e ndërtimit të institucioneve të pasluftës.

Marrëveshja për transformimin e UÇK-së parashihte faza të ndryshme, përfshirë dorëzimin e armëve, mbajtjen e përkohshme të uniformave, si dhe integrimin e një pjese të ish-pjesëtarëve të saj në polici, administratë publike dhe institucione të tjera.

Ky proces u zhvillua në një periudhë prej 90 ditësh, pas së cilës u përmbyll demilitarizimi i plotë i UÇK-së.

Më 20 shtator 1999 u nënshkrua marrëveshja për themelimin e Trupave Mbrojtëse të Kosovës-TMK, një strukturë e konceptuar jo si forcë ushtarake, por si organizatë civile emergjente për reagim ndaj fatkeqësive natyrore dhe situatave të tjera emergjente.

Marrëveshja u nënshkrua nga Hashim Thaçi, në cilësinë e komandantit politik të UÇK-së, dhe Agim Çeku, si Shef i Shtabit të Përgjithshëm të UÇK-së, ndërsa u pranua nga gjenerali britanik, Mike Jackson, komandanti i parë i KFOR-it në Kosovë.

Këtë e quan moment historik dhe të rëndësishëm njëri nga personat që ishte i përfshirë në proces, gjenerali Kadri Kastrati.

E tani pas më shumë se 2 dekadash, Kastrati flet për Forcën e Sigurisë së Kosovës së tanishme, të cilën e quan krenari të vendit.

Transformimi i UÇK-së dhe krijimi i TMK-së shihen si një ndër etapat më të rëndësishme në procesin e ndërtimit të kapaciteteve të sigurisë në Kosovë, ku TMK-ja u konsiderua nga shumë ish-pjesëtarë si vazhdimësi e përpjekjeve për krijimin e një force mbrojtëse vendore, vizion që u realizua vite më vonë me formimin dhe zhvillimin e Forcës së Sigurisë së Kosovës.

Sot, Forca e Sigurisë së Kosovës përfaqëson institucionin kryesor të mbrojtjes së vendit, me mision për ruajtjen e sovranitetit dhe integritetit territorial, si dhe me synimin për të kontribuar në operacione ndërkombëtare paqeruajtëse krah partnerëve të saj ndërkombëtarë./RTK

Lajme

U kap me 1 milion € në Merdare, kush është personi që arriti të arsyetoj paratë?

Shtetasi gjerman, i dyshuar për 1 milion euro të padeklaruara kur kishte hyrë në Kosovë nga Merdarja, është paraqitur dje për intervistim në Policinë e Kosovës.

Ai është arrestuar dhe është dërguar në mbajtje meqë pasi kishte pranuar se paratë e gjetura në automjetin e tij ishin të tijat, s’kishte arritur të dëshmonte prejardhjen e tyre.

Policia në raportin e saj 24-orësh e ka cilësuar veprën penale si “Pjesëmarrje ose organizim i grupit kriminal të organizuar”.

Më 24 shkurt 2026, në pikën kufitare në Merdarë, autoritetet zbuluan rreth 1 milion euro të fshehura brenda një automjeti tip Mercedes Sprinter me targa të Shqipërisë që po hynte nga Serbia.

Një skaner që i ishte dhuruar Kosovës nga SHBA kishte zbuluar paratë në automjetin që po kalonte nëpër pikë kufitare.

Raporti i policisë:

Gjermani – Kosovë 24.02.2026 – NN. Më 23.10.2026 në PSRK është paraqitur për intervistim i dyshuari mashkull shtetas i Gjermanisë, për shkak se me 24.02.2026 në vendkalimin kufitar në Merdare në automjetin me targa të Shqipërisë në një hapësirë të modifikuar brenda në automjet, janë gjetur dhe sekuestruar 1.000.000 (një milion) euro. I dyshuari gjatë intervistimit ka pranuar se paratë e konfiskuara kanë qenë të tij, por nuk ka arritur të dëshmojë prejardhjen e parave dhe lidhjen me personat e dyshuar që kanë bërë transportin e tyre. I dyshuari është arrestuar dhe me vendim të prokurorit është dërguar në mbajtje.

Lajme

Kumanovari dhuron 26 mijë euro për rrugën që mundëson qasjen në xhaminë më të vjetër në rajon

Husejn Bajrami, djali i të ndjerit hoxhë Nexhmedin Bajrami nga Kumanova, ka financuar blerjen e rrugës që mundëson qasjen në Xhaminë “Koxha Mehmed Beu” në fshatin Tabanoc.

Marrëveshja për blerjen u nënshkrua më 19 tetor 2026, në prani të myftiut të Kumanovës, h. Abedin ef. Imeri, dhe anëtarëve të familjes Selmani nga Llojani.

Rruga ka një sipërfaqe prej 529 metrash katrorë, me gjerësi prej shtatë metrash, ndërsa vlera e blerjes arrin në 26.450 euro, shumë e paguar nga Husejn Bajrami.

Muftinia e Kumanovës e falënderoi z.Bajrami për këtë kontribut, si dhe familjen Selmani për bashkëpunimin, duke shprehur lutjen që kjo vepër të pranohet si sadaka dhe të shpërblehet me të mira.

Lajme

Të dielën nis ora dimërore, akrepat lëvizin një orë prapa

Ora verore këtë vit përfundon të dielën, më 25 tetor në orën 3:00 të mëngjesit duke u zhvendosur një orë prapa.

Në vitin 2018, Komisioni Evropian shqyrtoi heqjen e ndërrimit të kohës sezonale dhe më pas zhvilloi një konsultim publik në të cilin morën pjesë rreth 4.6 milionë njerëz.

Megjithatë, ndonëse 84 përqind e të anketuarve ishin në favor të heqjes së tij, anëtarët nuk arritën të arrinin një marrëveshje se cila kohë do të ishte e përhershme, kështu që propozimi nuk u zbatua.

Vendet e BE-së ende kalojnë në orën e verës në pranverë dhe në orën e dimrit në vjeshtë.

Në Azi, Kina, India, Japonia, Koreja e Jugut, Tailanda, Vietnami, Indonezia, Malajzia dhe Singapori nuk e përdorin kohën e kursimit të verës.

Kina e hoqi orën e verës në vitin 1991.

Në Lindjen e Mesme , Arabia Saudite, Emiratet e Bashkuara Arabe, Katari, Kuvajti dhe Bahreini nuk e ndryshojnë orën gjatë vitit.

Irani e hoqi ndërrimin sezonal të orës në vitin 2022, dhe që nga viti 2023 nuk e ndryshon më kohën midis verës dhe dimrit.

Në Amerikën e Jugut , Brazili, Argjentina, Kolumbia, Peruja dhe Ekuadori nuk e përdorin kohën sezonale.

Në Australi, rregullat ndryshojnë sipas shtetit. Uellsi i Ri Jugor, Viktoria, Australia Jugore, Tasmania dhe Territori i Kryeqytetit Australian po kalojnë në orën verore, ndërsa Queensland, Australia Perëndimore dhe Territori Verior nuk e ndryshojnë orën, raportoi portali Maariv.

Ndër arsyet për heqjen e ndërrimit të kohës sezonale janë funksionimi më i thjeshtë i jetës së përditshme , shmangia e problemeve në sistemet kompjuterike, transportin dhe biznesin, si dhe fakti që në vendet pranë ekuatorit, gjatësia e ditës nuk ndryshon ndjeshëm gjatë vitit.