Ministria e energjisë, minierave dhe burimeve minerale vazhdon me masat që u ndihmojnë drejtpërdrejt qytetarëve të investojnë në një sistem ngrohjeje më ekonomik, më efikas dhe më të pastër.

Në “Gazetën Zyrtare” është publikuar Programi për ndryshimin e Programit për nxitjen e furnizimit me gaz në amvisëri për vitin 2026, me të cilin afati për aplikim për mbështetje financiare zgjatet deri më 31 tetor 2026.

Me këtë vendim, Ministria u jep një mundësi shtesë të gjitha amvisërive që ende nuk kanë arritur të aplikojnë, ta shfrytëzojnë mbështetjen shtetërore dhe të përfitojnë deri në 30.000 denarë, përkatësisht deri në 70 për qind të shpenzimeve të bëra për kyçje në rrjetin e gazit natyror ose për blerjen e një kaldaje me gaz.

Për zbatimin e kësaj mase janë siguruar 3 milionë denarë, ndërsa mjetet do të ndahen sipas parimit “i pari që aplikon – i pari që përfiton”, deri në shterimin e fondit.

Zgjatja e afatit është bërë me një qëllim të qartë – që sa më shumë qytetarë të kenë mundësi ta shfrytëzojnë këtë masë dhe të ulin shpenzimet për ngrohje, duke përdorur njëkohësisht një burim energjie më të pastër dhe më efikas.

Të drejtë aplikimi kanë amvisëritë që gjatë vitit 2026 do të realizojnë kyçjen e shtëpisë në sistemin e shpërndarjes së gazit natyror, si dhe amvisëritë që do të blejnë një kaldajë me gaz për një objekt që tashmë ka qenë i kyçur në sistem deri më 1 janar 2026. Çdo amvisëri mund të paraqesë vetëm një kërkesë.

Drejtori i Qendrës për Menaxhim me Kriza (QMK), Muhamed Ali sot merr pjesë në Konferencën rajonale kushtuar sistemeve 112 dhe teknologjive moderne për menaxhimin e situatave të krizës në Tivat.

“Së shpejti, qytetarët do të kenë në dispozicion aplikacionin “Where Are You”, i cili do të mundësojë: dërgimin e saktë të vendndodhjes nga vendi i incidentit, dërgimin e fotove nga vendi i incidentit, dërgimin e videove nga vendi i incidentit dhe komunikim të drejtpërdrejtë video me Qendrën operative në situata emergjente”, deklaroi Ali.

Përveç kësaj, do të jetë i disponueshëm edhe funksioni “Silent Call”, i cili do t’u lejojë viktimave të dhunës në familje dhe personave në rrezik të kërkojnë ndihmë në heshtje dhe në siguri.

“Me vendosjen e këtyre funksionaliteteve të reja, vazhdojmë të modernizojmë sistemin 112, duke siguruar siguri më të madhe për qytetarët, transmetim më të saktë të informacionit dhe një përgjigje më efikase të shërbimeve kompetente në situata emergjente”, tha Ali.

Nënkryetari i Kuvendit të Malit të Zi dhe kryetari i Grupit Parlamentar të Miqësisë me Egjiptin, Nikollë Camaj, priti në një takim lamtumirës ambasadorin e Republikës Arabe të Egjiptit në Mal të Zi, Sh. T. Mahmoud Mostafa Afifi, me rastin e përfundimit të mandatit të tij diplomatik.

Gjatë takimit, Camaj e falënderoi ambasadorin Afifi për përkushtimin dhe kontributin e dhënë në forcimin e marrëdhënieve miqësore ndërmjet Malit të Zi dhe Egjiptit. Ai vlerësoi gjithashtu qasjen pozitive të Egjiptit ndaj shqiptarëve, si dhe qëndrimin e tij në raport me Kosovën.

Bashkëbiseduesit diskutuan edhe për mundësitë e zgjerimit të bashkëpunimit ndërmjet dy vendeve, me theks të veçantë në diplomacinë parlamentare, ekonominë, investimet, kulturën dhe turizmin.

Me këtë rast, Camaj shprehu bindjen se marrëdhëniet ndërmjet Malit të Zi dhe Egjiptit do të vazhdojnë të forcohen dhe të zhvillohen në frymën e besimit, respektit reciprok dhe dialogut të hapur, në dobi të interesave të përbashkëta të të dy vendeve.

Ja postimi plotë:

🇦🇱
Sot, në cilësinë e nënkryetarit të Kuvendit të Malit të Zi dhe të kryetarit të Grupit Parlamentar të Miqësisë me Egjiptin, pata kënaqësinë të takohem me ambasadorin në largim të Republikës Arabe të Egjiptit, Sh. T. Mahmoud Mostafa Afifi. Shfrytëzova rastin ta falënderoja për përkushtimin dhe kontributin e dhënë në forcimin e marrëdhënieve miqësore ndërmjet Malit të Zi dhe Egjiptit, duke veçuar edhe qendrimin që Egjipti ka për shqiptarët, natyrisht edhe për Kosovën. Po ashtu diskutuam për thellimin e mëtejshëm të bashkëpunimit, veçanërisht në diplomacinë parlamentare, ekonomi, investime, kulturë dhe turizëm.

Jam i bindur se marrëdhëniet ndërmjet shteteve tona do të vazhdojnë të forcohen dhe të zhvillohen në dobi të ndërsjellë, në frymën e besimit, respektit dhe dialogut të hapur.