Lajme

Hoxha në në Bogovinë: Investime në infrastrukturë për mjedis më të sigurt dhe më cilësor jetësor

Ministri i Mjedisit Jetësor dhe Planifikimit Hapësinor, Muamet Hoxha, sot ishte për vizitë pune në Komunën e Bogovinës, ku së bashku me kryetarin Feti Abazi dhe zëvendësministren e Transportit dhe Lidhjeve, Kaltrina Zekolli Shaqiri, inspektuan projektet infrastrukturore që po realizohen me mbështetje financiare nga Ministria.

Me mjete në vlerë prej rreth 60 milionë denarëve, MMJPH-ja mbështet tri projekte të rëndësishme në këtë komunë: ndërtimin e kanalit për ujërat atmosferikë në vendbanimin Pirok, rregullimin e shtratit të lumit Kusha në Pallçisht të Poshtëm dhe rregullimin e shtratit të lumit në Kamjan, që do të fillon së shpejti.

Me këto projekte sigurohet mbrojtje më e mirë nga ujërat atmosferikë dhe ato të rrëmbyeshëm, zvogëlohen rreziqet nga përmbytjet dhe krijohen kushte më të sigurta jetese për popullatën lokale.

Ministria e Mjedisit Jetësor dhe Planifikimit Hapësinor vazhdon të investojë në projekte infrastrukturore në mbarë vendin, sepse pikërisht investimet e këtilla kapitale vendosin themelet e kthesës së gjelbër dhe kontribuojnë në zhvillimin e qëndrueshëm, në qëndrueshmëri më të madhe ndaj sfidave klimatike dhe në një mjedis më cilësor jetësor për të gjithë qytetarët.

Lajme

Është arrestuar në Deçan, Albert Sylaj, i dyshuari për vrasjen e Arlinda Zekajt

I dyshuari për vrasjen e 49-vjeçares, Arlinda Zekajt, është arrestuar dy ditë pasi kreu krimin.
Albert Sylaj u kap në Deçan nga Policia e Kosovës.

“Arrestimi është realizuar sonte, rreth orës 23:40, në Deçan, pas veprimeve të ndërmarra nga njësitet përkatëse policore”, njoftoi mbrëmë Policia e Kosovës.

Gjithashtu, ky institucion ka falënderuar qytetarët që kanë ndihmuar në lokalizimin e Sylajt.

Lajme

Haxhiu në shtëpinë ku qëndroi refugjate: Faleminderit shqiptarë të Maqedonisë që në ditë të vështira na i hapët shtëpitë dhe zemrat e juaja

Kryetarja e Kuvendit të Kosovës, Albulena Haxhiu, në kuadër të vizitës së saj në Maqedoninë e Veriut, ka qëndruar edhe te familja Sinani, ku siç bënë të ditur, ka qenë refugjate gjatë luftës së Kosovës, përcjell TV21.

Haxhiu, këtë veprim, siç njofton ajo, e ka bërë për “t’u çmallur, për të kujtuar dhe për të falënderuar familjen Sinani dhe shqiptarët e tjerë të Maqedonisë së Veriut, të cilët, në ditët më të vështira të luftës, na i hapën dyert e shtëpive dhe zemrat e tyre”.

“Pas 27 vitesh, u ktheva aty ku kisha ardhur si fëmijë refugjat lufte.
U ktheva për t’u çmallur, për të kujtuar dhe për të falënderuar familjen Sinani dhe shqiptarët e tjerë të Maqedonisë së Veriut, të cilët, në ditët më të vështira të luftës, na i hapën dyert e shtëpive dhe zemrat e tyre.
Mirënjohje e përjetshme për solidaritetin, bujarinë dhe humanizmin e tyre”, shkruan Haxhiu.

Gjatë ditës, Haxhiu ka realizuar takime bilaterale dhe është takuar edhe me kryetarët e komunave me shumicë shqiptare në Maqedoninë e Veriut./TV21

Lajme

Bora e parë e këtij viti në Maqedoni, ja ku po bie

Reshjet e borës kanë nisur sonte në rajonet më të larta të Maqedonisë perëndimore, ndërsa sipas informacioneve nga terreni, reshjet më të dendura janë regjistruar në Kodrën e Diellit.

Një video e regjistruar rreth orës 18:00 në qafën malore të Strazhës, në aksin rrugor Gostivar–Kërçovë, tregon kushtet dimërore në këtë segment rrugor dhe nevojën për kujdes të shtuar nga drejtuesit e automjeteve.

Sipas dëshmive të shoferëve që kanë kaluar në këtë rrugë, bora deri më tani nuk po qëndron në asfalt, ndërsa trafiku po zhvillohet pa probleme të theksuara.

Megjithatë, drejtuesit e automjeteve këshillohen të përshtatin shpejtësinë me kushtet atmosferike, të ruajnë distancën e sigurisë dhe të tregojnë kujdes të shtuar gjatë qarkullimit në zonat malore.