Lajme

“Jehona e Malësisë”: Kujtimi për Srebrenicën është detyrim moral për të gjithë

Me nderim dhe dhimbje të thellë, sot përkujtohet 11 Korriku – Dita e Përkujtimit të Gjenocidit të Srebrenicës, një nga tragjeditë më të rënda humanitare në Evropë pas Luftës së Dytë Botërore.

Në korrik të vitit 1995, mbi 8.000 persona boshnjakë u vranë në mënyrë mizore në Srebrenicë. Kjo ngjarje mbetet një plagë e rëndë në kujtesën e njerëzimit dhe një kujtesë e përhershme për pasojat shkatërruese të urrejtjes dhe intolerancës.

Me këtë rast, Shoqata “Jehona e Malësisë” ka shprehur respektin e saj të thellë për viktimat dhe solidaritetin me familjet e tyre, të cilat vazhdojnë të përballen me dhimbjen e humbjeve të mëdha.

“Kujtesa për Srebrenicën është një detyrim moral për të gjithë ne, që e vërteta të mos harrohet dhe krime të tilla të mos përsëriten kurrë”, thuhet në mesazhin e kësaj shoqate.

Nga “Jehona e Malësisë” u bë thirrje për paqe, drejtësi, respekt për dinjitetin njerëzor dhe bashkëjetesë mes popujve, duke theksuar rëndësinë e luftës kundër urrejtjes, diskriminimit dhe çdo forme dhune.

“Lavdi dhe kujtim i përjetshëm për viktimat e Gjenocidit të Srebrenicës”, thuhet në mesazhin e nënshkruar nga kryetari i Shoqatës “Jehona e Malësisë”, Zef Berishaj.

Ja postimi plotë:

Sot, me nderim dhe dhimbje të thellë, përkujtojmë 11 Korrikun – Ditën e Gjenocidit të Srebrenicës, ku mbi 8,000 persona boshnjakë u vranë mizorisht në korrik të vitit 1995, në një nga krimet më të rënda kundër njerëzimit në Evropë pas Luftës së Dytë Botërore.

Shoqata “Jehona e Malësisë” përkulet me respekt para kujtimit të viktimave të pafajshme dhe shpreh solidaritetin e saj me familjet që vazhdojnë të mbajnë plagët e kësaj tragjedie. Kujtesa për Srebrenicën është një detyrim moral për të gjithë ne, që e vërteta të mos harrohet dhe krime të tilla të mos përsëriten kurrë.

Le të shërbejë kjo ditë si një thirrje për paqe, drejtësi, respekt për dinjitetin njerëzor dhe bashkëjetesë mes popujve. Duke kujtuar viktimat, ne forcojmë angazhimin tonë kundër urrejtjes, diskriminimit dhe çdo forme dhune.

Lavdi dhe kujtim i përjetshëm për viktimat e Gjenocidit të Srebrenicës.

Kryetar i shoqatës “Jehona e Malësisë”,

Zef Berishaj

Lajme

Mësuesja në Gjermani ishte në pushim mjekësor për gati 17 vjet, por merrte pagë të plotë

Një mësuese nga qyteti gjerman Duisburg është nën hetim nga prokuroria nën dyshimin për mashtrim, pasi për gati 17 vjet ka qenë vazhdimisht në pushim mjekësor, ndërsa ka vazhduar të marrë pagën e plotë, raporton gazeta “Welt”.

Prokuroria ka nisur procedurë ndaj saj pasi u zbulua se, ndonëse ishte nëpunëse shtetërore, gjatë kësaj periudhe nuk kishte mbajtur asnjë orë mësimi, por kishte vazhduar të përfitonte pagën e plotë.

Për këtë arsye, administrata rajonale ka urdhëruar pensionimin e saj të detyruar. Megjithatë, mësuesja e kundërshton vendimin dhe ka ngritur padi në Gjykatën Administrative në Dyseldorf, duke kërkuar që të vazhdojë të marrë pagën e plotë që përfitonte si nëpunëse aktive, në vend të pensionit të rregullt, i cili në rastin e saj do të ishte rreth 4 mijë euro në muaj.

Prokuroria kërkon dënim me burg dhe kthimin e 248 mijë eurove, për të cilat dyshohet se janë përfituar në mënyrë të paligjshme.

Një tjetër element që ka tërhequr vëmendjen e hetuesve është aktiviteti i saj privat. Edhe pse zyrtarisht ishte shpallur plotësisht e paaftë për punë, ajo zhvillonte një biznes privat me produkte kozmetike, për të cilin madje kishte marrë edhe një çmim për sipërmarrësi.

Rasti ka shkaktuar reagime edhe për shkak të mungesës së mësuesve në Duisburg. Qyteti përballet prej vitesh me mungesë serioze të kuadrit arsimor në 128 shkollat e tij, ku mësojnë rreth 70 mijë nxënës.

Për të tërhequr mësues të rinj, autoritetet lokale organizojnë fushata të posaçme, të cilat përfshijnë ture njohëse në qytet dhe përfitime si akomodim falas për një periudhë të përkohshme.

Lajme

Është arrestuar në Deçan, Albert Sylaj, i dyshuari për vrasjen e Arlinda Zekajt

I dyshuari për vrasjen e 49-vjeçares, Arlinda Zekajt, është arrestuar dy ditë pasi kreu krimin.
Albert Sylaj u kap në Deçan nga Policia e Kosovës.

“Arrestimi është realizuar sonte, rreth orës 23:40, në Deçan, pas veprimeve të ndërmarra nga njësitet përkatëse policore”, njoftoi mbrëmë Policia e Kosovës.

Gjithashtu, ky institucion ka falënderuar qytetarët që kanë ndihmuar në lokalizimin e Sylajt.

Lajme

Haxhiu në shtëpinë ku qëndroi refugjate: Faleminderit shqiptarë të Maqedonisë që në ditë të vështira na i hapët shtëpitë dhe zemrat e juaja

Kryetarja e Kuvendit të Kosovës, Albulena Haxhiu, në kuadër të vizitës së saj në Maqedoninë e Veriut, ka qëndruar edhe te familja Sinani, ku siç bënë të ditur, ka qenë refugjate gjatë luftës së Kosovës, përcjell TV21.

Haxhiu, këtë veprim, siç njofton ajo, e ka bërë për “t’u çmallur, për të kujtuar dhe për të falënderuar familjen Sinani dhe shqiptarët e tjerë të Maqedonisë së Veriut, të cilët, në ditët më të vështira të luftës, na i hapën dyert e shtëpive dhe zemrat e tyre”.

“Pas 27 vitesh, u ktheva aty ku kisha ardhur si fëmijë refugjat lufte.
U ktheva për t’u çmallur, për të kujtuar dhe për të falënderuar familjen Sinani dhe shqiptarët e tjerë të Maqedonisë së Veriut, të cilët, në ditët më të vështira të luftës, na i hapën dyert e shtëpive dhe zemrat e tyre.
Mirënjohje e përjetshme për solidaritetin, bujarinë dhe humanizmin e tyre”, shkruan Haxhiu.

Gjatë ditës, Haxhiu ka realizuar takime bilaterale dhe është takuar edhe me kryetarët e komunave me shumicë shqiptare në Maqedoninë e Veriut./TV21