Lajme

Rusia godet Kievin me raketa, të paktën gjashtë të plagosur

Një sulm me raketa ruse goditi Kievin në orët e para të mëngjesit, duke lënë të paktën gjashtë persona të plagosur, sipas autoriteteve lokale ukrainase.

Shpërthimet u dëgjuan në disa zona të kryeqytetit, ndërsa sirenat e alarmit për sulme ajrore u aktivizuan vetëm pak minuta pas goditjes së parë, raportuan gazetarët e AFP-së nga terreni.

Kreu i administratës ushtarake të Kievit, Timur Tkachenko, njoftoi përmes Telegramit se forcat ruse po kryenin sulme me raketa ndaj kryeqytetit dhe u bëri thirrje banorëve të strehohen menjëherë në vende të sigurta.

Autoritetet ukrainase po vlerësojnë dëmet e shkaktuara nga sulmi, ndërsa ekipet e emergjencës janë angazhuar në zonat e prekura. Deri më tani nuk ka informacion për viktima, ndërsa situata në Kiev mbetet e tensionuar.

Lajme

Mexhiti për EuroNews: Jemi dakorduar me kryeministrin që të gjitha provimet profesionale të zhvillohen edhe në gjuhën shqipe

Bashkëkryetari i VLEN-it, Izet Mexhiti, ka deklaruar se partnerët e koalicionit qeveritar janë dakorduar me kryeministrin Hristijan Mickoski për zbatimin e Ligjit për Përdorimin e Gjuhëve në të gjitha institucionet ku organizohen provime profesionale, duke përfshirë edhe provimin e jurisprudencës.

Në një intervistë për EuroNews Albania, Mexhiti u pyet lidhur me çështjen e provimit të jurisprudencës në gjuhën shqipe dhe zbatimin e ligjit në praktikë.

I pyetur nga gazetari nëse VLEN e ka kërkuar këtë zgjidhje dhe çfarë përgjigjeje ka marrë nga partnerët qeveritarë, Mexhiti u shpreh se nuk bëhet fjalë për një kërkesë, por për një marrëveshje të arritur brenda koalicionit qeverisës.

“Ne nuk kërkojmë. Ne jemi dakorduar me kryeministrin Mickoski dhe për këtë ka pasur edhe një deklaratë të përbashkët mes kryeministrit dhe dy partnerëve qeveritarë”, deklaroi Mexhiti.

Ai shtoi se marrëveshja nuk kufizohet vetëm te provimi i jurisprudencës, por parasheh zbatimin e Ligjit për Përdorimin e Gjuhëve në të gjitha dikasteret ku organizohen provime profesionale.

Sipas Mexhitit, qëllimi është që qytetarët të kenë mundësi t’i nënshtrohen provimeve profesionale edhe në gjuhën shqipe, në përputhje me dispozitat ligjore dhe marrëveshjen e arritur mes partnerëve të koalicionit qeveritar.

Lajme

Tërmet në Kosovë, ndihet edhe në Maqedoni

Një tërmet me magnitudë 2.2 ballë të shkallës Rihter është regjistruar mbrëmjen e së shtunës në Kosovë.

Sipas të dhënave lëkundja sizmike ndodhi në orën 20:22:53 me orën lokale.

Epiqendra e tërmetit ishte rreth 17 kilometra në jugperëndim të Prizrenit dhe 71 kilometra në perëndim të Shkupit, në një thellësi prej 15 kilometrash.

Lajme

Fazliu: Drejtoria e Librave Amë është e përgatitur për fluksin e kërkesave nga mërgimtarë

Drejtori i Drejtorisë për Udhëheqjen e Librave Amë, Faton Fazliu, njoftoi se institucioni është i përgatitur për përballimin e rritjes së kërkesave për dokumente gjatë sezonit veror, kur një numër i madh i mërgimtarëve kthehen në vend.

Fazliu tha se Drejtoria do të vazhdojë të ofrojë shërbime të shpejta dhe efikase për qytetarët, duke siguruar se administrata është e gatshme t’i përgjigjet fluksit të shtuar të aplikimeve.

“Sezoni veror sjell një numër më të madh kërkesash për dokumente nga mërgimtarët tanë. Drejtoria për Udhëheqjen e Librave Amë është e përgatitur të ofrojë shërbime të shpejta dhe efikase”, deklaroi Fazliu.

Ai theksoi se paralelisht me ofrimin e shërbimeve, institucioni po vazhdon procesin e modernizimit dhe digjitalizimit të procedurave administrative.

“Njëkohësisht vazhdojmë me modernizimin dhe digjitalizimin e proceseve, për një administratë më të afërt dhe më cilësore për çdo qytetar”, u shpreh drejtori i Drejtorisë për Udhëheqjen e Librave Amë.

Sipas Fazliut, modernizimi i shërbimeve synon lehtësimin e procedurave administrative dhe përmirësimin e cilësisë së shërbimeve për të gjithë qytetarët, me theks të veçantë për mërgimtarët gjatë muajve të verës.