Një ngjarje tragjike është regjistruar në Klos, ku ka humbur jetën 38-vjeçari Erkin Lika, i njohur për pasionin e tij ndaj alpinizmit, hiking-ut dhe eksplorimit të shpellave. Ai dyshohet se u mbyt në lumin Mat pasi ra nga Ura e Vashës gjatë një stërvitjeje me litar.

Sipas informacioneve, Lika ishte pjesë e Shërbimit të Kërkim-Shpëtimit Malor të Shqipërisë dhe po zhvillonte ushtrime në zonë kur ndodhi aksidenti fatal. Ekipet e kërkim-shpëtimit vijojnë operacionin për gjetjen e trupit të tij në ujërat poshtë Urës së Vashës dhe në zonën përreth.

38-vjeçari, banues në Tiranë, punonte si specialist i rrjeteve të fibrave optike dhe ishte speleolog i certifikuar, i trajnuar nga organizata italiane Club Alpino Italiano dhe Società Speleologica Italiana. Ai ishte gjithashtu një nga themeluesit e Shoqatës Speleologjike Shqiptare, duke dhënë një kontribut të rëndësishëm në zhvillimin e speleologjisë në vend./dritare.net

Ish-kryeministri Nikolla Gruevski ka mohuar në rrjetet sociale se apartamentet e sekuestruara në rastin “Parcelat në Vodno” janë të tijat.

Ai thotë se e gjitha kjo është pjesë e një gjyqi të montuar politik të motivuar nga ish-kryeministri Zoran Zaev.

“Herë pas here, të njëjtat media publikojnë tituj dhe artikuj se gjoja apartamentet e mia janë sekuestruar dhe janë në shitje. Dhe, herë pas here, jam i detyruar të mohoj se ato apartamente nuk kanë qenë kurrë të miat dhe se e gjithë kjo është rezultat i një gjyqi kriminal të motivuar politikisht në të cilin qëllimi dhe motivet ishin politike dhe personale, që rrjedhin nga frika dhe urrejtja e kriminelit dhe tradhtarit të interesave kombëtare maqedonase Zoran Zaev. Fatkeqësisht, sot Zoran Zaev, duke investuar paratë e tij të përvetësuara në Dubai, Taxhikistan, Zvicër, Greqi dhe vende të tjera anembanë botës, dhe herë pas here duke pushuar në një jaht luksoz në Greqi, ende nuk i ndjen pasojat e krimeve të tij jo vetëm kundër meje, por edhe kundër Republikës së Maqedonisë dhe maqedonasve”, shkruan ai.

Kryeministri i Shqipërisë, Edi Rama, deklaroi se edhe nëse Shqipëria bëhet anëtare e Bashkimit Evropian, nuk do ta përdorë të drejtën e vetos kundër Maqedonisë së Veriut në procesin e integrimit evropian.

Deklaratën ai e bëri para pjesëmarrësve të kampit “RinCamp 2026”, që po mbahet në destinacionin turistik Jalë, ku marrin pjesë edhe të rinj nga Maqedonia e Veriut.

Duke iu përgjigjur pyetjes së një studenti nga Shkupi nëse Shqipëria do të vendoste veto ndaj rrugës evropiane të Maqedonisë së Veriut, Rama theksoi se ka qenë gjithmonë kundër përdorimit të vetos në procesin e zgjerimit të Bashkimit Evropian.

Sipas tij, vetoja është një mekanizëm që pengon integrimin evropian dhe nuk i shërben askujt, duke shtuar se procesi i zgjerimit duhet të bazohet në bashkëpunim dhe mbështetje reciproke mes vendeve aspirante dhe anëtare të BE-së, përcjell Zhurnal.