Lajme

Qamili: Përfunduam pjesën e parë të listës për riemërtimin e rrugëve në Tetovë

Nënkryetari i Komunës së Tetovës, njëherësh këshilltar komunal nga VLEN dhe kryetar i Komisionit për riemërimin e rrugëve, Albi Qamili, ka njoftuar se është përmbyllur mbledhja e dytë e Grupit të Punës për Riemërtimin e Rrugëve, ku është konfirmuar pjesa e parë e listës së emrave të propozuar për rrugët e qytetit.

Përmes një postimi në facebook, Qamili thekson se procesi synon t’i japë Tetovës emra që, sipas tij, pasqyrojnë historinë, kulturën dhe identitetin e qytetit.

Postimi i plotë:

“Rrugë dinjitoze me emra dinjitoz, Tetova po ndryshon!

Sot përfunduam mbledhjen e dytë të Grupit të Punës për Riemërtimin e Rrugëve ku kemi konfirmuar pjesën e parë të listës së emrave të propozuar për rrugët e qytetit tonë.

Nga Skënderbeu, Nënë Tereza dhe Vëllezërit Frashëri, deri te Kadareja e Migjeni, janë emrat e rinj që do të vendosen në rrugët e Tetovës.

Gjithashtu përfshihen personalitete që kanë lënë gjurmë të pashlyeshme në jetën kulturore, arsimore e sportive të Tetovës, si shkrimtarët Murat Isaku e Abdylazis Islami, dirigjenti Gani Jahja dhe futbollisti Haqim Memedi.

Rrugët ku jetojnë bashkëqytetarët tanë maqedonas nuk do të mbajnë më emra jugosllavë, por emra të figurave të historisë dhe kulturës maqedonase, si Kërste Petkov Misirkov dhe të tjera.

Me këtë fillojmë zgjidhjen e një çështje të lënë pas dore prej vitesh, për të cilën ne si udhëheqësi kemi punuar për një kohë të gjatë”, ka shkruar Qamili.

Lajme

E dhimbshme, tifoz i Fenerbahçes ndërron jetë gjatë ndeshjes

Një tifoz i Fenerbahçes, Yaşar Gerçek, ka ndërruar jetë gjatë ndeshjes pas një sulmi në zemër.

Klubi e ka konfirmuar lajmin me dhimbje, duke shprehur ngushëllime për familjen, të afërmit dhe gjithë komunitetin e Fenerbahçes.

Në të njëjtën ndeshje, Fenerbahçe u mposht në shtëpi nga Beşiktaşi me rezultat 2-1.

Lajme

Skandal në Tetovë! I akuzuari pengoi mjekët teksa po shpëtonin të lënduarin

Tetovë – Incident gjatë një ndërhyrjeje të Ndihmës së Shpejtë në Tetovë. Një 40-vjeçar nga qyteti është shoqëruar në polici pasi dyshohet se ka penguar ekipin mjekësor teksa po i jepte ndihmë një këmbësori të lënduar në një aksident trafiku.

Ngjarja ka ndodhur më 5 shtator, rreth orës 19:10, në rrugën “Ilinden” në Tetovë.

Sipas denoncimit të bërë në SPB Tetovë nga një punonjës i Shërbimit të Ndihmës së Shpejtë, gjatë ofrimit të ndihmës mjekësore, R.U. (40) nga Tetova dyshohet se ka prishur rendin dhe qetësinë publike me bërtitje, ngritje zëri dhe sjellje të papërshtatshme ndaj ekipit mjekësor.

Policia e ka shoqëruar personin në stacion dhe ndaj tij është përgatitur parashtresa përkatëse.

Lajme

163 km/h në rrugë ku lejoheshin 80!

Rumuni “fluturon” nëpër Maqedoni, kapet në Tabanoc

Shpejtësi marramendëse në autostradën A1! Një shtetas rumun është ndaluar nga policia pasi është kapur duke drejtuar automjetin me 163 kilometra në orë, në një pjesë të rrugës ku shpejtësia maksimale e lejuar ishte vetëm 80 km/h.

Ngjarja ka ndodhur më 4 shtator 2026, rreth orës 06:30, në autostradën A1, pranë Demir Kapisë.

Sipas policisë, 49-vjeçari H.V.S. nga Rumania po drejtonte një automjet tip Audi, me targa rumune, kur sistemi i mbikëqyrjes “Qyteti i Sigurt” regjistroi shkeljen.

Ai u identifikua si person që dyshohet se ka kryer veprën penale “drejtim i pamatur i automjetit”, sipas nenit 297-a të Kodit Penal.

Rreth orës 11:20, kur automjeti po dilte nga vendi përmes pikës kufitare Tabanoc, policia e ndaloi dhe e arrestoi shtetasin rumun.

Ai u dërgua në Stacionin Policor të Negotinës për procedurë të mëtejshme, ndërsa ndaj tij pritet të ngrihet kallëzim penal përkatës.

Nga 80 në 163 km/h – më shumë se dyfishi i shpejtësisë së lejuar!