Moti sot do të jetë me diell dhe i nxehtë, me vranësira të pakta deri mesatare lokale. Do të fryjë erë e lehtë deri mesatare nga drejtimi verior. Në orët e pasdites do të ketë kushte për paqëndrueshmëri të izoluar, të shoqëruar me reshje të rrëmbyeshme shiu dhe bubullima.

Temperatura minimale do të lëvizë nga 11 deri në 21 gradë Celsius, ndërsa ajo maksimale do të arrijë nga 31 deri në 38 gradë.

Në Shkup do të mbizotërojë mot me diell dhe i nxehtë, me vranësira të pakta deri mesatare. Do të fryjë erë e lehtë deri mesatare nga veriu. Temperatura e mëngjesit do të jetë rreth 19 gradë, ndërsa ajo ditore do të arrijë deri në 37 gradë Celsius.

Sipas Drejtorisë për Punë Hidrometeorologjike, në ditët në vijim do të vazhdojë mot kryesisht me diell dhe i nxehtë, me vranësira të pakta deri mesatare. Në orët e pasdites do të ketë kushte për paqëndrueshmëri lokale, të shoqëruar me reshje të rrëmbyeshme, bubullima dhe erë të përforcuar.

Më nxehtë pritet të jetë të dielën, kur temperaturat ditore në të gjithë vendin do të jenë mbi 30 gradë Celsius, ndërsa në disa rajone mund të afrohen me 40 gradët.

Ka përfunduar pa dënim edhe rasti gjyqësor “Total”, në të cilin ishte i akuzuar gazetari Dragan Pavloviq Latas, pasi Prokuroria hoqi dorë nga aktakuza njofton INA.

Nga Gjykata Penale njoftuan se në lëndën me numër K.br. 1493/17, e njohur në opinion si “Total”, e cila fillimisht ishte ngritur nga ish-Prokuroria Speciale Publike (PSP), ndërsa më pas u mor në kompetencë nga Prokuroria Themelore Publike e Shkupit, më 27 maj 2026 është marrë aktgjykim me të cilin aktakuza është refuzuar, pasi prokurori kompetent hoqi dorë tërësisht nga ndjekja penale.

Sipas Gjykatës, procedura, e cila zhvillohej që nga tetori i vitit 2017, përfshinte si të akuzuar Dragan Pavloviq Latas si person fizik, si dhe tri persona juridikë nga Shkupi, të dyshuar për veprën penale evazion fiskal.

Rasti ishte kthyer disa herë në rigjykim për shkak të ndryshimit të kompetencës së prokurorëve dhe kalimit të lëndës nga një prokurori në tjetrën. Në seancën e fundit, gjatë fjalës përfundimtare, prokurori publik vendosi të tërhiqej nga ndjekja penale ndaj të gjithë të akuzuarve.

Sipas sqarimit të Gjykatës, pas analizimit të ekspertizës financiare, prokurori fillimisht bëri ndryshime në aktakuzë dhe më pas konstatoi se për dy nga personat juridikë nuk ishin plotësuar elementet ligjore të veprës penale të evazionit fiskal. Ndërkohë, për personin e tretë juridik dhe për Dragan Pavloviq Latas kishte hyrë në fuqi parashkrimi absolut i ndjekjes penale, duke e bërë të pamundur vazhdimin e procedurës.

Për këtë arsye, Gjykata vendosi të refuzojë aktakuzën, në përputhje me dispozitat ligjore.

Aktgjykimi i datës 25 qershor 2026 është i formës së prerë. Nga Gjykata Penale bëjnë të ditur se janë përgatitur edhe vendimet për shpenzimet procedurale, ndërsa aktgjykimi do të publikohet në faqen zyrtare të gjykatës pasi të anonimizohen të dhënat personale.

Rasti “Total” kishte të bënte me akuzat ndaj gazetarit Dragan Pavloviq Latas për evazion fiskal në periudhën 2008–2015, përmes kompanive “Total Marketing” dhe “Total Media Center”. Lënda ishte hapur nga ish-Prokuroria Speciale Publike (PSP)./INA/

Një zhvillim që pritet të ngjallë reagime në skenën politike. Kryetari i Lidhjes Demokratike Boshnjake, Munir Kollashinac, është parë sot përkrah liderëve të koalicionit VLEN, Izet Mexhiti dhe Bilall Kasami, gjatë ceremonisë së organizuar nga Ambasada e Republikës së Turqisë në Shkup me rastin e 15 Korrikut – Ditës së Demokracisë dhe Unitetit Kombëtar.

Prania e Kollashinacit në krah të drejtuesve të VLEN-it vjen pasi ai ishte pjesë e Frontit Europian, koalicion i udhëhequr nga Ali Ahmeti, të cilit iu bashkua përmes një marrëveshjeje politike të nënshkruar para zgjedhjeve parlamentare të vitit 2024.

Fotografitë nga aktiviteti kanë nxitur spekulime se Kollashinac mund të jetë duke u distancuar nga Fronti Europian dhe duke afruar pozicionet me VLEN-in. Deri më tani nuk ka një deklaratë zyrtare nga ai apo nga Lidhja Demokratike Boshnjake për ndryshim të kampit politik, megjithatë paraqitja e tij përkrah Izet Mexhitit dhe Bilall Kasamit është parë si një sinjal i qartë politik.

Nëse ky zhvillim do të konkretizohet me një vendim zyrtar, atëherë Fronti Europian do të humbte edhe një subjekt politik nga radhët e tij, ndërsa VLEN do të fitonte një tjetër partner në prag të zhvillimeve të reja në skenën politike.

Mbetet të shihet nëse pas këtij takimi do të pasojnë edhe lëvizje zyrtare politike, apo bëhet fjalë vetëm për një pjesëmarrje në një aktivitet diplomatik.