Ministri i Mjedisit Jetësor dhe Planifikimit Hapësinor, Muhamet Hoxha, mori pjesë në takimin e punës kushtuar realizimit të Hapit 4 të Agjendës së Reformave, ku u prezantuan aktivitetet e ndërmarra deri më tani për thjeshtimin e procedurave administrative.

Hoxha bëri të ditur se Ministria ka analizuar gjithsej 31 procedura administrative, ndërsa 15 prej tyre do të thjeshtohen deri në fund të vitit 2026. Sipas tij, për secilën nga këto procedura janë përgatitur masa konkrete dhe plane zbatimi, me synimin që qytetarët dhe bizneset të përfitojnë shërbime më të shpejta, më të lehta dhe më efikase.

“Vazhdojmë me përkushtim në përmbushjen e obligimeve që dalin nga Agjenda e Reformave dhe në ndërtimin e një administrate moderne, me procedura të thjeshtuara, institucione më efikase dhe shërbime më cilësore për qytetarët dhe komunitetin e biznesit”, theksoi ministri Hoxha.

Ky proces është pjesë e reformave të administratës publike dhe synon uljen e barrës burokratike, rritjen e efikasitetit institucional dhe përmirësimin e cilësisë së shërbimeve publike.

https://www.facebook.com/share/p/1Jq4r3ZpHM/

Kryetari i Komunës së Çairit, Izet Mexhiti, ka deklaruar se sigurimi i ujit të pijshëm është një e drejtë elementare e qytetarëve dhe një nga detyrimet më themelore të institucioneve.

Përmes një postimi në rrjetet sociale, Mexhiti njoftoi se ka qëndruar në Gostivar, ku zhvilloi një takim në Komunën e Gostivarit për t’u njohur nga afër me situatën e krijuar dhe masat që po ndërmerren për tejkalimin e saj.

Ai bëri të ditur se, në cilësinë e nënkryetarit të BNJVL-së, ka shprehur gatishmërinë për të ofruar mbështetjen e nevojshme institucionale, me qëllim që kjo krizë të menaxhohet sa më shpejt dhe me sa më pak pasoja për qytetarët.

Sipas Mexhitit, prioritet mbetet mbrojtja e shëndetit të qytetarëve, sigurimi i furnizimit me ujë të sigurt dhe koordinimi i të gjitha institucioneve për t’iu përgjigjur me efikasitet situatës së krijuar.

“Në momente si këto, qytetarët kanë nevojë për institucione që veprojnë, bashkëpunojnë dhe marrin përgjegjësi. Jam i bindur se me koordinim të plotë ndërinstitucional dhe me mbështetje të ndërsjellë do ta tejkalojmë këtë situatë sa më shpejt, duke rikthyer normalitetin dhe sigurinë për çdo familje në Gostivar”, ka shkruar Mexhiti.

Ministri Agon Ferati sot priti në takim ushtruesen e detyrës së shefes së Misionit në Ambasadën e Shteteve të Bashkuara të Amerikës në Shkup, Sh. S. znj. Nicole Varns.

Takimi u zhvillua në një moment të rëndësishëm për Ministrinë, e cila po punon në përgatitjen e Planit Vjetor, riformatimin strukturor dhe modernizimin institucional.

Në takim u diskutua edhe për konceptin “25 vite dhe përtej”, në kuadër të 25-vjetorit të Marrëveshjes së Ohrit, si një platformë që synon të hapë një qasje të re ndaj bashkëjetesës, gjithëpërfshirjes dhe ndërtimit të besimit ndërmjet komuniteteve.

Ministri theksoi se qëllimi i Ministrisë është i qartë: ndërtimi i një institucioni funksional, gjithëpërfshirës dhe më afër qytetarit.

“Partneriteti me Shtetet e Bashkuara të Amerikës është i rëndësishëm jo vetëm për stabilitetin dhe demokracinë, por edhe për forcimin e institucioneve që u shërbejnë qytetarëve në mënyrë të barabartë dhe të përgjegjshme”, theksoi ministri.

Gjatë takimit u riafirmua rëndësia e bashkëpunimit me SHBA-në si partner strategjik i Maqedonisë së Veriut, veçanërisht në proceset që lidhen me institucionet gjithëpërfshirëse, besimin ndërmjet komuniteteve dhe perspektivën euroatlantike të vendit.