Një tërmet me magnitudë 4.7 ka goditur të premten zonën e Campi Flegrei pranë qytetit jugor italian të Napolit, duke shkaktuar ndërprerje të energjisë elektrike, pezullim të shërbimeve hekurudhore dhe të metrosë, si dhe dëmtime në disa ndërtesa, njoftuan autoritetet.

Tërmeti, i regjistruar në orën 19:46 (17:46 GMT), e kishte epiqendrën në zonën e Campi Flegrei, në perëndim të Napolit, në një thellësi prej rreth 3 kilometrash, bëri të ditur Instituti Kombëtar Italian i Gjeofizikës dhe Vullkanologjisë, raporton Reuters, përcjell Gazeta Express.

Shërbimi italian i zjarrfikësve tha se kishte raportime për dëme të vogla në ndërtesa brenda dhe përreth Napolit, por shtoi se ekipet e tij nuk kishin marrë kërkesa të menjëhershme për ndihmë apo shpëtim të banorëve.

Shërbimet lokale të trenave dhe metrosë u pezulluan si masë paraprake, njoftuan zyrtarët lokalë.

Mediet italiane raportuan se ky ishte një nga tërmetet më të forta të regjistruara ndonjëherë në këtë zonë, ndërsa banorë të disa lagjeve dolën me nxitim në rrugë kur u ndjenë lëkundjet.

Campi Flegrei, një kalderë vullkanike me dendësi të madhe banimi që përfshin një pjesë të madhe të Napolit perëndimor, ka përjetuar aktivitet sizmik gjithnjë e më të shpeshtë vitet e fundit, duke bërë që qeveria të rrisë monitorimin e zonës.

Edhe pse tërmetet e vogla janë të zakonshme në këtë zonë, lëkundjet më të forta kanë shtuar frikën për një përsëritje të krizës sizmike që goditi Campi Flegrei në fillim të viteve 1980, duke shkaktuar ndërprerje të mëdha dhe duke detyruar mijëra njerëz të largohen nga shtëpitë e tyre.

Tërmetet janë relativisht të shpeshta në Itali.

Një seri tërmetesh të fuqishme goditën Italinë qendrore në vitin 2016, duke shkatërruar pjesë të rajoneve Lazio, Umbria dhe Marche dhe duke shkaktuar rreth 300 viktima.

Tërmeti më vdekjeprurës i dekadave të fundit ishte ai me magnitudë 6.9 që goditi zonën e Irpinia-s në Italinë jugore në nëntor të vitit 1980, duke vrarë rreth 2.700 persona dhe duke shkatërruar qindra qytete.

Propozimi i Partisë Socialiste për Reformën e re Administrativo-Territoriale ka shkaktuar reagime të forta në disa zona të vendit.

Më 31 korrik 2026, banorë të Dimalit, Divjakës, Klosit, Prrenjasit dhe Memaliajt dolën në protesta kundër bashkimit të bashkive të tyre me njësi të tjera vendore. Ndërsa një ditë më herët, më 30 korrik, protesta u zhvillua në Poliçan.

Në Dimal, qytetarët kundërshtuan propozimin që bashkia të shkrihet dhe t’i bashkohet Beratit. Banorët dorëzuan edhe një peticion, duke kërkuar që Dimal të mbetet bashki më vete.

Ata argumentojnë se ndryshimi do të ndikojë në shërbimet publike dhe përfaqësimin e komunitetit.

Në Divjakë, banorët dhe kryebashkiaku Josif Gorreja protestuan kundër bashkimit me Lushnjën. Ata u shprehën se humbja e statusit të bashkisë do të largojë institucionet nga qytetarët dhe do të dëmtojë zhvillimin e zonës.
Në Klos, qytetarët dhe administrata e bashkisë kundërshtuan bashkimin me Matin.

Banorët kanë deklaruar se duan ruajtjen e bashkisë së tyre, duke argumentuar se distancat dhe problemet e shërbimeve do të rriten pas ndryshimit territorial.

Në Prrenjas, banorët dolën kundër bashkimit me Librazhdin, duke kërkuar që qyteti të ruajë autonominë vendore dhe institucionet lokale.

Në Memaliaj, protesta u zhvillua më 31 korrik kundër propozimit për bashkimin me Tepelenën.

Banorët kundërshtuan humbjen e bashkisë, ndërsa kryebashkiaku Albert Malaj e cilësoi vendimin si një kërcënim për identitetin dhe zhvillimin e zonës.

Ai deklaroi se argumentet e paraqitura në dëgjesa nuk janë marrë parasysh dhe kërkoi reagim nga komuniteti.

Ndërkohë, në Poliçan, një ditë më parë, qytetarët protestuan kundër bashkimit me Beratin, ndërsa pati edhe djegie simbolike të teserave të Partisë Socialiste nga disa protestues.

Drafti i PS për Reformën Territoriale parashikon uljen e numrit të bashkive nga 61 në 46, me shkrirjen e disa njësive vendore, mes tyre Dimal, Divjakë, Klos, Memaliaj, Prrenjas dhe Poliçan.

Ministri i Marrëdhënieve ndërmjet Bashkësive, Agon Ferati, në një brifing me gazetarë ka prezantuar gjendjen në të cilën e ka gjetur institucionin pas marrjes së detyrës, duke paralajmëruar reforma në funksionimin e ministrisë dhe një qasje të re në shpërndarjen e resurseve dhe granteve.

Ferati tha se ministria, e cila më herët është udhëhequr nga Artan Grubi dhe më pas nga Ivan Stoilkoviq, për vite me radhë ka pasur mungesë të orientimit strategjik, kushteve elementare për punë dhe kohezionit të brendshëm.

Sipas tij, nga 139 të punësuar në ministri, rreth 30 për qind nuk kanë pasur kushte adekuate për të kryer punën e tyre, për shkak të mungesës së pajisjeve bazë, përfshirë kompjuterë, tavolina dhe hapësira pune.

“Kemi gjetur një institucion ku burimet njerëzore nuk janë përdorur siç duhet, ndërsa disa individë të afërt me kabinetet politike kanë pasur rol më të madh se sa vetë struktura institucionale”, tha Ferati.

Ai theksoi se menjëherë pas marrjes së funksionit ka nisur procesi për përmirësimin e kohezionit brenda ministrisë, duke zhvilluar takime me udhëheqësit e sektorëve dhe ekspertë për të gjetur mënyra për funksionim më efikas.

Sipas Feratit, një prej problemeve kryesore është mungesa e dokumenteve strategjike.

“Që nga formimi i ministrisë kemi vetëm dy dokumente strategjike. Kjo tregon se institucioni nuk ka pasur një drejtim të qartë dhe orientim afatgjatë”, deklaroi ministri.

Ai paralajmëroi krijimin e dy departamenteve të reja – Departamentit për Partneritete Strategjike, i cili do të merret me bashkëpunimin ndërkombëtar dhe fondet evropiane, si dhe Departamentit për Analiza dhe Hulumtime.

Ferati foli edhe për shpërndarjen e granteve, duke akuzuar se në periudhën e kaluar ka pasur pabarazi në ndarjen e mjeteve.

Sipas tij, nga 36 grantet e ndara, 29 kanë shkuar për komunitetin dhe shoqatat serbe, kryesisht për organizimin e aktiviteteve kulturore, ndërsa një grant ka pasur vlerë prej 500 mijë denarësh.

“Këto janë para të shtetit dhe për vitin e ardhshëm prioritet do të jetë një ndarje më e drejtë dhe më proporcionale e granteve”, tha Ferati.

Në pjesën e vizionit të tij, ministri kërkoi bashkëpunim më të madh me mediat, duke theksuar rolin e tyre në ruajtjen e stabilitetit dhe kohezionit shoqëror.

Ai përmendi si shembull tensionet që krijohen gjatë ndeshjeve sportive, ku sipas tij, fyerjet në stadiume shpesh përhapen në rrjetet sociale dhe më pas reflektohen edhe në institucionet politike.

“Nuk mund t’i detyrojmë mediat se çfarë të publikojnë, por televizionet kanë rol shumë të rëndësishëm në porositë që i dërgojnë shoqërisë”, tha Ferati.

Ai vlerësoi se një nga arsyet që krijon pakënaqësi mes komuniteteve është edhe mënyra e shpërndarjes së investimeve dhe mbështetjes publike, duke sugjeruar se edhe në sport duhet të ketë një qasje më të balancuar.

“Nëse investimet kapitale janë ndarë proporcionalisht mes komunave, ndoshta një logjikë e tillë duhet të aplikohet edhe në fusha të tjera, përfshirë sportin, që të shmangen tensionet dhe ndarjet”, përfundoi ministri Ferati.