Lajme

Elmazi akuza për keqpërdorime në Komunën e Sarajit: 7 mijë euro për ushqim dhe miliona denarë për pllaka bekatoni

Kryetari i Komunës së Sarajit, Muhamed Elmazi, ka akuzuar ish-udhëheqësin Ilaz Veseli për keqpërdorim të mjeteve publike, gjatë një seance të Këshillit Komunal, raporton Zyrtare.net

Sipas Elmazit, Veseli ka shpenzuar rreth 7 mijë euro nga fondet komunale për ushqim dhe pije në një periudhë prej rreth 70 ditësh, duke e ngarkuar këtë shumë si borxh ndaj Komunës së Sarajit.

“Qytetarët duhet ta dinë se Ilaz Veseli i ka ngrënë 7000 euro për 70 ditë, të fondeve tona, bukë për 70 ditë… kjo faturë i faturohet Komunës së Sarajit si borxh”, deklaroi Elmazi, duke shtuar se shpenzimet ditore kanë arritur mesatarisht nga 100 deri në 120 euro.

Ai theksoi se faturimi është bërë për periudhën nga 25 korriku deri më 30 tetor 2025, kohë kur, sipas tij, Veseli ka qenë në krye të komunës. Sipas Elmazit, vetëm një restorant lokal ka faturuar këtë shumë për konsum ushqimi dhe pije.

Në të njëjtën deklaratë, Elmazi ngriti shqetësime edhe për një rast tjetër financiar, që lidhet me shtrimin e pllakave të bekatonit. Ai tha se një kompani ka përfituar shuma të konsiderueshme, përfshirë edhe kamata të larta, percjell Zyrtare.net

“Për një borxh të mbetur prej 7 milionë denarë, janë marrë edhe 4 milionë denarë kamata. Nuk mund t’i kushtojë më shumë se 20 euro për metër katror, ndërsa Komunës i është faturuar kjo shumë. Kush i mori 20 euro për metër katror?”, u shpreh ai.

Kryetari i Sarajit theksoi se institucionet komunale tashmë kanë nisur procedura revizioni dhe paralajmëroi përgjegjësi për, siç i quajti ai, keqpërdorimet e mjeteve të qytetarëve./Zyrtare.net/

Lajme

Ndërron jetë edhe një pacient me ethet e Nilit Perëndimor, gjithsej dhjetë viktima

Një pacient nga Shkupi (70 vjeç) është viktima e dhjetë me virusin e Nilit Perëndimor në Maqedoni.

Ai vdiq këtë fundjavë në Klinikën e Sëmundjeve Infektive ku mjekët luftuan për jetën e tij për më shumë se një muaj, njoftoi sot në një konferencë për shtyp drejtori i Klinikës së Sëmundjeve Infektive, Fadil Cana.
Deri më tani janë regjistruar gjithsej 70 raste të personave të infektuar me virusin.

Kanë vdekur gjithsej 10 pacientë, nëntë nga Shkupi dhe një nga Kumanova, kryesisht të moshuar me sëmundje të shumëfishta komorbiditete.

Lajme

Çmime të reja të derivateve të naftës, lirohet dizeli, shtrenjtohet bezina

Komisioni Rregullator për Energjetikë, Shërbime të Ujit dhe Shërbime për Menaxhimin e Mbetjeve Komunale ka marrë vendim për uljen e çmimeve me pakicë të derivateve të naftës mesatarisht për 1.06 për qind.

Sipas vendimit, nga 29 shtatori 2026 në ora 00:01, çmimet maksimale do të jenë:

EUROSUPER BS-95: 100 denarë/litër – rritje për 1 denar.
EUROSUPER BS-98: 102 denarë/litër – rritje për 1 denar.
EURODIZEL BS: 100 denarë/litër – ulje për 4.5 denarë.
Vaj ekstra i lehtë EL-1: 111.5 denarë/litër – ulje për 3 denarë.
Mazut M-1 NS: 49.882 denarë/kg – ulje për 0.196 denarë.

Në vendimin e ri është aplikuar edhe masa e Qeverisë për TVSH-në e reduktuar në 10 për qind për Eurodizelin, si dhe akciza e ulur për benzinat dhe naftën.

Sipas të dhënave të Komisionit Rregullator, çmimet referente të derivateve në tregun botëror kanë shënuar ndryshime të ndryshme gjatë periudhës së fundit. Te benzina është regjistruar një rritje e lehtë, ndërsa te dizeli, vaji ekstra i lehtë dhe mazuti janë shënuar ulje.

Lajme

Gashi në Riad: Thellim i bashkëpunimit parlamentar, ekonomik dhe bilateral

Kryetari i Kuvendit, Afrim Gashi, gjatë vizitës zyrtare në Mbretërinë e Arabisë Saudite, ka zhvilluar takim me kryetarin e Këshillit të Shurës, Abdullah bin Mohammed Al-Sheikh. Në takim është diskutuar për thellimin e bashkëpunimit parlamentar dhe bilateral, si dhe për mundësitë e rritjes së bashkëpunimit ekonomik dhe investimeve saudite në Maqedoninë e Veriut.

“ Në kuadër të vizitës zyrtare në Mbretërinë e Arabisë Saudite, zhvillova një takim me Kryetarin e Këshillit të Shurës, Abdullah bin Mohammed Al-Sheikh. Diskutuam për thellimin e bashkëpunimit parlamentar dhe bilateral, si dhe për mundësitë për rritjen e bashkëpunimit ekonomik dhe investimeve saudite në Maqedoninë e Veriut.

Theksova gjithashtu interesimin tonë për pjesëmarrje aktive në EXPO 2030 në Riad, si dhe rëndësinë e dialogut të rregullt politik dhe bashkëpunimit konkret ndërmjet dy vendeve. Jam i bindur se kjo vizitë do t’i japë një shtysë të mëtejshme marrëdhënieve ndërmjet Maqedonisë së Veriut dhe Arabisë Saudite”, deklaroi Gashi.