BDI i ka reaguar komunikatës së VLEN-it, në të cilën, ata thonë se reagimet e Integristëve për autosatradën Shkup-Bllacë, janë për shkak se autostrada nuk kalon në tokat e tyre.
Në reagimin e BDI-së, thuhet se kjo është mendësia politike e Izet Mexhitit.
“Njerëzit zakonisht gjykojnë të tjerët sipas vetes. Prandaj, kur dëgjojnë për një projekt strategjik, mendja u shkon menjëherë te parcelat, pronat, fitimet dhe interesat private.
Për Izet Mexhitin, i cili për dy dekada e ka trajtuar pushtetin si instrument për ndërtimin e rrjeteve të interesit, është e vështirë të kuptojë se dikush mund të mbrojë një autostradë sepse është e rëndësishme për qytetarët, për ekonominë dhe për lidhjen strategjike me Kosovën.
Në vend që të përgjigjet pse për gati dy vite projekti u zvarrit, pse u diskutua degradimi i tij nga autostradë në rrugë magjistrale dhe pse u rrezikua një korridor me rëndësi kombëtare, Izet Mexhiti zgjedh të shpikë teori konspirative për toka dhe interesa private.
Kjo është metoda e vjetër: kur mungojnë rezultatet, prodhohen akuza. Kur mungojnë argumentet, kryhen shpifje”, thuhet në komunikatën e BDI-së.
Sipas tyre qytetarët nuk presin shpifje por presin përgjigje pse u vonua projekti dhe pse u tentua ndryshimi i karakterit të tij.
“Dhe pse sot po paraqitet si sukses i VLEN-it një projekt që ishte projektuar, financuar dhe nisur shumë kohë para ardhjes së tyre në pushtet?
Sa herë që Izet Mexhiti flet për toka, prona dhe interesa private, ai në fakt flet për botëkuptimin e tij politik.
Nëse Vlen disponon prova për çfarë do veprimi të kundërligjshëm, le t’i dorëzojë ato në organet kompetente. Në të kundërtën, shpifjet publike mbeten vetëm një mjet për ta larguar vëmendjen nga mungesa e rezultateve dhe nga premtimet e pambajtura.
BDI do të vazhdojë të mbrojë interesin publik dhe projektet strategjike, ndërsa qytetarët do të gjykojnë vetë se kush po flet për autostrada dhe kush po flet për parcela”, thuhet në komunikatën e BDI-së.

VLEN tha se reagimet e opozitës në lidhje me autostradën Shkup-Bllacë, janë vetëm për arsyet që projekti “nuk kalon aty ku për vite janë bërë hesape dhe janë blerë toka me shpresën e përfitimeve milionëshe nga shpronësimi”. VLEN tha se ky projekt është strategjik, por që është zvarritur dhe mbeti peng i interesave duke shtuar se tani, i gjithi do të realizohet në praktikë.

“Piskamat e BDI-së për Autostradën Shkup-Bllacë kanë vetëm një arsye; trasa nuk kalon aty ku për vite janë bërë hesape dhe janë blerë toka me shpresën e përfitimeve milionëshe nga shpronësimi.
Për herë të parë fitojnë qytetarët, e jo interesat partiake.

Kjo është arsyeja e vërtetë e zhurmës së tyre. Përpjekja që autostrada të shërbejë për interesa individuale dhe jo për interes të qytetarit ka dështuar. Trasa po realizohet sipas zgjidhjes profesionale dhe në dobi të qytetarëve, jo sipas planeve të atyre që menduan se do të pasuroheshin nga kjo rrugë.
Për vite me radhë ky projekt strategjik u zvarrit dhe mbeti peng i interesave të ngushta. Sot, kur më në fund po avancon, përfitues nuk do të jenë individë të privilegjuar, por qytetarët, bizneset, ekonomia dhe lidhja strategjike me Kosovën.

VLEN nuk është në qeveri për të mbrojtur interesa private, por për të realizuar projekte që për dekada janë përdorur vetëm për propagandë politike. Autostrada Shkup-Bllacë është një prej projekteve që dëshmon dallimin mes atyre që flisnin për zhvillim dhe atyre që po e realizojnë atë në praktikë.

Autostrada Shkup-Bllacë është dëshmia më e mirë e dallimit mes dy qasjeve politike: 24 vite premtime pa realizim dhe 24 muaj angazhim që e çojnë projektin drejt përfundimit”, tha VLEN.

Pavarësisht subvencioneve dhe pagesave që Qeveria e Kosovës jep për fëmijët e porsalindur, numri i lindjeve ka vazhduar të bjerë. Sipas të dhënave të Agjencisë së Statistikave të Kosovës, gjatë prillit 2026 janë regjistruar 2.261 lindje, ose 2,3 për qind më pak se në muajin mars, duke vazhduar trendin e rënies së lindshmërisë në vend.

Kosova po vazhdon të përballet me rënien e lindshmërisë, pavarësisht masave financiare dhe subvencioneve që janë ofruar vitet e fundit për familjet që sjellin në jetë fëmijë. Të dhënat më të fundit tregojnë se numri i lindjeve ka shënuar sërish rënie në muajin prill 2026 krahasuar me muajin paraprak, shkruan Demokracia.com.

Sipas të dhënave të publikuara nga Agjencia e Statistikave të Kosovës, gjatë muajit prill 2026 janë regjistruar gjithsej 2.261 lindje brenda dhe jashtë Kosovës. Nga to, 1.183 janë meshkuj dhe 1.078 femra. Krahasuar me muajin mars 2026, numri i lindjeve ka rënë për rreth 2,3 për qind.

Që nga viti 2022, qeveria e udhëhequr nga kryeministri tash në detyrë, Albin Kurti, ka shpërndarë para te qytetarët në forma të ndryshme përmes Programit për Ringjalljen Ekonomike. Për këtë vit, këtij progami iu ndanë 30 milionë euro nga buxheti shtetëror.

Megjithatë, raportet vjetore financiare tregojnë se, për shembull, vitin e kaluar u shpenzuan më shumë para për masat e këtij programi se që ishte planifikuar.

Disa nga shpenzimet që janë bërë në kuadër të këtij programi, nga pagesat e njëhershme prej 100 eurosh për studentë e deri te shpenzimet për kuponë ushqimesh për familjet në nevojë.

Kjo po ndodh edhe pse Qeveria e Kosovës ka ndarë mbështetje financiare për lindjet, duke ofruar pagesa për fëmijët e porsalindur dhe skema të tjera sociale për familjet.

“Në muajin prill 2026 janë regjistruar 2 261 lindje (brenda dhe jashtë Kosovës). Prej këtyre lindjeve të regjistruara 1 183 lindje janë meshkuj dhe 1 078 lindje janë femra. Në muajin prill 2026 kemi rënie të numrit të lindjeve rreth (2,3%) krahasuar me muajin mars 2026.”

Ndërkohë, gjatë muajit prill janë regjistruar 916 raste të vdekjeve, prej tyre 515 meshkuj dhe 401 femra. Krahasuar me marsin, numri i vdekjeve ka shënuar rënie prej 1,7 për qind.

Në anën tjetër, kurorëzimet kanë shënuar rritje të ndjeshme. Gjatë prillit 2026 janë regjistruar 1.126 kurorëzime, ose 20,8 për qind më shumë se në muajin mars.

Po ashtu, janë regjistruar 111 raste të shkurorëzimeve, që paraqet një rënie prej 16,5 për qind krahasuar me muajin paraprak.

Të dhënat administrative të Agjencisë së Regjistrit Civil tregojnë se, megjithëse më shumë çifte po martohen, kjo ende nuk po reflektohet në rritjen e numrit të lindjeve./Demokracia.com/.