Gjyqtari i procedurës paraprake në Gjykatën Themelore Penale në Shkup, duke vepruar sipas një propozimi nga Prokuroria, urdhëroi paraburgim dhe arrest shtëpiak për dy menaxherët e dyshuar financiarë të SH.A. “Lotaria Shtetërore” për “përvetësim në detyrë”.

Prokuroria Themelore Publike në Shkup dyshon se dy menaxherët financiarë të SH.A. “Lotaria Shtetërore” kanë kryer përvetësim në detyrë si bashkëkryerës, kështu që i gjithë qarkullimi ditor për vitin 2024, i cili u ishte besuar atyre nga pikat e shitjes, nuk ishte paguar dhe depozituar në llogaritë transaksionale të kompanisë në bankat komerciale, por përkundrazi e përvetësuan atë për vete dhe kështu përvetësuan paratë e besuara në detyrë në shumën prej 1.3 milion eurosh.
Ata dyshohen se kanë kryer veprën penale të përvetësimit në detyrë sipas nenit 354, paragrafi 5, në lidhje me paragrafin 3 dhe paragrafin 1 të Kodit Penal.

Sipas Prokurorisë, gjatë vitit 2024, i dyshuari i parë, në detyrën e Drejtorit të Departamentit të Financës dhe Kontabilitetit, dhe i dyshuari i dytë, në detyrën e Shefit të Çështjeve Financiare në Kompaninë Shtetërore të Lotarisë për Organizimin e Lojërave të Fatit, duke ushtruar kompetencat dhe detyrat e tyre të veçanta të përcaktuara me ligj, kanë marrë pjesë së bashku në veprime për të kryer veprën penale të përvetësimit me qëllim përfitimin e dobive pasurore të paligjshme për veten e tyre.

Në Gjykatën Penale në Shkup ka vazhduar procesi ndaj ish-gjyqtarit të Apelit, Gjoko Ristov, ku nëna e tij, Donka Ristova, ka dëshmuar për prejardhjen e 350 mijë eurove të gjetura të fshehura në murin e shtëpisë familjare.
Sipas versionit të saj, paratë ishin kursime familjare të grumbulluara ndër vite dhe shërbenin si siguri financiare për pleqërinë. Mbrojtja këmbëngul se shuma i përkiste prindërve të Ristovit dhe jo ish-gjyqtarit. Më herët, një investitor dëshmoi gjithashtu se Donka Ristova kishte paguar rreth 400 mijë euro për katër banesa, shumë që, sipas dëshmisë së tij, ishte e ndarë nga 350 mijë eurot e gjetura në mur.
Prokuroria, nga ana tjetër, pretendon se paratë e gjetura lidhen me Ristovin dhe se prejardhja e tyre nuk është dëshmuar ligjërisht. Ai akuzohet për përfitim dhe fshehje të kundërligjshme të pasurisë dhe pastrim parash, ndërsa vetë Ristov e ka mohuar fajësinë.

Kryetari i BDI-së, Ali Ahmeti, ka shprehur pikëllimin për ndarjen nga jeta të Nexhadi Lutfisë, i njohur si Nexha, i cili për 25 vite ishte kujdesur për pamjen e tij si berber.

Në mesazhin e tij, Ahmeti kujton se Nexha kishte qenë pranë tij që nga viti 2001 e deri para dy muajsh. Me kalimin e viteve, marrëdhënia e tyre ishte shndërruar në një miqësi të mbështetur në respekt të ndërsjellë.
“Me pikëllim të thellë mora lajmin për ndarjen nga jeta të Nexhadi Lutfisë – Nexhës.

Që nga viti 2001 e deri para dy muajsh, Nexha ka qenë pranë meje në një mënyrë të veçantë. Me duart e tij të shkathëta ka qenë përkujdesësi im për pamjen, por me kalimin e viteve, marrëdhënia jonë u shndërrua në shumë më tepër se kaq, në miqësi dhe respekt.

Gjatë atyre takimeve tona të rregullta, përveç bisedave të zakonshme, kemi diskutuar edhe për zhvillimet politike e shoqërore. Nexha ishte njeri kureshtar, i vëmendshëm dhe me interes të veçantë për atë që ndodhte rreth nesh. Shpesh, në ato biseda të thjeshta, lindnin edhe diskutime të rëndësishme, me pyetje, vërejtje dhe këndvështrime që dëshmonin për një njeri që e ndiqte me shumë interes kohën në të cilën jetonte.

Sot nuk humba vetëm një njeri që për 25 vite kujdesej për pamjen time si berber. Humbëm një mik, një bashkëbisedues dhe një njeri të mirë, prania e të cilit ishte bërë pjesë e përditshmërisë sonë.

Do ta kujtoj gjithmonë me respekt e mirënjohje”, ka shkruar Ahmeti.