Lajme

Adnan Azizi: Pse gjithë ky tërbim nga bashkimi i VLEN-it?

Deputeti i VLEN, Adnan Azizi, ka reaguar ndaj kritikave dhe debatit të krijuar pas bashkimit të VLEN-it në një subjekt të vetëm politik, duke thënë se sulmet po vijnë nga frika e humbjes së “monopolit politik”.

Azizi vlerëson se për herë të parë në historinë politike shqiptare në Maqedoninë e Veriut nuk po ndodh përçarja e një partie në disa pjesë, por bashkimi i pesë subjekteve në një front të përbashkët.

“Sipas tij, në vend që ky bashkim të përshëndetej si pjekuri politike dhe si mundësi për një përfaqësim më të fuqishëm shqiptar, janë shtuar sulmet dhe akuzat për të devijuar vëmendjen nga thelbi i ngjarjes”, thuhet në reagimin e tij.

Duke komentuar debatet për intonimin e himnit të Bashkimit Evropian në kongresin e VLEN-it, Azizi akuzon kundërshtarët për standarde të dyfishta, duke kujtuar se në kongreset e fundit të tyre nuk ishte lëshuar as himni kombëtar shqiptar.
Ai e cilëson reagimin ndaj VLEN-it si “stuhi artificiale patriotizmi”, duke shtuar se patriotizmi nuk matet me një ceremoni të vetme, por me përkushtimin ndaj interesit kombëtar, bashkimit të shqiptarëve dhe perspektivës euro-atlantike.

Në fund, Azizi thekson se ajo që po shqetëson kundërshtarët politikë është fakti se “shqiptarët po bashkohen”, ndërsa sipas tij, ata që kanë përfituar nga përçarja ndihen të rrezikuar nga ky proces./Zyrtare.net

Lajme

Kapet duke vozitur me 203 km/h në Maqedoni, arrestohet shtetasi i Gjermanisë

Policia ka arrestuar sot një shtetas të Gjermanisë, i cili po drejtonte automjetin me shpejtësi prej 203 kilometra në orë në autostradën A1, në afërsi të Gjevgjelisë, njoftoi Ministria e Punëve të Brendshme.

Sipas MPB-së, sot në orën 08:00, në autostradën “Miqësia”, te fshati Miletkovë, policia nga SPB Strumicë – DPB Gjevgjeli e ka privuar nga liria M.F. (46) nga Gjermania. Gjatë kontrollit të trafikut me radar, është konstatuar se ai po drejtonte një automjet të markës BMW, me targa gjermane, me shpejtësi prej 203 km/h, në një pjesë ku shpejtësia e lejuar është 120 km/h.

Nga MPB-ja bëjnë të ditur se për rastin është njoftuar prokurori publik nga Prokuroria Themelore Publike në Gjevgjeli, ndërsa ndaj personit do të ngritet kallëzim përkatës.

MPB-ja apelon te të gjithë drejtuesit e automjeteve që t’i respektojnë rregullat dhe dispozitat e trafikut, veçanërisht kufizimet e shpejtësisë, dhe të mos rrezikojnë jetën e tyre dhe të pjesëmarrësve të tjerë në trafik.

Lajme

“Jetimat e Ballkanit” hapin kuzhinë humanitare në Shkup

Në Shkup është hapur Kuzhina Humanitare “Jetimat e Ballkanit”, e cila do të ofrojë ushqim falas për familjet dhe personat në nevojë, përcjell TV21. Sipas organizatorëve, kjo nismë synon t’u ofrojë ndihmë qytetarëve në nevojë, duke u mundësuar atyre të marrin ushqim në kushte dinjitoze.

“Në qytetin e Shkupit, hapëm Kuzhinën Humanitare ” Jetimat e Ballkanit”, një vend ku familjet në nevojë do të mund të marrin ushqim falas, me dinjitet dhe dashuri. Kjo kuzhinë është një tjetër hap drejt misionit tonë për të qenë pranë atyre që kanë më së shumti nevojë. Faleminderit nga zemra të gjithë atyre që kontribuan, ndihmuan dhe e bënë të mundur hapjen e kësaj kuzhine. Zoti ua shpërbleftë çdo kontribut dhe çdo dorë të shtrirë për të mirën! Bamirës, Zoti kurrë mos ju humbtë!”, thuhet në njoftim.

Lajme

Privohet nga liria 35 vjeçari, kapet me 14,440 euro pa dëshmi prejardhjeje

Një 35-vjeçar nga fshati Buçim i Radovishit është ndaluar nga policia pasi gjatë kontrollit të automjetit të tij janë gjetur 14.440 euro në valuta të ndryshme, për të cilat nuk ka paraqitur dëshmi për prejardhjen.

Sipas Ministrisë së Punëve të Brendshme, më 13 gusht policia ka ndaluar një automjet të tipit “Audi” në rrugën magjistrale Radovish–Shtip, pranë kryqëzimit për fshatin Buçim.

Automjeti drejtohej nga M.V., ndaj të cilit më herët ishte caktuar masa e kujdesit – ndalim për largim nga shtëpia, nën dyshimin për veprën penale të prodhimit dhe shpërndarjes së paautorizuar të drogës.

Gjatë kontrollit, policia ka gjetur 14.440 euro, ndërsa për rastin është njoftuar prokurori publik.

“M.V. nuk ka paraqitur dëshmi për prejardhjen e parave të gjetura”, thuhet në njoftimin e MPB-së.

Më 14 gusht, 35-vjeçari është nxjerrë para gjykatësit në Gjykatën Themelore në Gjevgjeli, i cili i ka caktuar masën e paraburgimit prej 30 ditësh. Pas vendimit, ai është dërguar në Burgun e Shkupit.