Shtetasi serb S.M. (42) u arrestua në Shkup në një aksion të përbashkët të koordinuar nga policia e RMV-së dhe e Serbisë, me dyshimin për përgatitjen e një vrasjeje me pagesë.

Siç raportohet nga mediat serbe, vendndodhja e tij është rezultat i bashkëpunimit operativ afatgjatë dhe shkëmbimit të informacionit midis Shërbimit të Shtypjes së Krimit (ShShK) të Serbisë dhe Ministrisë së Punëve të Brendshme të Maqedonisë.
I dyshuari u gjet në një strehimore në Shkup, ku një bastisje policore zbuloi një arsenal armësh dhe pajisjesh taktike.

Midis sendeve të sekuestruara janë një pistoletë CZ, një thikë ushtarake dhe një uniformë taktike e zezë. Sipas hetimit, 42-vjeçari kaloi ilegalisht kufirin shtetëror, dhe atij iu gjet kartë identiteti serbe e një personi tjetër, të cilën e përdori për identitet të rremë.

Informacionet operative tregojnë se S.M. është i lidhur me një grup të krimit të organizuar dhe se ai mbërriti në Shkup me një detyrë specifike – për të kryer një likuidim.

Institucionet kompetente po vazhdojnë hetimin për të përcaktuar personin që urdhëroi sulmin, motivet dhe bashkëpunëtorët e mundshëm të të dyshuarit.

Duke folur për iniciativë rajonale për energji elektrike, kryeministri Hristijan Mickoski në “Samitin e Maqedonisë”, tha se pas përfundimit të mandatit të tij si kryeministër, planifikon të rikthehet në ushtrimin e detyrës së profesorit universitar, përcjell TV21.

Në lidhje me idenë për nismën rajonale për energjetikë, Mickoski tha se në këtë mënyrë , të gjitha 6 shtete e Ballkanit Perëndimor, do të futeshin në llupën e investitorëve të mëdhenj.

“Unë nuk jam politikan profesionist, siç thatë ju. Unë jam inxhinier, supozoj që në fund të këtij mandati, do të rikthehem në mesin e studentëve në fakultet, për dallim të një numri të madh të kolegëve të mi, liderë të shteteve dhe kryeministra në rajon. Dhe vlerësoj se diçka duhet të lëmë në rajon, që do të jetë iniciativë rajonale”, tha mes tjerash Mickoski.

Finalizimi i pjesës perëndimore të Korridorit 8 pritet të shtyhet të paktën deri në dhjetor të vitit 2029, pasi inxhinieri mbikëqyrës ka kërkuar zyrtarisht zgjatje të afatit për përfundimin e projektit.

Lajmin e bëri të ditur zëvendëskryeministri dhe ministri i Transportit, Aleksandar Nikolloski, gjatë vizitës në punimet e autostradës Tetovë-Gostivar dhe Gostivar-Bukojçani, së bashku me kryeministrin Hristijan Mickoski dhe drejtorin e NP “Rrugë Shtetërore”, Koce Trajanovski.

Sipas Nikolloskit, kërkesa për shtyrje vjen si pasojë e dy viteve të humbura, për të cilat ai fajësoi qeverinë e kaluar, duke thënë se në atë periudhë nuk ishte bërë pothuajse asgjë për përgatitjen e terrenit dhe krijimin e kushteve për ndërtim. Ai theksoi se kjo nuk është vetëm vlerësim politik, por konstatim i përfshirë edhe në raportin zyrtar të inxhinierit mbikëqyrës, i cili ka kërkuar shtyrje minimale prej dy vitesh për të kompensuar vonesat.

“Pjesa e dytë, për fat të keq, duhet të them se qeveria e kaluar për dy vite nuk kishte bërë asgjë. Kjo nuk është vetëm deklaratë e imja apo e kryeministrit apo e drejtorit të NPRRSH-së. Për këtë në muajin nëntor kemi marrë njoftim zyrtar nga inxhinieri mbikëqyrës, i cili kërkoi zgjatje të afatit për përfundimin e projektit për të paktën dy vite, sepse duhej të kompensoheshin ato dy vite të humbura nga qeveria e mëparshme dhe ne nuk kemi zgjidhje tjetër përveç ta bëjmë këtë, kështu që afati do të shkojë të paktën deri në dhjetor 2029, gjë që nuk do të thotë se projekti nuk do të përfundojë edhe më herët”, tha Nikolloski.

Sipaa tij, gjitha sfidat në trasenë po zgjidhen me koordinim të mirë mes institucioneve, ndërsa Qeveria i ka mundësuar operatorit një front të hapur pune në të gjithë trasenë.

“Ne shpesh flasim për këto projekte në paraqitjet tona publike, në konferenca për shtyp, në intervista, ja tani të shihen në terren. Tashmë e kemi kaluar një seksion, autostradën nga Tetova deri në Gostivar, në publik është krijuar perceptimi se është autostradë, por në fakt është rrugë ekspres dhe për herë të parë në këtë segment do të ndërtohet autostradë. Seksioni i dytë është ky ku jemi tani. Diçka që për shumëkënd ishte e paimagjinueshme, që ndonjëherë do të ketë autostradë që e anashkalon Strazhën dhe pjesën më të vështirë të lidhjes me Ohër dhe Strugë dhe gjithë Korridorin 8. Këtu para nesh shihet se po punohet intensivisht në ura, në hapjen e trasesë së autostradës, në skarpata, vërtet po kryhen punë të jashtëzakonshme inxhinierike. Si Qeveri po bëjmë gjithçka që t’u mundësojmë kompanive ndërtuese të përfundojnë sa më shpejt projektet dhe qytetarët t’i përdorin ato. Kjo është shumë e rëndësishme edhe për PBB-në, jam krenar që në tremujorin e tretë të vitit të kaluar rritja në ndërtimtari ishte 21%, ndërsa në të katërtin 16.7%. Presim rezultate të mira edhe për tremujorin e parë të këtij viti dhe vazhdimësi në periudhën e ardhshme”, theksoi zëvendëskryeministri Nikolloski.

Ai potencoi tre sfida në ndërtimin e këtyre segmenteve. E para lidhet me dislokimin e rrjeteve telekomunikuese ndërkombëtare dhe vendore, instalimeve elektrike dhe furnizimit me ujë për Pollogun.