Sport

Futbollistët e Afrikës së Jugut u shpërblyen me një çmim që nuk mund ta kishin imagjinuar për barazimit ndaj Çekisë në Kupën e Botës

Kombëtarja e Afrikës së Jugut u gjend në qendër të vëmendjes së publikut sportiv botëror, por këtë herë jo drejtpërdrejt për shkak të asaj që ndodhi në fushën e blertë, por për shkak të skenave të pabesueshme që pasuan në dhomën e zhveshjes pas ndeshjes.

Pasi arriti të barazonte kundër Republikës Çeke me rezultat 1-1 në Kupën e Botës, kombëtarja e vendit afrikan mori një bonus të pazakontë dhe jashtëzakonisht të vlefshëm.

Sipas informacionit ekskluziv të publikuar nga kanali sportiv The Touchline, drejtuesit e federatës vendosën t’i shpërblejnë me madhështi futbollistët për këtë rezultat.

Lojtarët morën dhurata si bizhuteri luksoze dhe orë të shtrenjta me vlerë mbi 50,000 dollarë secila.

“Lojtarët e Afrikës së Jugut u shpërblyen me bizhuteri dhe ora luksoze me vlerë mbi 50,000 dollarë, pasi siguruan një barazim kundër Republikës Çeke në Kupën e Botës. Dhuratat u dhanë si bonus për performancën e ekipit”, thuhej në postim, i cili u bë shpejt viral.

Fotot që qarkullojnë në rrjetet sociale tregojnë momentin kur ekipit iu soll një valixhe plot me ora elitare, e cila, nga sa duket, përfshinte modele nga marka prestigjioze si Rolex.

Futbollistët e Afrikës së Jugut nuk e fshehën kënaqësinë dhe mosbesimin e tyre ndërsa morën aksesorët e tyre të rinj dhe të shtrenjtë të modës.

Ndërsa shumica e federatave të futbollit praktikojnë pagesën e bonuseve monetare vetëm pasi kalojnë fazën e grupeve ose arrijnë në fund të turneut, afrikanojugorët kanë treguar se dinë vërtet ta vlerësojnë dhe shpërblejnë shpirtin luftarak dhe një pikë të fituar kundër një skuadre të favorizuar evropiane, dhe pyetja e vërtetë është se çfarë do të merrnin në rast fitoreje ose kalimi.

Afrika e Jugut ka një pikë pas dy raundeve në Grupin A dhe i duhet një fitore në raundin e fundit kundër Koresë së Jugut për të avancuar më tej.

Lajme

Ardian Cuculi e mbyll kapitullin si drejtor sportiv i Shkëndijës

Pas tre viteve në pozitën e Drejtorit Sportiv, Ardian Cuculi përfundon angazhimin e tij te Shkëndija, njofton klubi kuqezi.

Pas përfundimit të angazhimit të Ardian Cuculit në pozitën e Drejtorit Sportiv, mbyllet një tjetër kapitull në rrugëtimin e tij të gjatë me klubin kuqezi.

Ish-kapiteni dhe një prej emrave që ka dhënë kontribut të madh për Shkëndijën në periudha të ndryshme, Cuculi përfundoi karrierën e tij si futbollist pikërisht me ngjyrat kuqezi, për të vazhduar më pas për tre vite në pozitën e Drejtorit Sportiv, duke qenë pjesë e sukseseve historike.

Klubi tetovar e falënderon Ardian Cuculin për punën, përkushtimin dhe kontributin e dhënë gjatë gjithë viteve në Shkëndijë, duke i uruar shëndet, suksese dhe çdo të mirë në të ardhmen.

Sport

Indrit Çullhaj shpallet Kampion i Ballkanit, ngre sërish flamurin kuqezi në majën e podiumit

Xhudisti shqiptar Indrit Çullhaj ka shkruar një tjetër kapitull të artë në sportin shqiptar, duke u shpallur Kampion i Ballkanit pas një paraqitjeje mbresëlënëse në Kampionatin Ballkanik.

Çullhaj dominoi garën nga fillimi deri në fund, duke mposhtur radhazi kundërshtarët nga Kosova, Rumania dhe Greqia, ndërsa në finalen e madhe triumfoi ndaj përfaqësuesit të Malit të Zi, duke fituar me meritë medaljen e artë në kategorinë e tij.

Pas këtij suksesi të jashtëzakonshëm, kampioni shqiptar shprehu mirënjohjen për familjen e tij, Federatën Shqiptare të Xhudos, trajnerët dhe të gjithë ata që e kanë mbështetur gjatë rrugëtimit drejt këtij triumfi.

Kjo medalje e artë shënon një tjetër arritje historike për Çullhajn, i cili bëri që flamuri kuqezi të ngrihej për herë të katërt falë medaljeve të fituara prej tij në Kampionatet Ballkanike, duke konfirmuar edhe një herë se është një nga xhudistët më të suksesshëm që ka përfaqësuar Shqipërinë në arenën ndërkombëtare.

Triumfi i Indrit Çullhajt përfaqëson jo vetëm një sukses personal, por edhe një krenari të madhe për sportin shqiptar, duke dëshmuar se puna, përkushtimi dhe sakrifica shpërblehen me rezultate në skenën ndërkombëtare.

Sport

Shqiptari që mahniti Bayernin, Arijon shkëlqen me dy gola e tri asistime

19-vjeçari spikati në fitoren 15:0 ndaj Rottach-Egern, ndërsa Kosova vazhdon përpjekjet për ta bindur ta veshë fanellën dardane, transmeton albinfo.ch.

Talenti shqiptar Arijon Ibrahimoviç ka dhuruar një paraqitje mbresëlënëse në ndeshjen miqësore të Bayern Munich, duke qenë një nga lojtarët më të dalluar në fitoren e thellë 15:0 ndaj Rottach-Egern.

19-vjeçari realizoi dy gola dhe dhuroi tri asistime, duke konfirmuar potencialin e tij të madh dhe duke lënë përshtypje të shkëlqyera edhe te trajneri Vincent Kompany.

Paraqitja e tij ka forcuar bindjen se Ibrahimoviç është një nga talentët më premtues shqiptarë në futbollin evropian dhe se e ardhmja e tij mund të jetë në nivelet më të larta të futbollit.

Ndërkohë, Federata e Futbollit e Kosovës vazhdon kontaktet me lojtarin dhe familjen e tij, me synimin që ai në të ardhmen të zgjedhë ta përfaqësojë Kosovën në arenën ndërkombëtare.

Me formën që po tregon te Bayerni, Arijon Ibrahimoviç shihet si një futbollist me potencial për t’u shndërruar në një nga yjet e së ardhmes së futbollit evropian./Albinfo.ch