Lajme

Doktoresha zbulon çfarë pa në klasë pas tragjedisë në “Ribnikar” – rrëfim tronditës nga vendi i ngjarjes

Doktoresha Ivana Stefanoviq nga Ndihma e Shpejtë Mjekësore ka ndarë përvojën e saj tronditëse nga dita kur ndodhi tragjedia në shkollën fillore “Vladislav Ribnikar”.

Ajo tregon se mëngjesi nisi në mënyrë të pazakontë, kur gjatë një takimi pune mori një telefonatë nga vajza e saj. Duke e ditur se vajza nuk do ta telefononte kurrë pa një arsye serioze, ajo u përgjigj menjëherë. Vajza i tha se në shkollë kishte një vajzë të plagosur dhe kërkoi që urgjentisht të dërgohej një ekip mjekësor.

Në atë moment, kolegët e saj tashmë kishin marrë informacione për një incident të rëndë dhe disa automjete ishin nisur drejt shkollës. Stefanoviq, me ekipin e parë të disponueshëm, u nis menjëherë në terren, e bindur se bëhej fjalë për një incident më të vogël.

Por, sapo mbërriti, u përball me një pamje krejt tjetër. E udhëhequr nga një mësues, ajo hyri në një pjesë të shkollës ku u përball me skena që nuk do t’i harrojë kurrë. Në një nga klasat vuri re një vajzë që ende jepte shenja jete, pas çka bashkë me kolegët filluan menjëherë t’i japin ndihmën e parë. Pak më vonë u konstatua se edhe një mësuese ishte gjallë dhe edhe ajo u trajtua menjëherë.

Fatkeqësisht, për të tjerët që ndodheshin në atë hapësirë, ekipet mjekësore nuk mundën të bënin më asgjë. Doktoresha thotë se për një kohë të gjatë nuk mund ta pranonte atë që kishte ndodhur në të vërtetë, duke kontrolluar vazhdimisht nëse ekzistonte mundësia të shpëtohej edhe ndonjë jetë tjetër.

Ajo theksoi se të gjitha shërbimet reaguan jashtëzakonisht shpejt dhe në mënyrë profesionale, duke vënë në pah përkushtimin e ekipeve mjekësore që atë ditë u angazhuan në një nga tragjeditë më të rënda të historisë së re të rajonit.

Lajme

U kap me 1 milion € në Merdare, kush është personi që arriti të arsyetoj paratë?

Shtetasi gjerman, i dyshuar për 1 milion euro të padeklaruara kur kishte hyrë në Kosovë nga Merdarja, është paraqitur dje për intervistim në Policinë e Kosovës.

Ai është arrestuar dhe është dërguar në mbajtje meqë pasi kishte pranuar se paratë e gjetura në automjetin e tij ishin të tijat, s’kishte arritur të dëshmonte prejardhjen e tyre.

Policia në raportin e saj 24-orësh e ka cilësuar veprën penale si “Pjesëmarrje ose organizim i grupit kriminal të organizuar”.

Më 24 shkurt 2026, në pikën kufitare në Merdarë, autoritetet zbuluan rreth 1 milion euro të fshehura brenda një automjeti tip Mercedes Sprinter me targa të Shqipërisë që po hynte nga Serbia.

Një skaner që i ishte dhuruar Kosovës nga SHBA kishte zbuluar paratë në automjetin që po kalonte nëpër pikë kufitare.

Raporti i policisë:

Gjermani – Kosovë 24.02.2026 – NN. Më 23.10.2026 në PSRK është paraqitur për intervistim i dyshuari mashkull shtetas i Gjermanisë, për shkak se me 24.02.2026 në vendkalimin kufitar në Merdare në automjetin me targa të Shqipërisë në një hapësirë të modifikuar brenda në automjet, janë gjetur dhe sekuestruar 1.000.000 (një milion) euro. I dyshuari gjatë intervistimit ka pranuar se paratë e konfiskuara kanë qenë të tij, por nuk ka arritur të dëshmojë prejardhjen e parave dhe lidhjen me personat e dyshuar që kanë bërë transportin e tyre. I dyshuari është arrestuar dhe me vendim të prokurorit është dërguar në mbajtje.

Lajme

Kumanovari dhuron 26 mijë euro për rrugën që mundëson qasjen në xhaminë më të vjetër në rajon

Husejn Bajrami, djali i të ndjerit hoxhë Nexhmedin Bajrami nga Kumanova, ka financuar blerjen e rrugës që mundëson qasjen në Xhaminë “Koxha Mehmed Beu” në fshatin Tabanoc.

Marrëveshja për blerjen u nënshkrua më 19 tetor 2026, në prani të myftiut të Kumanovës, h. Abedin ef. Imeri, dhe anëtarëve të familjes Selmani nga Llojani.

Rruga ka një sipërfaqe prej 529 metrash katrorë, me gjerësi prej shtatë metrash, ndërsa vlera e blerjes arrin në 26.450 euro, shumë e paguar nga Husejn Bajrami.

Muftinia e Kumanovës e falënderoi z.Bajrami për këtë kontribut, si dhe familjen Selmani për bashkëpunimin, duke shprehur lutjen që kjo vepër të pranohet si sadaka dhe të shpërblehet me të mira.

Lajme

Të dielën nis ora dimërore, akrepat lëvizin një orë prapa

Ora verore këtë vit përfundon të dielën, më 25 tetor në orën 3:00 të mëngjesit duke u zhvendosur një orë prapa.

Në vitin 2018, Komisioni Evropian shqyrtoi heqjen e ndërrimit të kohës sezonale dhe më pas zhvilloi një konsultim publik në të cilin morën pjesë rreth 4.6 milionë njerëz.

Megjithatë, ndonëse 84 përqind e të anketuarve ishin në favor të heqjes së tij, anëtarët nuk arritën të arrinin një marrëveshje se cila kohë do të ishte e përhershme, kështu që propozimi nuk u zbatua.

Vendet e BE-së ende kalojnë në orën e verës në pranverë dhe në orën e dimrit në vjeshtë.

Në Azi, Kina, India, Japonia, Koreja e Jugut, Tailanda, Vietnami, Indonezia, Malajzia dhe Singapori nuk e përdorin kohën e kursimit të verës.

Kina e hoqi orën e verës në vitin 1991.

Në Lindjen e Mesme , Arabia Saudite, Emiratet e Bashkuara Arabe, Katari, Kuvajti dhe Bahreini nuk e ndryshojnë orën gjatë vitit.

Irani e hoqi ndërrimin sezonal të orës në vitin 2022, dhe që nga viti 2023 nuk e ndryshon më kohën midis verës dhe dimrit.

Në Amerikën e Jugut , Brazili, Argjentina, Kolumbia, Peruja dhe Ekuadori nuk e përdorin kohën sezonale.

Në Australi, rregullat ndryshojnë sipas shtetit. Uellsi i Ri Jugor, Viktoria, Australia Jugore, Tasmania dhe Territori i Kryeqytetit Australian po kalojnë në orën verore, ndërsa Queensland, Australia Perëndimore dhe Territori Verior nuk e ndryshojnë orën, raportoi portali Maariv.

Ndër arsyet për heqjen e ndërrimit të kohës sezonale janë funksionimi më i thjeshtë i jetës së përditshme , shmangia e problemeve në sistemet kompjuterike, transportin dhe biznesin, si dhe fakti që në vendet pranë ekuatorit, gjatësia e ditës nuk ndryshon ndjeshëm gjatë vitit.