Kryetari i Aleancës për Shqiptarët, Arben Taravari, ka deklaruar se rikthimi i mundshëm i partisë së tij në Qeveri mund të ndodhë vetëm nëse ka një marrëveshje të re politike, e cila do të përfshinte garanca për nisjen e negociatave me Bashkimin Evropian dhe për ndryshimet kushtetuese.

I pyetur në emisionin “Debat në Shenja” nëse ASH mund të rikthehet në ekzekutiv, Taravari tha se do të ishte nënçmuese të kthehej aty prej nga ka dalë, por nuk e përjashtoi plotësisht një skenar të tillë.

“Vetëm me një marrëveshje të re, në të cilën do të kishte së paku garanca për fillimin e negociatave me BE-në dhe ndryshimet kushtetuese, edhe mund të diskutohet. Në të kundërtën, nuk ka çfarë të diskutohet”, deklaroi Taravari.

Duke komentuar protestën e mbajtur në Gostivar, ku qytetarë të revoltuar kërkuan ujë të pijshëm dhe u dëmtuan edhe xhamat e objektit të komunës, Taravari tha se bëhet fjalë për tentativë për defokusim të opinionit publik, në një kohë kur, sipas tij, komuna është duke realizuar rreth 20 projekte paralelisht.

Ai shtoi se nuk mund të akuzojë drejtpërdrejt BDI-në për organizimin e protestës, por la të kuptohet se pas saj qëndrojnë persona të afërt me VLEN-in.

Taravari shkoi edhe më tej, duke pretenduar se në protestë kanë marrë pjesë edhe persona që, sipas tij, njihen në Gostivar si përdorues të narkotikëve.

Në intervistë, kreu i ASH-së sulmoi edhe koalicionin VLEN, për të cilin tha se “nuk pyetet për asgjë” në qeverisje dhe se nuk ka informata për zhvillimet politike.

“S’janë fare aty, nuk kanë informata se çfarë ndodh. Mund vetëm të sulmojnë”, tha Taravari, duke shtuar se VLEN-i nuk ka fuqi reale vendimmarrëse.

Ai foli edhe për raportet e brendshme në VLEN, duke thënë se sipas përshtypjes së tij, figurat kryesore në këtë subjekt janë Izet Mexhiti dhe Adnan Azizi, ndërsa Bilall Kasami është më shumë i fokusuar në drejtimin e Komunës së Tetovës.

Sipas Taravarit, përplasja e ardhshme politike brenda VLEN-it mund të ndodhë mes grupacionit të Besës dhe atij të LD-së, ndërsa Alternativa, siç u shpreh ai, praktikisht është shkrirë.

Në fund, ai komentoi edhe rolin e Bekim Qokut, për të cilin tha se është përfaqësues i Vetëvendosjes dhe i Albin Kurtit në Maqedoninë e Veriut, duke shtuar se VLEN-i e përdor atë si figurë të ekspozuar politike.

Kryetari i Komunës së Tetovës, Bilall Kasami, ka pritur sot në një takim zyrtar ish-ministrin e Punëve të Jashtme të Turqisë, Mevlüt Çavuşoğlu. Ky takim u vlerësua si një moment i veçantë, duke konfirmuar lidhjet e ngushta mes dy vendeve.

Diskutime për zhvillimin ekonomik Gjatë bisedimeve, fokusi kryesor ishte forcimi i bashkëpunimit dypalësh. Kasami dhe Çavuşoğlu diskutuan mbi mundësitë konkrete për të intensifikuar marrëdhëniet, me theks të veçantë në projekte që do t’i shërbejnë zhvillimit ekonomik dhe progresit të përgjithshëm të rajonit.

Vlerësim për miqësinë historike Kryetari Kasami e përshëndeti z. Çavuşoğlu si një mik të madh të shqiptarëve, duke shprehur nder dhe kënaqësi për vizitën e tij në Tetovë. Ky takim rikonfirmon përkushtimin e vazhdueshëm për të ndërtuar ura bashkëpunimi që sjellin përfitime të ndërsjella dhe stabilitet në zhvillimin e mëtejshëm.

Në kuadër të shënimit të 10-vjetorit të themelimit të Fondi Humanitar Trieshi dhe aktivitetit për mbledhjen e fondeve, ndër të pranishmit në këtë mbrëmje të veçantë humanitare ishte edhe drejtori i Shkollës Shqipe, Agron Dedivanaj.

Pjesëmarrja e tij në këtë organizim u vlerësua si një mbështetje e rëndësishme për aktivitetet humanitare dhe për forcimin e bashkëpunimit ndërmjet institucioneve dhe organizatave të komunitetit shqiptar në diasporë. Gjatë mbrëmjes u theksua rëndësia e ruajtjes së vlerave kombëtare, edukimit të brezave të rinj dhe kultivimit të frymës së solidaritetit që karakterizon komunitetin tonë.

Mbrëmja u zhvillua në një atmosferë vëllazërore dhe festive, duke bashkuar bashkëvendës, miq, veprimtarë dhe donatorë të shumtë, të cilët kontribuuan në mbështetjen e kauzave humanitare të fondit. Në këtë përvjetor të rëndësishëm u vlerësua puna dhe përkushtimi i të gjithë atyre që gjatë një dekade kanë ndihmuar në realizimin e misionit humanitar të fondit.

Prania e drejtorit Agron Dedivanaj dëshmoi edhe një herë gatishmërinë për të mbështetur nisma që forcojnë unitetin, bashkëpunimin dhe ndihmën reciproke brenda komunitetit shqiptar.

Në fund të mbrëmjes, organizatorët shprehën mirënjohjen e tyre për të gjithë pjesëmarrësit dhe mbështetësit, duke theksuar se suksesi i këtij aktiviteti është rezultat i përkushtimit dhe solidaritetit të përbashkët.

Ja postimi plotë:

Me një pjesëmarrje të gjerë dhe atmosferë të ngrohtë vëllazërore, u zhvillua me shumë sukses mbrëmja humanitare kushtuar mbledhjes së fondeve dhe shënimit të 10-vjetorit të themelimit të “Fondit Humanitar Trieshi” në Miçigen.

Ky manifestim mblodhi bashkë bashkëvendës, miq, veprimtarë dhe donatorë të shumtë, të cilët me praninë dhe kontributin e tyre dëshmuan edhe një herë shpirtin e solidaritetit, humanizmit dhe përkushtimit ndaj kauzave të përbashkëta. Gjatë mbrëmjes u kujtuan rrugëtimi dhe aktivitetet e fondit ndër vite, duke vlerësuar punën e palodhshme të të gjithë atyre që kanë kontribuar në themelimin, zhvillimin dhe forcimin e kësaj organizate humanitare.

Dhjetë vite aktivitet janë një dëshmi e qartë e suksesit dhe besimit që komuniteti i Trieshit ka ndërtuar përmes veprave konkrete humanitare, duke ndihmuar familje në nevojë, studentë, projekte komunitare dhe shumë iniciativa të tjera me rëndësi shoqërore.

Në emër të Fondit Humanitar Trieshi, shprehim mirënjohjen më të sinqertë për të gjithë pjesëmarrësit, sponsorët dhe donatorët që mbështetën këtë mbrëmje dhe kontribuan në realizimin e objektivave tona humanitare. Kontributi i secilit është një vlerë e çmuar dhe një investim i drejtpërdrejtë në forcimin e solidaritetit dhe ndihmës ndaj atyre që kanë nevojë.

Pas përfundimit të procesit të administrimit dhe verifikimit nga ana e arkëtarëve, me përpikëri dhe transparencë të plotë do të bëhet publikimi i shumës së përgjithshme të fondeve të grumbulluara, si dhe evidentimi i të gjithë donatorëve që kontribuuan në këtë aktivitet. Në këtë mënyrë do të sigurohet një pasqyrë e saktë dhe e plotë e rezultateve të kësaj mbrëmjeje të suksesshme humanitare.

Edhe një herë, falënderojmë të gjithë ata që me praninë, mbështetjen dhe bujarinë e tyre kontribuuan në suksesin e kësaj ngjarjeje të veçantë. Së bashku vazhdojmë misionin tonë humanitar, duke ruajtur vlerat e unitetit, solidaritetit dhe ndihmës ndaj njëri-tjetrit.