Lajme

Valë e madhe e të nxehtit në Evropë, Gjermania dhe Hungaria më të prekurat

Të paktën 193 milionë njerëz në Evropë, përfshirë 75 milionë në Gjermani, pritet të përjetojnë temperatura mbi 35 gradë Celsius në një moment të caktuar sot, sipas llogaritjeve të AFP. Kjo është një rritje nga dje, ndërsa vala e të nxehtit lëviz gradualisht drejt verilindjes së kontinentit.

Në përgjithësi, temperaturat maksimale pritet të kalojnë 30°C në zonat e Evropës ku jetojnë më shumë se 404 milionë banorë, pak më të ulëta se një ditë më parë. Kjo analizë, bazuar në parashikimet nga Shërbimi Meteorologjik Gjerman dhe parashikimet e popullsisë për vitin 2025 nga Qendra e Përbashkët e Kërkimit, është në përputhje me të dhënat nga OJQ-ja austriake Klimadashboard.

Dje, një model moti i llogaritur në orën 3:00 GMT parashikoi se 150 milionë njerëz do të ekspozoheshin ndaj temperaturave mbi 35°C.

Ndër zonat më të prekura nga temperaturat jashtëzakonisht të larta të shtunën është Gjermania, ku rreth 82 milionë njerëz pritet të ekspozohen ndaj temperaturave mbi 30 gradë Celsius, nga të cilët 75 milionë do të duhet të përballen me temperatura mbi 35°C.

Në Hungari, pothuajse i gjithë vendi do të ekspozohet ndaj temperaturave mbi 35°C të shtunën, duke prekur më shumë se 9 milionë banorë, transmeton Klankosova.tv

Vala e të nxehtit preku edhe një pjesë të madhe të Austrisë, përfshirë kryeqytetin Vjenë, Republikën Çeke, veçanërisht Pragën, dhe pjesë të mëdha të Polonisë.

Temperaturat do të kalojnë 30°C në pjesën më të madhe të Kontinentit të Vjetër, nga Greqia dhe Italia në Danimarkë dhe në majën jugore të Suedisë, megjithëse kushtet në Londër, Portugali dhe pjesë të Spanjës pritet të mbeten relativisht të pandryshuara.

Parashikuesit e motit në Francë presin që temperaturat të kalojnë 35°C në një zonë me rreth 26 milionë banorë, më pak se një ditë më parë.

Për të përcaktuar këto të dhëna, AFP përdori një metodë të ngjashme me atë të organizatës Klimadashboard, duke kombinuar një model parashikimi të motit nga Deutscher Wetterdienst (DWD), shërbimi meteorologjik gjerman, me dendësinë e popullsisë.

Duke qenë se saktësia e atij modeli është afërsisht 6.5 km, ai nuk mund ta pasqyrojë plotësisht gjendjen e ishujve të nxehtësisë urbane, tha për AFP-në David Jablonski i organizatës joqeveritare Klimadashboard.

Prandaj, analiza “me shumë mundësi nënvlerëson numrin e njerëzve të prekur nga temperaturat e larta në zonat urbane me popullsi të dendur”, thuhet në faqen e internetit të European Heat Tracker.

Lajme

VLEN: Nacionalizmi serbomadh i Gjurgjeviqit dhe Stoilkoviqit nuk ka vend në Maqedoninë e Veriut

VLEN nëpërmjet një komumikate i kanë reaguar ministres për Punë Sociale të Serbisë, Milica Gjurgjeviq Stamenovski për deklaratat e saj për betejën e Kumanovës të cilën ajo e paraqiti si përmbushje e “betimit të Kosovës”.

“Deklaratat e ministres serbe Milica Gjurgjeviq Stamenkovski në Zebërnjak, ku beteja e Kumanovës paraqitet si përmbushje e “betimit të Kosovës”, janë provokim i rëndë politik dhe përpjekje për promovimin e miteve dhe narrativave nacionaliste serbe në vendin tonë. Politika zyrtare e Beogradit duhet njëherë e mirë të heqë dorë nga mendësia hegjemoniste. Kjo është e njëjta mendësi që ka shkaktuar katër luftëra dhe qindra mijëra viktima në Ballkan dhe destabilitet të vazhdueshëm në rajon. Edhe më skandaloze është pjesëmarrja e ministrit Ivan Stoilkoviq, i cili në vend që të mbrojë interesat dhe dinjitetin e shtetit ku ushtron detyrën, bëhet pjesë e manifestimeve që shërbejnë për afirmimin e agjendave nacionaliste të një shteti tjetër. Maqedonia e Veriut nuk do të jetë kurrë platformë për pretendime historike e politike të Serbisë! VLEN kundërshton fuqishëm çdo përpjekje për ta shndërruar historinë në instrument të nacionalizmit. Nuk do të heshtim përballë provokimeve të tilla dhe nuk do të lejojmë që shteti ynë të shndërrohet në skenë për projekte nacionaliste që i përkasin të kaluarës”, thuhet në komunikatën e VLEN-it.(INA)

Lajme

Ulen çmimet e derivateve të naftës në Maqedoni

Komisioni Rregullator i Energjetikës, i Shërbimeve të Ujit dhe i Shërbimeve të Menaxhimit me Mbeturina Komunale i Republikës së Maqedonisë së Veriut (KRRE) solli vendimin, me të cilin bëhet ulja e çmimeve të shitjes me pakicë të derivateve të naftës mesatarisht 1,89% në raport me vendimin e datës 19.10.2026.

Çmimet e shitjes me pakicë të benzinës EUROSUPER BS-95 dhe EUROSUPER BS-98 ulen për 5,00 den/litër.

Çmimi i shitjes me pakicë i ЕURODIZELIT (D-Е V) nuk ndryshon.

Çmimi i shitjes me pakicë i Vajit Ekstra të Lehtë për Amvisëri (ЕL-1) ulet për 0,50 den/litër.

Çmimi i shitjes me pakicë i Мazutit М-1 SU rritet për 0,694 den/kg dhe tani do të jetë 54,273 den/kg.

Nga data 27.10.2026, nga ora 00:01, çmimet maksimale të derivateve të naftës do të jenë:

EUROSUPER BS – 95 do të shitet për 91,00 (denarë/litër)

EUROSUPER BS – 98 do të shitet për 93,00 (denarë/litër)

EURODIZEL BS (D-E V) do të shitet për 99,00 (denarë/litër)

Vaj për Djegie Ekstra i Lehtë 1 (EL-1) do të shitet për 110,00 (denarë/litër)

Mazut М-1 SU do të shitet për 54,273 (denarë/kilogram).

Lajme

Filipçe, Mickoskit: Shpalli vetë zgjedhjet, ne nuk të bëhemi alibi!

Kryetari i LSDM-së, Venko Filipçe sot e përsëriti qëndrimin e tij për shpalljen e zgjedhjeve të parakohshme parlamentare në vend dhe siç tha nuk do të jenë alibi i kryeministrit Hristijan Mickoski për shpalljen e zgjedhjeve.

“Ne e kemi thënë dhe do ta përsëris qëndrimin tonë, nuk do të jemi alibi për Hristijanin për zgjedhje, ai ka shumicën prej dy të tretash, le t’i shpallë zgjedhjet. Po presim që ai të japë rezultate, të japë një standard më të mirë, një jetë më të mirë, kjo është ajo që premtoi. Kushte më të mira në shkolla, në spitale, për fermerët, për pensionistët, një jetë më të mirë për punëtorët, nuk ka asgjë nga kjo. Pozicione më të mira negociuese, nuk ka asgjë, lufta kundër korrupsionit, krimit, nuk ka asgjë”, thotë Filipçe.

Ai theksoi se korrupsioni po lulëzon, e përmendi edhe rastin me Lotarinë Shtetërore dhe Artan Grubin, si dhe se 3.000 familje të reja me fëmijët e tyre janë shpërngulur, dhe tani janë 3.000 nxënës të klasës së parë më pak.

I pyetur nëse anëtarët e “Platformës 12.05” ishin të ftuar në bisedime, Filipçe u përgjigj se të gjithë janë të blerë nga qeveria dhe punojnë për interesat e saj. Lideri i LSDM-së theksoi se anëtarët e Platformës ishin të ftuar, dhe siç tha ai, ata ende janë të ftuar të vijnë dhe të bisedojnë.

Ai vuri re se në këtë mënyrë, ndërsa siç tha ata njerëz po punonin për një agjendë tradhtare.

“Sa të mjerë duhet të jenë këta njerëz që të punojnë për një agjendë kaq të pabesë? Absolutisht, nuk do t’ia dalin mbanë. Të gjithë janë blerë nga qeveria dhe po punojnë për interesat e saj”, thotë Filipçe.