‘Dialogu i hapur për temat kryesore është e vetmja mënyrë për të ndërtuar besim’, porositi ministri i Mjedisit Jetësor dhe Planifikimit Hapësinor, Muamet Hoxha, pas përfundimit të debatit të sotëm publik për ripërtëritjen e Lejes së Integruar-A për çimentoren Titan-USJE.

Ministri Hoxha shprehu falënderim ndaj qytetarëve, aktivistëve ekologjikë, ekspertëve, mediave, përfaqësuesve të institucioneve dhe të kompanisë për pjesëmarrjen e tyre aktive në këtë proces.

„Për të mos pasur dilema të mëtejme, dëshiroj të porosis qartë: Si Ministri e Mjedisit Jetësor dhe Planifikimit Hapësinor, jemi angazhuar fuqishëm që leja e ripërtërirë për ‘Usje’-n të hartohet sipas kushteve të Ligjit të ri për Emetimet Industriale, i cili hyn në fuqi në shtator të vitit 2027“, potencoi Hoxha. 

Me hyrjen në fuqi të këtij ligji, do të vlejnë rregulla më strikte dhe njëlloj për të gjithë subjektet industriale.

Sipas Hoxhës, qëllimi përfundimtar i Ministrisë së Mjedisit nuk janë kompromiset e përkohshme, por zgjidhjet afatgjata për mbrojtjen e ajrit dhe mjedisit jetësor. 

‘Vazhdojmë tutje, drejt standardeve më të larta evropiane për mbrojtjen e mjedisit. E kjo arrihet më së miri me transparencë dhe përmes një procesi të dialogut, bashkëpunimit dhe me përgjegjësi më të madhe nga të gjithë palët e përfshira, në interes të qytetarëve’, theksoi Hoxha.

Zëvendësministri Admir Shabani mori pjesë në prezantimin e pajisjeve të reja për Armatën e Republikës së Maqedonisë së Veriut, të siguruara përmes Fondit Evropian të Paqes.

Gjatë këtij prezantimi u theksua se këto pajisje përfaqësojnë një mbështetje të rëndësishme për forcimin e kapaciteteve ushtarake dhe rritjen e gatishmërisë operative të Armatës, duke mundësuar pjesëmarrje më efikase në misione dhe operacione ndërkombëtare në kuadër të politikave të përbashkëta të sigurisë dhe mbrojtjes së Bashkimit Evropian.

Zëvendësministri Shabani vlerësoi se ky investim është një dëshmi e qartë e partneritetit të fortë dhe bashkëpunimit të vazhdueshëm mes vendit dhe BE-së në fushën e sigurisë dhe mbrojtjes.

“Përmes investimeve konkrete dhe vizionit të përbashkët, ne vazhdojmë të avancojmë kapacitetet tona mbrojtëse dhe të kontribuojmë në paqen, stabilitetin dhe sigurinë në rajon dhe më gjerë,” u theksua në deklaratë.

Gjithashtu u shpreh mirënjohje për Bashkimin Evropian për mbështetjen e vazhdueshme dhe për të gjithë faktorët që kontribuuan në realizimin e suksesshëm të këtij projekti.

Nënkryetari i Parlamentit të Malit të Zi, Nikollë Camaj, dorëzoi sot në procedurë parlamentare Propozim-vendimin për themelimin e Institutit Albanologjiko-Kulturologjik në Mal të Zi, një nismë që synon krijimin e një institucioni të dedikuar për studimin, ruajtjen dhe promovimin e trashëgimisë gjuhësore, historike dhe kulturore të shqiptarëve në vend.

Camaj vlerësoi se themelimi i këtij instituti përbën një hap të rëndësishëm drejt forcimit të bazës institucionale për kërkimin shkencor në fushën e albanologjisë dhe kulturologjisë, si dhe për mbrojtjen dhe afirmimin e identitetit kulturor të komunitetit shqiptar në Mal të Zi.

“Me këtë propozim krijojmë një kornizë të qëndrueshme institucionale që do të kontribuojë në zhvillimin e shkencës, ruajtjen e diversitetit kulturor dhe forcimin e karakterit multietnik të Malit të Zi”, deklaroi Camaj.

Ai shprehu bindjen se nisma do të marrë mbështetjen e deputetëve, duke theksuar se ajo është në përputhje me marrëveshjet e partneritetit dhe me angazhimet për avancimin e të drejtave të komuniteteve dhe zhvillimin e institucioneve shtetërore.

“Në përputhje me marrëveshjet dhe pozicionin e partneritetit që kemi, jam i bindur se deputetët do ta njohin rëndësinë e kësaj nisme dhe do ta mbështesin miratimin e saj”, tha Camaj.

Themelimi i Institutit Albanologjiko-Kulturologjik pritet të krijojë kushte për hulumtim të organizuar shkencor, dokumentim dhe promovim të trashëgimisë kulturore shqiptare, duke kontribuar njëkohësisht në pasurimin e jetës akademike dhe kulturore të Malit të Zi.

Ja postimi plotë:

Sot dorëzuam, për procedurë parlamentare, Propozimin e vendimit për themelimin e Institutit albanologjiko-kulturologjik në Malin e Zi. Besojmë se themelimi i këtij institucioni paraqet një hap të rëndësishëm drejt studimit sistematik, ruajtjes dhe afirmimit të gjuhës, kulturës, historisë dhe trashëgimisë së përgjithshme të komunitetit shqiptar në Malin e Zi. Me këtë propozim do të krijojmë një kornizë të qëndrueshme institucionale që do të kontribuojë në zhvillimin e shkencës, ruajtjen e diversitetit kulturor dhe forcimin e karakterit multietnik të Malit të Zi.
Sipas marrëveshjeve dhe pozicionit të patneritetit që kemi, jam më se i sigurt se deputetët do ta njohin rëndësinë e kësaj nisme dhe ta mbështesin miratimin e saj.