Lajme

Mexhiti dhe Ylli Limani vizitojnë kampusin e Universitetit “Nënë Tereza”

Kryetari i Çairit dhe bashkëkryetari i VLEN, Izet Mexhiti, së bashku me artistin e njohur Ylli Limani, vizituan sot Universitetin “Nënë Tereza” në Shkup, ku panë nga afër ecurinë e punimeve për ndërtimin e kampusit universitar, një nga investimet më të mëdha shtetërore për arsimin e lartë në gjuhën shqipe.

Gjatë vizitës, Mexhiti theksoi se ndërtimi i kampusit universitar është një projekt me rëndësi strategjike, që krijon kushte më të mira për arsimimin e brezave të rinj dhe dëshmon përkushtimin institucional ndaj zhvillimit të arsimit shqip në vend.

Ai vlerësoi se ishte domethënëse që, në prag të koncertit të tij në Shkup, Ylli Limani vizitoi një institucion që simbolizon të ardhmen e të rinjve shqiptarë, duke nënvizuar se investimi në dije mbetet garancia më e mirë për zhvillimin e shoqërisë.

Në takimin e përbashkët u diskutua për sfidat dhe perspektivat e rinisë, për rëndësinë e krijimit të mundësive të reja për të rinjtë, si dhe për projektet që po realizohen në funksion të avancimit të pozitës së tyre.

“Ylli Limani është dëshmi se talenti, puna dhe përkushtimi mund të shndërrohen në histori suksesi. Përtej karrierës së tij artistike, ai është një i ri me kulturë, vizion dhe mendim të pjekur, që përbën frymëzim për shumë të rinj shqiptarë,” u shpreh Mexhiti.

Ai shtoi se arti dhe kultura kanë një rol të rëndësishëm në ndërtimin e një shoqërie të shëndoshë dhe në motivimin e brezave të rinj, duke theksuar se figurat e suksesshme nga fusha e artit janë ambasadorë të vlerave pozitive dhe shembuj për t’u ndjekur.

Në fund të vizitës, Izet Mexhiti i uroi Ylli Limanit një koncert të suksesshëm në Shkup dhe suksese të mëtejshme në karrierën e tij artistike, duke shprehur bindjen se investimi paralel në arsim, kulturë dhe rini është rruga më e sigurt drejt një të ardhmeje më të mirë.

Lajme

Kontrabanda mes fshatrave Tanushë dhe Mjak, shoferi bie në pranga, tjetri aksidentohet gjatë arratisjes

Një 43-vjeçar nga Shkupi është arrestuar mëngjesin e së premtes në zonën kufitare mes Maqedonisë së Veriut dhe Kosovës, nën dyshimet për kontrabandë mallrash, ndërsa policia ka sekuestruar dy automjete transportuese, përcjell TV21. Sipas njoftimit të Ministrisë së Punëve të Brendshme, rreth orës 08:00, policët kanë vërejtur persona duke transferuar mallra nga një automjet në tjetrin në vijën kufitare mes fshatrave Tanushë dhe Mjak.

“Policët kanë vërejtur persona duke kryer ngarkim dhe shkëmbim të mallrave në një automjet transportues ‘Volkswagen’ me targa të Kosovës dhe një automjet ‘Peugeot’ me targa të Shkupit”, thuhet në njoftimin e MPB-së.

Policia ndërhyri menjëherë për ndalimin e automjeteve dhe identifikimin e personave, me ç’rast u arrestua A.A. (43) nga Shkupi, drejtues i automjetit “Peugeot”. Ndërkohë, drejtuesi i automjetit “Volkswagen” arriti të largohej drejt territorit të Kosovës.

“Është vendosur koordinim me pjesëtarët e Policisë së Kosovës – Task Force, të cilët ndërmorën masa për ndalimin e automjetit, por gjatë tentativës për arratisje ai doli nga rruga”, shtojnë nga MPB.

Ministria bën të ditur se të dy automjetet janë sekuestruar për procedurë të mëtejshme. Për rastin është njoftuar prokurori publik, ndërsa pas zbardhjes së plotë të ngjarjes do të parashtrohet kallëzimi përkatës.

Lajme

NPK “Sharri”: Uji në Tetovë është i sigurt për pije

Ndërmarrja Publike Komunale “Sharri” në Tetovë ka njoftuar qytetarët se uji nga rrjeti i furnizimit është i pijshëm dhe i sigurt për përdorim.

Detajet e konfirmimit:

Analizat: Rezultatet laboratorike të realizuara nga Instituti i Shëndetit Publik – Qendra për Shëndet Publik në Tetovë, kanë konfirmuar se uji i plotëson të gjitha kriteret e cilësisë.
Parametrat: Të gjithë parametrat mikrobiologjikë dhe fiziko-kimikë rezultojnë brenda vlerave të lejuara sipas standardeve për ujë të pijshëm.

Monitorimi: NPK “Sharri” ka siguruar qytetarët se vazhdon monitorimin e vazhdueshëm të cilësisë, me qëllim garantimin e një furnizimi të sigurt.

Lajme

SPB Tetovë: Dyshohet se ujë i ndotur është futur në rrjetin e ujësjellësit të Gostivarit

Policia dhe Prokuroria Themelore Publike e Gostivarit kanë nisur hetime lidhur me dyshimet për ndotjen e ujit të pijshëm që furnizon qytetin e Gostivarit.

Sipas njoftimit të SPB Tetovë, dje (16 korrik), rreth orës 18:20, inspektorët e Zyrës së Jashtme për Punë Kriminalistike në Gostivar, duke vepruar sipas udhëzimeve të një prokurori publik, kanë ndërmarrë masa urgjente në terren në fshatin Vërtok për të verifikuar dyshimet.

Policia njofton se ekzistojnë baza dyshimi se Ndërmarrja Publike “Ujësjellësi”, në bashkëpunim me Komunën e Gostivarit, ka vendosur tre pompa në shtratin e ujërave të ndotura, përmes të cilave uji është futur drejtpërdrejt në gypin kryesor të furnizimit të qytetit. Sipas dyshimeve, ky veprim është ndërmarrë për të rritur presionin në rrjet, si pasojë e mungesës së ujit të pijshëm, duke rrezikuar shëndetin e qytetarëve.

SPB Tetovë bën të ditur se po ndërmerren të gjitha veprimet e nevojshme për zbardhjen e plotë të rastit, për shkak të dyshimit për kryerjen e veprës penale “Ndotja e ujit të pijshëm”, të paraparë dhe të dënueshme sipas nenit 219 të Kodit Penal.

Në hetimin e rastit, krahas policisë dhe prokurorisë, janë përfshirë edhe Instituti i Shëndetit Publik, Agjencia e Ushqimit dhe Veterinarisë, Inspektorati Shtetëror i Mjedisit Jetësor, si dhe një ekspert i licencuar, i cili do të kryejë vlerësimin profesional të sistemit të dyshuar se është vendosur në kundërshtim me ligjin.