Tre persona janë privuar nga liria gjatë dy aksioneve policore të realizuara më 18 korrik 2026 në Shkup, ku janë sekuestruar lëndë e dyshuar narkotike, armë dhe municion.

Në zonën e Bit Pazarit, nëpunës policorë nga Njësia e Policisë Intervenuese pranë SPB Shkup kanë arrestuar S.B. (21) dhe E.A. (33), të dy nga Shkupi.

Gjatë bastisjeve të kryera në shtëpitë e tyre, me urdhër gjykate, policia ka gjetur dhe sekuestruar 58 qese me lëndë pluhurore të bardhë, si dhe një peshore digjitale.

Në një aksion tjetër, të realizuar në fshatin Saraj, policia ka privuar nga liria M.A. (40) nga fshati Radushë.

Gjatë bastisjes në shtëpinë e tij, gjithashtu me urdhër gjykate, janë gjetur dhe sekuestruar një pistoletë “Glock” e kalibrit 9×19 milimetra, një karikator dhe 13 fishekë.

Nga Ministria e Punëve të Brendshme njoftojnë se pas dokumentimit të plotë të rasteve, ndaj personave të arrestuar do të parashtrohen kallëzimet përkatëse.

Kryetari i Bashkimit Demokratik për Integrim (BDI), Ali Ahmeti, ka marrë pjesë sonte në punimet e Kuvendit Zgjedhor të Degës së BDI-së në Gostivar, ku janë zgjedhur strukturat e reja drejtuese të degës.

Gjatë kuvendit u zgjodhën Kryesia e Degës, Këshilli Mbikëqyrës, Komiteti i Veteranëve, sekretarët e sekretariateve tematike, si dhe strukturat e tjera organizative.

Ahmeti, përmes një reagimi pas kuvendit, vlerësoi atmosferën dhe angazhimin e anëtarëve të partisë, duke theksuar se Gostivari mbetet një nga shtyllat më të rëndësishme të BDI-së.

“Atmosfera, entuziazmi, përkushtimi dhe gatishmëria e atyre që morën përgjegjësi dëshmojnë se Gostivari është i vendosur të vazhdojë të jetë një nga shtyllat më të fuqishme të Bashkimit Demokratik për Integrim”, deklaroi Ahmeti.

Ai uroi të zgjedhurit e rinj për punën e tyre, duke përmendur në veçanti kryetaren e Forumit të Gruas, kryetarin e Forumit Rinor, aktivistët, veteranët dhe mbështetësit e BDI-së në Gostivar.

Sipas Ahmetit, zhvillimet politike në vend kërkojnë më shumë vigjilencë, bashkim dhe angazhim nga strukturat e partisë.

“Bashkë do të vazhdojmë betejën për rikthimin e dinjitetit, barazisë dhe respektimit të vullnetit të qytetarëve në Republikën e Maqedonisë së Veriut”, ka shkruar Ahmeti.

Ai shtoi se me organizim, unitet dhe besim në kauzën politike të BDI-së, Gostivari do të japë rezultat të rëndësishëm në sfidat e ardhshme politike.

Kryebashkiaku i Nju Jorkut, Zohran Mamdani, deklaroi se administrata e tij po shqyrton mundësinë e arrestimit të kryeministrit izraelit Benjamin Netanyahu, nëse ai udhëton në qytet për të marrë pjesë në Asamblenë e Përgjithshme të Kombeve të Bashkuara, e planifikuar për në muajin shtator.

 

 

Në një deklaratë publike, Mamdani tha se beson se Netanyahu duhet të përballet me drejtësinë ndërkombëtare. “Unë besoj se kryeministri Netanyahu duhet të gjykohet në Hagë”, u shpreh ai, duke iu referuar procedurave ndërkombëtare kundër liderit izraelit. Kryebashkiaku shtoi gjithashtu se Netanyahu është “një kriminel lufte i akuzuar nga Gjykata Ndërkombëtare Penale”.

Deklarata e Mamdanit vjen në një kohë kur pritet që shumë liderë botërorë të marrin pjesë në punimet e Asamblesë së Përgjithshme të OKB-së në Nju Jork, ndërsa çështja e urdhërarrestit të lëshuar nga Gjykata Ndërkombëtare Penale ndaj Netanyahut vazhdon të jetë objekt debatesh në arenën ndërkombëtare.