Një 35-vjeçar nga fshati Buçim i Radovishit është ndaluar nga policia pasi gjatë kontrollit të automjetit të tij janë gjetur 14.440 euro në valuta të ndryshme, për të cilat nuk ka paraqitur dëshmi për prejardhjen.

Sipas Ministrisë së Punëve të Brendshme, më 13 gusht policia ka ndaluar një automjet të tipit “Audi” në rrugën magjistrale Radovish–Shtip, pranë kryqëzimit për fshatin Buçim.

Automjeti drejtohej nga M.V., ndaj të cilit më herët ishte caktuar masa e kujdesit – ndalim për largim nga shtëpia, nën dyshimin për veprën penale të prodhimit dhe shpërndarjes së paautorizuar të drogës.

Gjatë kontrollit, policia ka gjetur 14.440 euro, ndërsa për rastin është njoftuar prokurori publik.

“M.V. nuk ka paraqitur dëshmi për prejardhjen e parave të gjetura”, thuhet në njoftimin e MPB-së.

Më 14 gusht, 35-vjeçari është nxjerrë para gjykatësit në Gjykatën Themelore në Gjevgjeli, i cili i ka caktuar masën e paraburgimit prej 30 ditësh. Pas vendimit, ai është dërguar në Burgun e Shkupit.

Ministri i Drejtësisë, Jeton Shasivari, ka kujtuar Arbën Xhaferin në 14 vjetorin e ndarjes së tij nga jeta, duke e vlerësuar si një nga figurat më të ndritura dhe vizionare të mendimit politik e intelektual mbarëshqiptar.

Në një postim në rrjetet sociale, Shasivari shkruan se Xhaferi nuk ishte thjesht një lider politik, por një filozof i të drejtave njerëzore dhe kombëtare, i cili me urtësinë dhe qartësinë e mendimit të tij udhëhoqi procese të rëndësishme drejt barazisë, dinjitetit dhe avancimit institucional të shqiptarëve.

“Trashëgimia e tij teorike dhe praktike mbetet një udhërrëfyes i çmuar për ndërtimin e një shoqërie ku sundimi i ligjit, drejtësia dhe shteti i së drejtës janë shtyllat kryesore të bashkëjetesës dhe zhvillimit”, shprehet Shasivari.

Ai thekson se edhe 14 vjet pas vdekjes, përkushtimi i Xhaferit ndaj parimeve të lirisë dhe barazisë mbetet i rëndësishëm.

Sipas Shasivarit, vizioni i Arbën Xhaferit obligon që të vazhdojë angazhimi për reforma të qëndrueshme në drejtësi, meritokraci dhe mbrojtjen e të drejtave legjitime të të gjithë qytetarëve, me synim forcimin e themeleve të një sistemi të drejtë dhe transparent.

“E përjetshëm qoftë kujtimi dhe vepra e Arbën Xhaferit”, përfundon Shasivari. (INA)

Kryetari i PDSH-së, Menduh Thaçi pas homazheve në përvjetorin e vdekjes së Arben Xhaferit ka reaguar ndaj deklaratave të Ali Ahmetit lidhur me pretendimet për një dokument që ka parashikuar ndarjen e Maqedonisë, raporton zyrtare.net

Thaçi thotë se një dokument i tillë nuk ka ekzistuar dhe se ideja për ndarjen e vendit është nxjerrë nga, siç i quan ai, “pseudoakademikë të instruktuar nga UDB-ja e Serbisë”, raporton zyrtare.net

“Për ndarjen e Maqedonisë nuk ka pasur dokument. Kanë qenë disa pseudoakademikë në atë kohë, të instruktuar nga UDB-ja e Serbisë, të cilët e nxorën këtë ide. Ajo s’ka qenë ide e Akademisë së Shkencave dhe as Arben Xhaferi nuk ka dokument, sepse nuk ekziston. Ali Ahmetit atëherë UDB-ja i ka thënë: kjo është rruga që mund ta shkatërrosh organizimin politik të shqiptarëve. Dhe ai flet palidhje, na paska ekzistuar dokument”, tha Thaçi.

Kreu i PDSH-së paralajmëroi edhe mundësinë e ndërmarrjes së hapave ligjorë ndaj Ahmetit, nëse ai vazhdon me deklarata të tilla.

“Unë e paralajmëroj edhe njëherë: nëse flet kështu, do ta padis në gjyq, në emër të Arben Xhaferit, sepse një denoncim i tillë është i palejueshëm”, u shpreh Thaçi.