Kryetari i BDI-së, Ali Ahmeti, ka reaguar për zhvillimet e fundit dhe përshkallëzimin e protestave në Tiranë, duke u bërë thirrje klasës politike shqiptare, studentëve dhe protestuesve për maturi, dialog dhe përgjegjësi, transmeton Zyrtare.

Ahmeti vlerëson se situata kërkon reflektim urgjent dhe tejkalim të interesave partiake, duke theksuar se interesi i Shqipërisë dhe i qytetarëve duhet të jetë mbi çdo konsideratë tjetër.

“Në këtë moment delikat, kur situata ka mbërritur në një pikë që kërkon vëmendje dhe përgjegjësi të jashtëzakonshme, politika shqiptare duhet të dëshmojë maturi, urtësi dhe vetëdije të lartë për interesin e përbashkët”, ka shkruar Ahmeti.

Ai u ka bërë thirrje studentëve dhe protestuesve që kërkesat e tyre t’i shprehin në mënyrë dinjitoze dhe të mos lejojnë që përplasjet të zbehin mesazhin e protestës.

“Shkatërrimi nuk është zgjidhje, pas çdo biznesi qëndrojnë puna, mundi dhe sakrifica e njerëzve. Forca e një proteste qëndron te qartësia e kërkesave, këmbëngulja qytetare dhe besnikëria ndaj parimeve demokratike”, ka theksuar ai.

Ahmeti ka nënvizuar gjithashtu përgjegjësinë e institucioneve shtetërore dhe të policisë për ruajtjen e rendit dhe sigurisë, duke kërkuar paanshmëri, profesionalizëm dhe respektim të të drejtave themelore të qytetarëve.

Sipas tij, asnjë formë dhune, nga cilado palë, nuk mund të jetë përgjigje ndaj krizës, ndërsa përplasjet nuk mund ta zëvendësojnë dialogun.

Duke iu referuar synimit të Shqipërisë për anëtarësim në Bashkimin Evropian, Ahmeti ka theksuar rëndësinë e respektimit të demokracisë, sundimit të ligjit dhe funksionimit të institucioneve.

“Shqipëria nuk është pronë e askujt, por atdheu i të gjithëve”, ka shkruar Ahmeti, duke shtuar se Shqipëria është atdheu i të gjithë shqiptarëve, brenda dhe jashtë kufijve të saj.

Në fund, kreu i BDI-së ka bërë thirrje për një reflektim të gjerë dhe angazhim të përbashkët për tejkalimin e situatës, duke theksuar se përgjegjësia për të ardhmen e vendit u takon të gjithëve.

“Le të mbizotërojnë dialogu mbi përplasjen dhe e ardhmja e Shqipërisë mbi çdo gjë tjetër. Kjo nuk është koha për të thelluar ndasitë, por për të gjetur gjuhën e përbashkët”, ka përfunduar Ahmeti.

Një aksion i përforcuar policor në mbarë Maqedoninë e Veriut ka përfunduar me 16 persona të privuar nga liria, pas 47 kontrolleve në shtëpi dhe objekte ndihmëse në lokacione të ndryshme të vendit.

Gjatë kontrolleve, policia ka sekuestruar sasi të mëdha marihuane, disa paketime kokaine, përfshirë edhe doza të përgatitura për shitje të mëtejshme, si dhe pistoleta, pushkë, municion, para dhe sende të tjera që dyshohet se lidhen me vepra penale.
Aksioni u realizua më 16 dhe 17 tetor nga Departamenti i Policisë Kriminalistike, në koordinim me sektorët e punëve të brendshme dhe Njësinë për Qentë Zyrtarë.

Ministria e Punëve të Brendshme njofton se janë ngritur 11 kallëzime penale për vepra që lidhen me trafikimin e narkotikëve dhe armëmbajtjen e paligjshme. Aksionet për zbulimin dhe luftimin e kriminalitetit do të vazhdojnë.

Më 17.10.2026, në SPB Tetovë janë denoncuar tri tentativa për vjedhje të rëndë dhe një vjedhje e kryer më 16.10.2026 në objekte fetare në zonën e qytetit.

Siç njoftojnë nga SPB Tetovë, rastet kanë ndodhur në:
– Në objektin fetar “Firdeus”, në rrugën “Jashtë Vardarit”, gjatë periudhës nga 16 deri më 17 tetor, një person i panjohur, duke përdorur forcë fizike, ka hapur me dhunë dritaren e bodrumit dhe është përpjekur të hapë derën e bodrumit, pas së cilës është larguar nga vendi i ngjarjes.
– Në “Xhaminë e Madhe”, në rrugën “Çarshia e Epërme”, rreth orës 05:30, një person ka hyrë në objekt dhe është përpjekur të gjejë çelësin. Më pas, me një mjet metalik, është përpjekur të dëmtojë dhe të hapë derën, pas së cilës është larguar.
– Ndërkaq, në xhaminë “Eski”, në rrugën “Probishti”, personi përgjegjës A.B. (38) nga Tetova ka denoncuar se një person i panjohur është përpjekur të hapë dhe ka dëmtuar kasafortën metalike, e cila është gjetur e zhvendosur nën një karrige.

karrige.

“Pas masave operative të ndërmarra nga nëpunësit policorë të SPB Tetovë, më 17.10.2026, në orën 12:30, në rrugën “Boris Kidriç” në Tetovë është privuar nga liria D.S. (35) nga fshati Jellovjan, nën dyshimin e bazuar për kryerjen e veprave penale “Vjedhje e rëndë” dhe “Vjedhje e rëndë në tentativë”, të dënueshme sipas nenit 235 të Kodit Penal. Pas dokumentimit të plotë të rastit, ndaj tij do të parashtrohet kallëzim përkatës”, thuhet mes tjerash në njoftimin e SPB Tetovë, përcjell TV21.