Lajme
Arabia Saudite e para në botë për shërbimet qeveritare digjitale, përmbush objektivin e Vizionit 2030
Mbretëria renditet e para mes 194 vendeve dhe territoreve të vlerësuara nga OKB-ja për shërbimet qeveritare online dhe ngjitet në vendin e katërt në botë për qeverisjen elektronike, duke realizuar katër vjet përpara afatit një objektiv të rëndësishëm të Vizionit 2030 të Princit të Kurorës Mohammed bin Salman.
RIJAD, 19 nëntor 2026 – Arabia Saudite është renditur e para në botë në Indeksin e Shërbimeve Online (OSI) të Kombeve të Bashkuara, duke shënuar një arritje të rëndësishme në transformimin digjital të vendit dhe zbatimin e Vizionit 2030, strategjisë ambicioze të zhvillimit kombëtar të iniciuar nga Princi i Kurorës dhe Kryeministri Mohammed bin Salman.
Sipas raportit UN E-Government Survey 2026, Arabia Saudite ka arritur vlerësimin maksimal në Indeksin e Shërbimeve Online, i cili mat cilësinë, disponueshmërinë dhe nivelin e zhvillimit të shërbimeve qeveritare digjitale. Raporti përfshin 194 vende dhe territore, përkatësisht 193 shtetet anëtare të OKB-së dhe Palestinën. Mbretëria është ngjitur gjithashtu në vendin e katërt në botë në Indeksin e përgjithshëm të Zhvillimit të Qeverisjes Elektronike (EGDI), nga vendi i gjashtë në vitin 2024 dhe i 52-ti në vitin 2018. Kjo ngjitje prej 48 vendesh brenda tetë vjetësh pasqyron investimet e mëdha në infrastrukturën digjitale dhe modernizimin e administratës publike.
Me këtë rezultat, Arabia Saudite ka përmbushur katër vjet përpara afatit objektivin e Vizionit 2030 për t’u përfshirë ndër pesë vendet kryesore të botës në qeverisjen elektronike. Mbretëria është renditur e para edhe në disa tregues të tjerë, përfshirë infrastrukturën e telekomunikacionit dhe pjesëmarrjen digjitale. Kryeqyteti Riad është renditur gjithashtu i pari në botë në Indeksin e Shërbimeve Online të Qeverisjes Vendore (LOSI).
Kjo arritje lidhet drejtpërdrejt me Vizionin Saudit 2030, të shpallur më 25 prill 2016 nga Princi i Kurorës Mohammed bin Salman, me mbështetjen e Mbretit Salman bin Abdulaziz Al Saud. Vizioni 2030 synon transformimin ekonomik dhe institucional të Mbretërisë, uljen e varësisë nga të ardhurat e naftës, diversifikimin e ekonomisë, zgjerimin e sektorit privat dhe tërheqjen e investimeve ndërkombëtare. Strategjia mbështetet në tri shtylla kryesore: një shoqëri dinamike, një ekonomi në lulëzim dhe një komb ambicioz. Modernizimi i administratës, inovacioni teknologjik dhe transformimi digjital përbëjnë përparësi qendrore të programit të reformave të Princit të Kurorës.
Digjitalizimi i shërbimeve publike synon të rrisë efikasitetin dhe transparencën e institucioneve, të thjeshtojë procedurat administrative dhe të përmirësojë klimën e biznesit, duke u ofruar qytetarëve dhe investitorëve akses më të shpejtë në shërbimet qeveritare. Një rol të rëndësishëm në këtë transformim kanë luajtur platformat digjitale si Absher, që mundëson kryerjen online të procedurave administrative, dhe Tawakkalna, e cila ofron akses në mbi 1,100 shërbime nga institucione të ndryshme. Këto platforma kanë reduktuar nevojën për paraqitjen fizike në zyrat shtetërore, duke lehtësuar procedurat dhe kursyer kohë për qytetarët, banorët dhe bizneset.
Sipas Autoritetit Saudit të Qeverisjes Digjitale, Indeksi i Maturimit të Përvojës Digjitale për Shërbimet Qeveritare arriti në 87.06% në vitin 2026. Ky tregues pasqyron përmirësimin e funksionimit të platformave dhe cilësisë së shërbimeve elektronike. Arabia Saudite ishte renditur gjithashtu e dyta në botë në Indeksin e Maturimit të Teknologjive Qeveritare të Bankës Botërore për vitin 2025.
Ministri saudit i Komunikacionit dhe Teknologjisë së Informacionit, Abdullah Al-Swaha, ia atribuoi suksesin mbështetjes së Mbretit Salman dhe Princit të Kurorës Mohammed bin Salman, duke theksuar se Vizioni 2030 e ka vendosur teknologjinë dhe inovacionin në qendër të zhvillimit kombëtar dhe konkurrueshmërisë ndërkombëtare.
Ahmed Al-Suwayan, guvernator i Autoritetit të Qeverisjes Digjitale, deklaroi se rezultatet pasqyrojnë përparimin e transformimit digjital dhe bashkërendimin e institucioneve shtetërore. Ai theksoi se qytetarët janë partnerë thelbësorë në këtë proces dhe se nevojat e tyre udhëheqin zhvillimin e shërbimeve të reja, përfshirë përdorimin e inteligjencës artificiale për përmirësimin e cilësisë dhe aksesit në shërbimet publike. Autoriteti i Qeverisjes Digjitale, i krijuar në vitin 2021, ka luajtur një rol qendror në koordinimin e digjitalizimit të administratës, hartimin e standardeve teknologjike dhe zhvillimin e platformave të integruara të shërbimeve publike.
Raporti i OKB-së, që publikohet çdo dy vjet, konsiderohet një nga vlerësimet kryesore ndërkombëtare për zhvillimin e qeverisjes elektronike. Ai mat tri dimensione: shërbimet online, infrastrukturën e telekomunikacionit dhe kapitalin njerëzor.
Renditja e re përbën një njohje ndërkombëtare të përparimit të Arabisë Saudite në modernizimin e administratës dhe realizimin e një prej objektivave kryesore të Vizionit 2030. Ajo dëshmon gjithashtu rëndësinë që teknologjia dhe inovacioni kanë marrë në programin më të gjerë të reformave ekonomike dhe institucionale të Mbretërisë, ndërsa vendi hyn në katër vitet e fundit drejt përmbushjes së Vizionit 2030.
Lajme
Në ditën e parë u shitën mbi 24.5 milionë kopje të GTA 6, 2.36 miliardë dollarë të ardhura
Pas 13 vitesh pritje, videoloja e shumëpritur Grand Theft Auto 6 (GTA 6) ka debutuar me një sukses të jashtëzakonshëm tregtar. E publikuar më 19 nëntor, loja ka arritur të kthehet brenda pak orësh në një nga lançimet më të mëdha në historinë e industrisë së argëtimit.
Sipas vlerësimeve paraprake të kompanisë analitike Sensor Tower, shitjet e GTA 6, duke përfshirë edhe porositë paraprake, kanë kaluar 24.5 milionë kopje. Të ardhurat vlerësohen në rreth 2.36 miliardë dollarë.
Nëse këto shifra konfirmohen, GTA 6 do të regjistrojë një nga debutimet më të mëdha tregtare të të gjitha kohërave. Kompania mëmë Take-Two Interactive dhe zhvilluesi Rockstar Games nuk kanë publikuar ende shifra zyrtare të shitjeve, por e kanë përshkruar kërkesën për lojën si të paprecedentë.
Sipas agjencisë Reuters, vlerësimet e Sensor Tower tregojnë se GTA 6 ka shitur pothuajse trefishin e kopjeve që kishte shitur paraardhësi i tij, GTA 5, gjatë 24 orëve të para të publikimit në vitin 2013.
Të ardhura sa një superprodhim hollivudian
Përmasat e suksesit bëhen edhe më të dukshme kur krahasohen me industrinë e filmit. Sipas të dhënave të cituara në raport, filmi Spider-Man: Brand New Day ka grumbulluar rreth 2.5 miliardë dollarë nga shitja e biletave në kinematë botërore.
GTA 6 ka arritur t’i afrohet kësaj shifre që në ditën e parë të publikimit, duke përfshirë edhe porositë paraprake.
Ndërkohë, kompania kërkimore e tregut Niko Partners parashikon se të ardhurat nga loja mund të kalojnë 3 miliardë dollarë deri në fund të vitit 2026.
Miliona lojtarë në pritje, rekord edhe në trafikun e internetit
Publikimi i GTA 6 ka shkaktuar një mobilizim të jashtëzakonshëm të lojtarëve në mbarë botën. Shumë prej tyre kanë qëndruar zgjuar gjatë natës për të nisur menjëherë aventurën e re, ndërsa të tjerë kanë planifikuar të marrin pushim nga puna për t’i kushtuar më shumë kohë lojës.
Interesi masiv është reflektuar edhe në trafikun e internetit. Në Britaninë e Madhe, operatori Virgin Media O2 ka regjistruar nivele rekord të transferimit të të dhënave, për shkak të shkarkimeve dhe instalimeve paraprake të lojës.
GTA 6 zë rreth 212 GB hapësirë, çka kërkon një sasi të konsiderueshme të dhënash për shkarkim dhe instalim.
Një nga videolojërat më të shtrenjta në histori
Pas këtij projekti qëndron një investim gjigant. Kostoja e zhvillimit të GTA 6 vlerësohet të ketë kaluar 1 miliard dollarë, shifër që, nëse konfirmohet, do ta rendiste atë ndër videolojërat më të shtrenjta të prodhuara ndonjëherë.
Rockstar Games ka punuar për më shumë se një dekadë për të sjellë pasardhësin e GTA 5, i cili u publikua në vitin 2013 dhe u shndërrua në një prej lojërave më të suksesshme komerciale të të gjitha kohërave.
Ngjarjet e lojës zhvillohen në Leonida, një shtet imagjinar i frymëzuar nga Florida, ndërsa qendra kryesore e historisë është Vice City, e ndërtuar mbi modelin e Majamit.
Protagonistët janë Lucia dhe partneri i saj Jason, dy personazhe të përfshirë në botën e krimit, grabitjeve dhe ndjekjeve të rrezikshme. Loja ndërthur aksionin me satirën sociale, duke trajtuar kulturën amerikane dhe anën e errët të ëndrrës amerikane.
Rockstar ka ende dy burime të mëdha të ardhurash
Pavarësisht suksesit të jashtëzakonshëm të ditëve të para, potenciali tregtar i GTA 6 mund të rritet edhe më tej.
Për momentin, loja është e disponueshme për PlayStation 5 dhe Xbox Series X|S. Ende nuk është njoftuar një datë zyrtare për versionin e kompjuterëve, ndërsa pritet edhe prezantimi i modalitetit online, ku lojtarët do të mund të ndërveprojnë dhe të zhvillojnë misione së bashku përmes internetit.
Përvoja e GTA 5 tregon rëndësinë që mund të ketë kjo pjesë e lojës. GTA Online u shndërrua në një burim të rëndësishëm të ardhurash për kompaninë, përmes blerjeve virtuale, automjeteve luksoze, pronave dhe përmbajtjeve të tjera shtesë.
Kufizime në disa tregje
Përmbajtja e lojës, e cila përfshin skena të dhunshme dhe materiale të destinuara për të rritur, ka sjellë edhe kufizime në disa tregje ndërkombëtare.
Në Japoni janë raportuar ndërhyrje për përshtatjen e përmbajtjes me rregullat vendase, ndërsa në Kinën kontinentale loja nuk ka marrë miratimin për shitje zyrtare.
Megjithatë, këto kufizime nuk duket se kanë ndikuar në interesin e jashtëzakonshëm global.
Me më shumë se 24.5 milionë kopje të shitura sipas vlerësimeve paraprake dhe të ardhura që kapin rreth 2.36 miliardë dollarë, GTA 6 po vendos një standard të ri për industrinë e videolojërave. Për Rockstar Games, debutimi i 19 nëntorit mund të jetë vetëm fillimi i një suksesi që pritet të vazhdojë edhe në vitet e ardhshme.
Lajme
Era e fuqishme në Tetovë dhe Pollog! Rreth 15 intervenime, pa të lënduar
Erërat e fuqishme që përfshinë mbrëmë Tetovën dhe rajonin e Pollogut shkaktuan dëme të shumta materiale. Pemë të rrëzuara, kulme të dëmtuara, rrugë të bllokuara dhe ndërprerje të energjisë elektrike në disa vendbanime. Ekipet e zjarrfikësve intervenuan në rreth 15 raste, ndërsa në terren gjatë gjithë natës ishin edhe ekipet e ndërmarrjes publike komunale për largimin e pemëve dhe degëve të rrëzuara.
“Patëm rreth 15 intervenime, dy zjarre, disa kulme të rrëzuara, rrugë të bllokuara, si dhe shtylla elektrike të dëmtuara. Kemi intervenuar në të gjitha rastet dhe situatën e kemi pasur nën kontroll. Fatmirësisht, nuk kemi persona të lënduar”, deklaroi Avni Ameti, shef i NjTKZ Tetovë.
Komuna e Tetovës u ka bërë apel qytetarëve që të kenë kujdes gjatë motit të lig dhe të shmangin lëvizjet e panevojshme. Deri më tani, në Komunë nuk është paraqitur asnjë kërkesë zyrtare për kompensimin apo evidentimin e dëmeve.
“Komuna e Tetovës mbrëmë doli me apel për qytetarët që të kenë kujdes dhe të shmangin lëvizjet gjatë erërave të fuqishme. Deri më tani nuk kemi pasur denoncime nga banorët për dëmet materiale, por nëse paraqiten raste të tilla, Komuna së bashku me inspektoratin do të dalë në terren për verifikimin e tyre dhe marrjen e masave të nevojshme”, deklaroi Besarta Ramadani, zëdhënëse e Komunës së Tetovës.
Në polici është raportuar edhe dëmtimi i një automjeti nga tjegullat e një kulmi në rrugën industriale. Ekipet e SPB Tetovë, zjarrfikësit dhe ndërmarrja publike komunale kanë bashkëpunuar për sigurimin dhe pastrimin e rrugëve. Deri më tani, as në Qendrën për Menaxhim me Kriza nuk janë raportuar dëme më të mëdha materiale. Fatmirësisht, nga të gjitha incidentet nuk ka persona të lënduar.
Lajme
Imer Aliu: PPD, BDI dhe VLEN – emra të ndryshëm, e njëjta filozofi politike!
35 vite pluralizëm, emra të rinj partish, por e njëjta formulë politike: kompromiset për pushtet në kurriz të interesave të shqiptarëve. Kështu e përshkruan përfaqësimin politik shqiptar në Maqedoninë e Veriut, Imer Aliu, përfaqësues i lartë i PDSH-së.
Sipas Aliut, nga PPD-ja te BDI-ja dhe VLEN-i, partitë kanë ndryshuar emrat, por jo filozofinë politike, duke e vendosur qëndrimin në pushtet mbi interesat e shqiptarëve.
Ai thekson se PDSH-ja ka përfaqësuar një koncept tjetër, të bazuar në dinjitetin kombëtar, barazinë politike dhe refuzimin e nënshtrimit për interesa pushteti.
“Sa herë duhet të ndryshojnë emrat e partive që më në fund të kuptoni se po votoni për të njëjtin model politik?”, pyet Aliu.
-
Lajme12 months agoZbulohet Identiteti i Personit Të Vrarë Në Tetovë
-
Lajme2 years agoDetaje nga ngjarja tronditëse në Tetovë: Burri vrau gruan dhe vajzën 4 vjeçe, pastaj qëlloi djalin 9 vjeç dhe veten e tij
-
Lifestyle3 years agoTrashet miqësia me maqedonë në familjen e Adelina Tahirit
-
Lajme3 years agoKëto ministri dhe poste zv ministrash do ti takojnë VLEN-it
-
Lajme12 months agoAplikacion që zbulon kamerat radar, shoferët e shkarkojnë masivisht
-
Lajme3 years agoJa kush janë 13 deputetët e koalicionit “VLEN” (Lista)
-
Lajme3 years agoBurrin e Shkurte Fejzës e godet vetura (PAMJE)
-
Lajme1 month agoÇmimi i naftës shënon rënie
