Lajme

“Vlon” në Klinikën e Toksikologjisë, akuza për ofendime në baza nacionale!

“Nëse doni luftë edhe atë luftë bërthamore. Të hënën pas kujdestarisë dua që kujdesi intensiv të jetë pa shqiptarë”

“Në kohën e Titos, Maqedonia ishte vend i bukur për të jetuar. Më pas këta zbritën nga mali dhe u përzien gjërat”

Janë këto disa nga pohime të mjekut Beqaroski që Ministria e Shëndetësisë i ka publikuar në faqen zyrtare në Facebook e që janë nënshkruar nga 15 të punësuar në këtë klinikë.

Pas publikimit të një dokumenti nga ana e Ministrisë së Shëndetësisë, në të cilin ka akuza serioze se doktori Niko Beqarovski nga Klinika e Toksikologjisë ka ofenduar të punësuarit në bazë nacionale, ka reaguar mjeku në fjalë.

“I nderuari ministër i Shëndetësisë z. Ilir Demiri, sinqerisht shpresoj që publikimi është bërë pa dijeninë dhe miratimin tuaj, sepse me të i keni shkaktuar dëme të pallogaritshme reputacionit tim, bazuar në deklarata të rreme, në një dokument të arkivuar në mënyrë të paligjshme, në të cilin nuk ka asnjë emër të vetëm, për të cilin do të pasojë një padi adekuate gjyqësore ndaj të përfshirëve”, tha Niko Beqarovski.

Ndaj këtyre akuzave kanë reaguar edhe të punësuarit në Klinikën e Toksikologjisë, të cilët kanë përgënjetruar pretendimet e Ministrisë së Shëndetësisë.

“Doktor Niko Beqarovski është profesionist i shquar i cili më shumë se 10 vite punon në mjekësinë urgjente dhe shpëton jetë njerëzish pa dallim të përkatësisë etnike apo përkatësisë së partive politike, kështu që ndërlidhja e emrit të tij me të pavërteta të këtillë për qëllime politike është skandaloze dhe jokorrekte dhe nxit padurim në bazë nacionale”, thone të punësuarit në Klinikën e Toksikologjisë.

Kujtojmë se, Ministria e Shëndetësisë informoi dje, Dr. Danil Petrovski është shkarkuar nga pozita e drejtorit mjekësor të Klinikës së Toksikologjisë për shkak të pandërgjegjshmërisë gjatë periudhës së kaluar.

Sipas ministrisë, edhe pse ka pasur pëlqim për vazhdimin e kontratave të punës për 18 persona, ai nuk ka vepruar. Gjatë mandatit të tij, shtuan më tej nga klinika ka patur sjellje joprofesionale me kërcënime dhe nënçmime të përditshme në bazë nacionale./tvklan.mk

Lajme

Alpinisti i vdekur në Majën e Titos është nga fshati Xhepçisht?!

Personi që humbi jetën sot në zonën e “Kodrës së Diellit”, përkatësisht në afërsi të Majës së Titos, mësohet se është nga fshati Xhepçisht i Komunës së Tetovës, mëson tetova1

Sipas informacioneve të para, bëhet fjalë për një person mbi 70-vjeç, i cili kishte dalë në zonën malore si alpinist. Për shkak të terrenit të vështirë dhe të paarritshëm me mjete të zakonshme, trupi i pajetë është transportuar me helikopter nga zona malore. Autoritetet pritet të japin më shumë detaje lidhur me rrethanat e ngjarjes./tetova1.mk

Lajme

Maran e la jashtë listës së Kombëtares, reagon Jasir Asani

Jasir Asani ishte një nga befasitë e trajnerit Maran, pasi mëngjarashi nuk ishte pjesë e listës me 29 futbollistë të grumbulluar për 4 ndeshjet e kombëtares në Ligën e Kombeve.

Këtë Asani nuk e ka “kapërdirë” dot dhe ka reaguar në rrjetet sociale. Asani ka “ironizuar”, me dy postime të bëra.

“Po rri urtë, se e di veten. Historia nuk harrohet kurrë. Më mirë të mos flas më…”, shkruan Jasir Asani në rrjetet sociale.

Lajme

Këto janë të dhënat që nuk duhet t’ia jepni ChatGPT-së

ChatGPT është bërë pjesë e përditshmërisë së shumë njerëzve, të cilët e përdorin për gjithçka, nga recetat dhe CV-të, deri te këshillat për shëndetin dhe problemet në punë.

Por përdorimi gjithnjë e më i madh i chatbotëve po ngre shqetësime te ekspertët e privatësisë, të cilët paralajmërojnë se disa informacione personale dhe konfidenciale nuk duhet të ndahen në bisedat me inteligjencën artificiale.

Sipas ekspertëve të cituar nga “HuffPost”, përdoruesit duhet të shmangin ndarjen e të dhënave që mund t’i identifikojnë drejtpërdrejt.

Të dhënat personale

Emri i plotë, adresa, numri i telefonit, numri personal, të dhënat e pasaportës, patentës apo dokumenteve të tjera zyrtare janë ndër informacionet që këshillohet të mos ndahen.

Ekspertët rekomandojnë që edhe para ngarkimit të një dokumenti për analizë të hiqen të dhënat që mund të identifikojnë personin.

Problemet dhe informacionet intime

Komunikimi natyral me chatbotët mund t’i bëjë përdoruesit të ndajnë histori familjare, probleme personale apo informacione intime.

Ekspertët paralajmërojnë se një chatbot nuk duhet trajtuar si psikolog, mjek apo avokat, pasi nuk ka të njëjtat detyrime profesionale dhe ligjore për konfidencialitet.

Dokumentet mjekësore
Raportet mjekësore dhe analizat laboratorike mund të përdoren për të marrë shpjegime nga inteligjenca artificiale, por këshillohet që paraprakisht të fshihen emri, datëlindja, numri personal dhe të dhënat e tjera identifikuese.
Informacionet e kompanisë

Raportet e brendshme, kontratat, të dhënat e klientëve, kodet burimore dhe dokumentet që mbrohen nga marrëveshjet e konfidencialitetit nuk duhet të ngarkohen pa autorizim.

Një veprim i tillë mund të krijojë probleme ligjore, kontraktuale ose rregullatore për punonjësin dhe kompaninë.

Të dhënat financiare

Numrat e llogarive bankare, të dhënat e kartave të kreditit, informacionet mbi investimet, të ardhurat dhe deklaratat tatimore janë gjithashtu informacione që duhet të mbahen larg chatbotëve.

Ekspertët këshillojnë përdoruesit të kontrollojnë cilësimet e privatësisë në platformat e inteligjencës artificiale dhe, kur është e mundur, të kufizojnë përdorimin e bisedave për trajnimin e modeleve.

Një alternativë është përdorimi i pseudonimeve ose përshkrimeve të përgjithshme në vend të emrave dhe të dhënave reale, duke i dhënë chatbotit kontekstin e nevojshëm pa ekspozuar informacionet personale apo konfidenciale.