Agjencia e Ushqimit dhe Veterinarisë (AUV) kreu 1.221 inspektime të jashtëzakonshme përpara festave të Pashkëve, duke vendosur gjoba në shumën mbi 19.000 euro në ekuivalentin e denarit.

Siç raportohet nga AUV, u shkatërruan më shumë se 272 kilogramë ushqim të pasigurt, shumica e të cilëve me origjinë shtazore.

Përveç kësaj, mbi 40 ton vezë të pasigurta me origjinë nga Serbia, të cilat u penguan të hynin në treg, u shkatërruan pa rrezik në deponinë e Drisllës.

“Për mospërputhjet e identifikuara, u morën 35 vendime për eliminimin e tyre dhe u lëshuan gjashtë paralajmërime”, njoftojnë nga AUV.

Kontrollet zbuluan një sërë shkeljesh, duke përfshirë vendosjen e ushqimit të skaduar, përdorimin e mishit të ngrirë në përgatitjen e produkteve, si dhe etiketimin e papërshtatshëm të ushqimit.

Gjatë inspektimeve, u përcaktua se shtatë objekte nuk ishin të regjistruara si operatorë ushqimorë, tre nuk kryenin ekzaminime të detyrueshme shëndetësore për punonjësit, ndërsa 13 operatorë u gjetën me kushte higjienike dhe teknike të pakënaqshme.

AUV njofton se kontrollet kishin për qëllim të gjitha segmentet e zinxhirit ushqimor, me qëllim parandalimin e vendosjes së produkteve të pasigurta dhe shtypjen e tregtisë së paligjshme në pritje të festave.

Dega e Bashkimit Demokratik për Integrim në Çair ka reaguar ashpër ndaj, siç thotë, keqpërdorimit të buxhetit komunal nga ana e drejtuesve të Komunës së Çairit, duke akuzuar se mjete publike po shpenzohen për aktivistë partiakë, ndërsa punonjëset në çerdhe po mbeten pa kompensimet minimale.

Sipas reagimit të BDI-Çair, në platformën Open Finance figuron një pagesë mujore prej rreth 1000 eurosh nga Komuna e Çairit për Haqim Ramadanin, ish-drejtor dhe kandidat për kryetar komune nga një komunë tjetër, i cili, sipas tyre, nuk jeton në Çair, nuk është taksapagues i kësaj komune dhe nuk ka lidhje me nevojat reale të qytetarëve të saj.

Nga ana tjetër, BDI thekson se edukatoret dhe mësimdhënëset në çerdhet e Çairit kanë mbetur për gjashtë muaj pa pagesën shtesë prej vetëm 100 eurosh, çka, sipas tyre, ka sjellë largimin e shumë prej tyre nga vendet e punës.

“Para për partiakët ka, ndërsa për edukatoret që kujdesen për fëmijët e Çairit nuk ka. Ky është realiteti që e ka krijuar Izet Mexhiti,” thuhet në reagim, ku kjo situatë cilësohet si “keqpërdorim moral, politik dhe institucional i komunës”.

BDI-Çair vlerëson se kryetari aktual ka humbur çdo kredibilitet për të folur për përgjegjësi dhe zhvillim, duke kërkuar dorëheqjen e menjëhershme të Izet Mexhitit.

“Nuk do të ndalemi deri në momentin që ai largohet dhe Çairit t’i kthehet dinjiteti institucional,” përfundon reagimi i degës së BDI-së në Çair.

Kryetari i Komunës së Tetovës, Bilall Kasami, ka njoftuar për përfundimin dhe promovimin e katër rrugëve në lagjen Drenovec.

Sipas tij, bëhet fjalë për rrugët 152, 153, 154 dhe 155, të cilat përfshijnë një sipërfaqe totale prej 5,478 metrash katrorë. Kasami theksoi se ky projekt është pjesë e angazhimeve të realizuara ndaj qytetarëve.

“Ta gëzojnë banorët e lagjes Drenovec! Edhe një premtim i mbajtur!”, ka deklaruar ai.

Ky investim synon përmirësimin e infrastrukturës rrugore dhe kushteve të jetesës për banorët e kësaj zone./Zyrtare.net