Lajme

Zejdi: VMRO-ja ka kërkuar një partner te shqiptarët që do t’i shërbejë kauzës së saj

Në seancën e sotme në Kuvend, Skender Rexhep Zejdi, kryetari i Partisë Populli dhe pjesë e Frontit Europian, ka shprehur shqetësimin se shteti po kthehet mbrapa, bazuar në tre dimensione: prishjen e ekuilibrit ndëretnik, majorizimin ndaj shqiptarëve dhe qytetarëve të tjerë, si dhe bllokimin e rrugës së anëtarësimit të vendit në BE.

Në këtë kontekst, sipas tij VMRO-ja ka kërkuar një partner te shqiptarët për të përmbushur kauzën e saj. Ai tha se Fronti ka legjitimitetin e shqiptarëve, romëve, turqve dhe boshnjakëve, duke u bazuar në zgjedhjet parlamentare dhe presidenciale. Ndërsa përfaqësimi i VLEN-it në këtë qeveri është i dobët, dhe me një zëvendëskryeministër që nuk mund ta mbrojë Marrëveshjen e Ohrit.

“Duke ndjekur programin qeveritar ne pamë vetëm një gjë që shteti po kthehet mbraba. Këtë e them duke u bazuar në tre dimensione, e para është prishja e ekuilibrit ndëretnik, e dyta është majorizimi ndaj shqiptarëve dhe qytetarëve tjerë, dhe e treta është bllokimi i rrugës së anëtarsimit të vendit në BE.

Vmro-ja ka kërkuar një partner te shqiptarët që do t’i shërbejë kauzës së saj. Janë marrë vesh që VMRO-ja t’i bëjë PR-n e VLEN-it, u kanë ndihmuar që të marrin dhe vota. Më 8 maj Fronti Europian fitoi në 12 komuna, në krahasim me VLEN-in që fituan vetëm 6 komuna.

Fronti ka legjitimitetin e shqiptarëve, romëve, turqve dhe boshnjakëve, fornti i fitoi si zgjedhjet parlamentare dhe ato presidencialet. Legjitimiteti është kërkesë për tu pranuar indentiteti kombëtar i turqve, boshnjakëve, romëve, dhe shqiptarëve.

Sa i përket përfaqësimit të VLEN-it në këtë qeveri, asnjëher ska pasur përfaqësim më të dobët të shqiptarëve në vend, ju mund ta shikoni dhe zëvndëskryeministrin e vendosur, është një prorus i cili nuk mundet ta mbrojë Marrëveshjen e Ohrit, duhet që të kërkojnë që ai të mos jetë zëvendëskryeminsitër.

Mesazhi i VMRO-së është i qartë se çdo herë ka pasur zëvendëskryeministra shqiptar ndërsa sot sollën një serb, me mesazhin se Maqedonia është e maqedonasve dhe e etnive tjera. Kërkesa dhe programi i VLEN-it nuk ekziston askund në programin qeveritar të VMRO-së, tha Zejdi.

Lajme

Kush është Valdrin Uka, drejtori i ri ekzekutiv i Shkëndijës

Më shumë se shtatë vite pjesë e klubit, Uka është një nga kuadrot e rritura dhe të përgatitura brenda strukturave të Shkëndijës, ndërsa ndryshimet e fundit pasqyrojnë planin e klubit për të ndërtuar një menaxhment të qëndrueshëm me njerëz nga brenda.

Ndryshimet e fundit në strukturën e KF Shkëndija nuk janë të rastësishme. Përtej emërimeve të reja në pozita drejtuese, ato pasqyrojnë një filozofi të qartë të klubit për të përgatitur kuadro nga brenda dhe për t’u besuar atyre përgjegjësi gjithnjë e më të mëdha.

Në qendër të këtij riorganizimi është Valdrin Uka, i cili është emëruar Drejtor Ekzekutiv i Shkëndijës. Uka është pjesë e klubit prej më shumë se shtatë vitesh dhe gjatë kësaj periudhe ka qenë pranë strukturave drejtuese, duke ndjekur nga afër funksionimin dhe zhvillimin e klubit. Vitet e kaluara në menaxhmentin e Shkëndijës e kanë shërbyer si një proces i gjatë përgatitjeje dhe kalitjeje për përgjegjësinë e re.

Në të njëjtën linjë janë edhe ndryshimet në Departamentin Sportiv. Erhan Selimi, deri tani Drejtor i Shkollës së Futbollit, avancon në pozitën e Drejtorit Sportiv, ndërsa Festim Ademi, pas rolit të Team Menaxherit, emërohet Drejtor Teknik i Departamentit Sportiv.

Të tre emërimet kanë një të përbashkët: bëhet fjalë për njerëz që tashmë njohin nga afër klubin, strukturën dhe mënyrën e funksionimit të tij. Kjo tregon se Shkëndija prej kohësh ka punuar në krijimin dhe përgatitjen e kuadrove të veta për pozita udhëheqëse.

Me vizionin dhe mbështetjen e drejtuesve dhe sponsorit të klubit, ndryshimet janë pjesë e një plani për një organizim më të balancuar dhe më profesional, duke ndjekur modelin e klubeve moderne ku investimi nuk bëhet vetëm te skuadra, por edhe te njerëzit që e drejtojnë dhe e zhvillojnë organizatën.

Në këtë drejtim, Shkëndija po tregon se kuadrot nuk kërkohen vetëm jashtë klubit, por ndërtohen, zhvillohen dhe përgatiten edhe brenda tij.

Lajme

Ardian Cuculi e mbyll kapitullin si drejtor sportiv i Shkëndijës

Pas tre viteve në pozitën e Drejtorit Sportiv, Ardian Cuculi përfundon angazhimin e tij te Shkëndija, njofton klubi kuqezi.

Pas përfundimit të angazhimit të Ardian Cuculit në pozitën e Drejtorit Sportiv, mbyllet një tjetër kapitull në rrugëtimin e tij të gjatë me klubin kuqezi.

Ish-kapiteni dhe një prej emrave që ka dhënë kontribut të madh për Shkëndijën në periudha të ndryshme, Cuculi përfundoi karrierën e tij si futbollist pikërisht me ngjyrat kuqezi, për të vazhduar më pas për tre vite në pozitën e Drejtorit Sportiv, duke qenë pjesë e sukseseve historike.

Klubi tetovar e falënderon Ardian Cuculin për punën, përkushtimin dhe kontributin e dhënë gjatë gjithë viteve në Shkëndijë, duke i uruar shëndet, suksese dhe çdo të mirë në të ardhmen.