Lajme

Shkëndija fiton garën me Shkupin dhe Partizanin, zyrtarizon Ronaldo Websterin

Shkëndija e Tetovës ka zyrtarizuar mesditën e sotme prurjen e re në afatin kalimtar të dimrit, Ronaldo Webster. 22 vjeçari që luan si sulmues krahu te skuadra kuqezi vjen në formë huazimi për gjashtë muaj nga Bregallnica e Shtipit me detyrim blerje në verën e këtij viti kur pritet të firmos kontratë 3 vjeçare.

“Ndihem i kënaqur të jem këtu. Jam i motivuar dhe gati të jap gjithçka në fushë për këtë ekip me histori. Mund të presin shumë surpriza nga unë në këtë gjysmë sezoni. Shumë gola, shumë kontribut për këtë ekip. Unë pres që titulli kampion të vijë në Tetovë“, deklaroi Webster pas prezantimit me fanellën kuqezi.

Webster, i njohur edhe si Ronaldo Romario Webster, vjen te Shkëndija pas një periudhe të shquar te Bregallnica e Shtipit, ku ai shënoi 4 gola dhe dha 4 asiste në 18 takime kampionale gjatë 6 muajve të fundit.

Shkëndija e Tetovës me transferimin e Ronaldo Websterit në njëfar mënyre fiton edhe garën në merkato me Shkupin dhe Partizanin, të cilët gjithashtu ishin të interesuar për shërbimet e 22 vjeçarit nga Xhamajka.

Ndërkohë, për futbollistin në fjalë ofertë zyrtare ka pasur edhe Sherif Tiraspol, teksa vendimtare në këtë situatë ishte korrektësia e skuadrës së Bregallnicës që kishte pranuar ofertën e Shkëndijës dhe dërgoi lojtarin në Tetovë, duke iu përmbajtur marrëveshjes që kishte arritur./Telegrafi/

Lajme

“Merimanga” në aksion, largohen 135 makina në Qendër të Shkupit

135 makina të parkuara në mënyrë të parregullt janë larguar me automjetet speciale “Merimanga” në territorin e Komunës Qendër të Shkupit, gjatë javës së kaluar. Sipas Ndërmarrjes Publike “Parkingjet e Komunës Qendër”, automjetet janë larguar në periudhën nga 5 deri më 11 tetor, pasi pengonin zhvillimin normal dhe të sigurt të komunikacionit. Nga ndërmarrja njoftojnë se aksionet do të vazhdojnë çdo ditë, me qëllim rritjen e sigurisë në trafik dhe ndërgjegjësimin e shoferëve për parkimin e duhur.

Lajme

“Shpulla” rikthehet si mjet edukimi në bankat shkollore në Danimarkë

Qeveria e Danimarkës ka paraqitur një projektligj që do t’u lejojë mësimdhënësve të përdorin forcë fizike ndaj nxënësve në situata të caktuara, me qëllim ruajtjen e rendit dhe sigurisë në shkolla.

Sipas Ministrisë së Arsimit, ndërhyrja do të lejohet në rastet kur nxënësit pengojnë rëndë mësimin, rrezikojnë veten ose të tjerët, ushtrojnë dhunë fizike apo dëmtojnë pronën.

Forca fizike do të përdoret vetëm si masë e fundit, pasi të jenë provuar mënyra të tjera të ndërhyrjes. Ajo duhet të jetë proporcionale, sa më e butë dhe të zgjasë sa më pak.

Projektligji u paraqit në parlamentin danez më 8 tetor. Nëse miratohet, rregullat e reja pritet të hyjnë në fuqi në gusht të vitit 2027.
Propozimi ende nuk është miratuar.

Lajme

Digjet vetura zyrtare e zëvendësdrejtorit të Lotarisë Shtetërore

Një veturë zyrtare e Lotarisë Shtetërore të Maqedonisë, e përdorur nga zëvendësdrejtori i përgjithshëm Ahmet Miftari, është djegur gjatë natës, pas mesnate, në Shkup.

Informacioni është konfirmuar edhe nga Ministria e Punëve të Brendshme (MPB), e cila për median „Fokus“ bëri të ditur se bëhet fjalë për një automjet zyrtar të Lotarisë Shtetërore.

„Më 13.10.2026, në orën 02:12, në SPB Shkup, M.A. (42) nga Shkupi ka raportuar se në rrugën ‘Krste Asenov’ në Shkup ishte djegur një automjet i tipit ‘Beijing Beich’, me targa të Shkupit, në pronësi të Lotarisë Shtetërore të Maqedonisë, të cilin ai e kishte drejtuar më parë“, njoftojnë nga MPB.

Zjarri është shuar nga Brigada e Zjarrfikësve, ndërsa policia po ndërmerr masa për zbardhjen e plotë të rastit.