Lajme

VMRO-DPMNE-ja kërkon zbardhjen e shkeljeve në Lotarinë Shtetërore

VMRO-DPMNE-ja kërkon nga policia dhe prokuroria që të zbardhin shkeljet ligjore të konstatuara nga Qeveria mbi dyshimet se Lotaria Shtetërore ka ndarë licenca në kundërshtim me ligjin ndaj disa kompanive që organizojnë lojëra të fatit dhe bixhoz online.

“Lotaria pa licencë ka dhënë licenca për dy kompani të afërta me LSDM-në dhe BDI-së njëra nga Strumica tjetra nga Shkupi të cilat ndër vite i kanë borxh shtetit dhe kanë funksionuar në kundërshtim me ligjin. Për xhepin e kujt kanë punuar ato shoqëri tregtare dhe kush i ka mbuluar, këtë duhet ta thonë LSDM-ja dhe BDI-ja. Dyja shoqatat nuk kanë paguar tatim ndër vite duke shkelur disa ligje, veprim që ka dëmtuar buxhetin e shtetit. Njëra nga shoqatat është themeluar në vitin 2022 dhe nga atëherë nuk ka paguar asgjë nga obligimet që i ka me ligjin për lojërat e fatit dhe ligjin për tatim”, tha Marija Miteva, VMRO-DPMNE.

Ministria e Brendshme njofton shkurt se është hapur procedurë për të vërtetuar dyshimet dhe informacionet e Ministrisë së Financave.

“Për rastin “Lotaria Shtetërore” ju njoftojmë se është pranuar denoncimi nga Ministria e Financave dhe është hapur procedurë. Departamenti për luftë kundër krimit të organizuar dhe krimit serioz është duke vepruar për të vërtetuar dyshimet dhe informacionet për dhënien e licencave në mënyrë jo ligjore nga ana e Lotarisë Shtetërore”, njoftojnë nga Ministria e Punëve të Brendshme.

Javën e kaluar Qeveria përveç që i morri licencën dy kompanive që nuk kanë paguar tatim ndaj shtetit, gjithashtu konstatoi se Lotaria Shtetërore ka ndarë licenca në kundërshtim me ligjin. Kryeministri, Hristijan Mickoski tha se një veprim i tillë është bërë me lejen dhe kërkesën e disa ish ministrave nga Qeveria e kaluar. /Alsat.mk

Lajme

Alpinisti i vdekur në Majën e Titos është nga fshati Xhepçisht?!

Personi që humbi jetën sot në zonën e “Kodrës së Diellit”, përkatësisht në afërsi të Majës së Titos, mësohet se është nga fshati Xhepçisht i Komunës së Tetovës, mëson tetova1

Sipas informacioneve të para, bëhet fjalë për një person mbi 70-vjeç, i cili kishte dalë në zonën malore si alpinist. Për shkak të terrenit të vështirë dhe të paarritshëm me mjete të zakonshme, trupi i pajetë është transportuar me helikopter nga zona malore. Autoritetet pritet të japin më shumë detaje lidhur me rrethanat e ngjarjes./tetova1.mk

Lajme

Maran e la jashtë listës së Kombëtares, reagon Jasir Asani

Jasir Asani ishte një nga befasitë e trajnerit Maran, pasi mëngjarashi nuk ishte pjesë e listës me 29 futbollistë të grumbulluar për 4 ndeshjet e kombëtares në Ligën e Kombeve.

Këtë Asani nuk e ka “kapërdirë” dot dhe ka reaguar në rrjetet sociale. Asani ka “ironizuar”, me dy postime të bëra.

“Po rri urtë, se e di veten. Historia nuk harrohet kurrë. Më mirë të mos flas më…”, shkruan Jasir Asani në rrjetet sociale.

Lajme

Këto janë të dhënat që nuk duhet t’ia jepni ChatGPT-së

ChatGPT është bërë pjesë e përditshmërisë së shumë njerëzve, të cilët e përdorin për gjithçka, nga recetat dhe CV-të, deri te këshillat për shëndetin dhe problemet në punë.

Por përdorimi gjithnjë e më i madh i chatbotëve po ngre shqetësime te ekspertët e privatësisë, të cilët paralajmërojnë se disa informacione personale dhe konfidenciale nuk duhet të ndahen në bisedat me inteligjencën artificiale.

Sipas ekspertëve të cituar nga “HuffPost”, përdoruesit duhet të shmangin ndarjen e të dhënave që mund t’i identifikojnë drejtpërdrejt.

Të dhënat personale

Emri i plotë, adresa, numri i telefonit, numri personal, të dhënat e pasaportës, patentës apo dokumenteve të tjera zyrtare janë ndër informacionet që këshillohet të mos ndahen.

Ekspertët rekomandojnë që edhe para ngarkimit të një dokumenti për analizë të hiqen të dhënat që mund të identifikojnë personin.

Problemet dhe informacionet intime

Komunikimi natyral me chatbotët mund t’i bëjë përdoruesit të ndajnë histori familjare, probleme personale apo informacione intime.

Ekspertët paralajmërojnë se një chatbot nuk duhet trajtuar si psikolog, mjek apo avokat, pasi nuk ka të njëjtat detyrime profesionale dhe ligjore për konfidencialitet.

Dokumentet mjekësore
Raportet mjekësore dhe analizat laboratorike mund të përdoren për të marrë shpjegime nga inteligjenca artificiale, por këshillohet që paraprakisht të fshihen emri, datëlindja, numri personal dhe të dhënat e tjera identifikuese.
Informacionet e kompanisë

Raportet e brendshme, kontratat, të dhënat e klientëve, kodet burimore dhe dokumentet që mbrohen nga marrëveshjet e konfidencialitetit nuk duhet të ngarkohen pa autorizim.

Një veprim i tillë mund të krijojë probleme ligjore, kontraktuale ose rregullatore për punonjësin dhe kompaninë.

Të dhënat financiare

Numrat e llogarive bankare, të dhënat e kartave të kreditit, informacionet mbi investimet, të ardhurat dhe deklaratat tatimore janë gjithashtu informacione që duhet të mbahen larg chatbotëve.

Ekspertët këshillojnë përdoruesit të kontrollojnë cilësimet e privatësisë në platformat e inteligjencës artificiale dhe, kur është e mundur, të kufizojnë përdorimin e bisedave për trajnimin e modeleve.

Një alternativë është përdorimi i pseudonimeve ose përshkrimeve të përgjithshme në vend të emrave dhe të dhënave reale, duke i dhënë chatbotit kontekstin e nevojshëm pa ekspozuar informacionet personale apo konfidenciale.