Lajme

Shkon në histori regjimi i Bashar al-Asad në Siri

Sundimi 61-vjeçar i Partisë Baath në Siri ra sot kur kryeqyteti Damasku doli nga kontrolli i regjimit, raporton Anadolu.

Partia Socialiste Arabe Baath kishte ardhur në pushtet në Siri në vitin 1963, me një grusht shteti.

Në vitin 1970, Hafez al-Asad – babai i Bashar al-Asadit, udhëheqësit të saporrëzuar të Sirisë – mori pushtetin në një grusht të brendshëm partiak dhe u bë president në vitin 1971.

Pas vdekjes së babait të tij në vitin 2000, Bashar al-Asad mori përsipër regjimin Baath.

Sundimi i Asadit dhe regjimit Baath përfundoi kur grupet kundër regjimit hynë në kryeqytetin Damask, duke mbyllur një seri zhvillimesh të shpejta dhe dramatike që nga fundi i muajit të kaluar.

Ndërsa lëvizjet popullore që kërkonin liri shpërthyen në Siri në vitin 2011, regjimi goditi me dhunë aktivistët për ndryshim.

Ndërhyrjet e regjimit, në të cilat u vranë mijëra njerëz, e kthyen procesin në një luftë civile.

Ndërsa grupet e armatosura të opozitës u angazhuan në një luftë të gjatë, regjimi refuzoi të zgjidhte konfliktin përmes diplomacisë dhe mjeteve paqësore, pavarësisht presionit ndërkombëtar, përfshirë nga aktorët rajonalë.

Pas përleshjeve që u intensifikuan më 27 nëntor, regjimi humbi kontrollin e shumë rajoneve në vend, duke filluar nga Halepi, Idlibi dhe Hama.

Më në fund, me daljen e njerëzve në rrugë në kryeqytetin Damask, forcat e regjimit filluan të tërhiqen nga institucionet publike dhe rrugët, ndërkohë që grupet kundër regjimit shtuan kontrollin e tyre mbi qendrën e qytetit.

Me dorëzimin e kryeqytetit nga forcat e Asadit, 61 vitet e regjimit të përgjakshëm Baath dhe 53 vitet e sundimit të familjes Asad morën fund.
– Deklarata e kryeministrit të regjimit të rrëzuar

Në një video-mesazh në mediat sociale, Mohammad Ghazi al-Jalali, kryeministër i qeverisë së Bashar al-Asadit, tha se janë të gatshëm të punojnë me një qeveri të re të zgjedhur nga populli në Siri dhe të ofrojnë të gjitha llojet e mbështetjes.

Duke kërkuar që prona publike të kursehet nga çdo dëm, Jalali tha: “Po i shtrijmë dorën opozitës, e cila tha se nuk do të prekte askënd dhe na zgjati dorën”.

“Siria u përket të gjithë sirianëve. Ky vend mund të jetë një vend normal, ky vend mund të ketë marrëdhënie të mira me fqinjët dhe botën”, shtoi ai.

“Kjo zgjedhje varet nga qeveria që do të zgjedhë populli sirian. Ne jemi të gatshëm të bashkëpunojmë me qeverinë e re të zgjedhur. Jemi të gatshëm t’u ofrojmë atyre të gjitha llojet e mbështetjes dhe t’u transferojmë lehtësisht dosjet shtetërore”, tha ai.

– Deklaratë e udhëheqësit të grupit Hayat Tahrir al-Sham

Abu Mohammed al-Jolani, udhëheqës i grupit të armatosur kundër regjimit Hayat Tahrir al-Sham (HTS), paralajmëroi kundër afrimit në institucionet publike në Damask, duke thënë në mediat sociale: “Këto institucione do të qëndrojnë nën mbikëqyrjen e ish-kryeministrit derisa të jenë dorëzuar zyrtarisht”.

“Ndalohet rreptësisht afrimi në institucionet publike”, tha ai, duke shtuar: “Ndalohet edhe gjuajtja në ajër”.

– Zhvillimet në Siri

Më 27 nëntor, shpërthyen përleshje midis forcave të regjimit të Asadit dhe grupeve të armatosura kundër regjimit në zonat rurale në perëndim të Halepit, një qytet i madh në Sirinë veriore.

Më 30 nëntor, grupet kundër regjimit morën nën kontroll pjesën më të madhe të qendrës së Halepit nga forcat e regjimit dhe në të njëjtën ditë ata morën kontrollin mbi gjithë provincën Idlib. Të enjten, pas përleshjeve të ashpra, grupet morën qendrën e qytetit Hama nga forcat e regjimit.

Grupet kundër regjimit morën disa vendbanime në provincën e rëndësishme strategjike të Homsit, një portë drejt kryeqytetit Damask, dhe filluan të përparojnë atje.

Të premten, grupet e armatosura të opozitës filluan një operacion në provincën Daraa në kufirin e Sirisë me Jordaninë dhe rimorën qendrën e qytetit nga forcat e regjimit pas përleshjeve.

Të shtunën, e gjithë provinca e Suwayda në Sirinë jugore ra nën kontrollin e grupeve opozitare. Në të njëjtën ditë, grupet lokale të opozitës në Quneitra morën gjithashtu kontrollin e qendrës së provincës.

Në Homs, forcat kundër regjimit morën kontrollin e qendrës së provincës të shtunën.

Grupet që përparonin kundër forcave të regjimit të Asadit hynë në periferitë jugore të Damaskut më vonë të shtunën. Forcat e regjimit u tërhoqën gjithashtu nga ministria e mbrojtjes dhe ajo e brendshme dhe nga aeroporti ndërkombëtar në Damask.

Ndërsa grupet e armatosura kundër regjimit filluan të dominojnë në kryeqytet, regjimi i Asadit të dielën në mëngjes humbi shpejt çdo kontroll mbi Damaskun.

Në operacionin “Agimi i Lirisë” të nisur nga Ushtria Kombëtare Siriane opozitare kundër organizatës terroriste PKK/YPG në zonat rurale të Halepit më 1 dhjetor, qendra e rrethit Tel Rifaat u çlirua nga terrorizmi.

Lajme

Tregjet plot, qytetarët po përgaditen për festën e Kurban Bajramit

Me afrimin e festës së Kurban Bajramit, qytetarët kanë filluar përgatitjet tradicionale që shoqërojnë këtë ditë të rëndësishme për besimtarët myslimanë. Në tregje dhe dyqane vërehet një gjallërim i shtuar, ku kërkesa për produkte ushqimore dhe ëmbëlsira festive, si bakllavaja, është në rritje. Por krahas atmosferës festive, qytetarët përballen edhe me çmime të ndryshuara të produkteve, ndërsa shumë prej tyre po planifikojnë nëse do të therrin kurban këtë vit. Ne ishim në terren për të parë nga afër se si po përgatiten qytetarët dhe shitësit për Kurban Bajramin dhe se çfarë atmosfere mbizotëron në prag të festës.

Qytetar, shitës

“Interesim ka më shumë tek arrat, edhe tek bonbonat, çokollatat, po harxhohen momentalisht më mirë është si kundër tjera dit, më mirë është. Arrat vjet i kemi pasur 450 denarë ja çmimi përsëri i ke 450 denarë i njëjti çmim është si vjet si sivjet. Po qytetarët normal, ankesa ka, se gjërat e tjera janë më shtrejtë, jo matura, ka harxhime më shumë, tash dy tre festa kanë ardhur përmenjëherë aty është problemi, por përsëri ka interesim harxhohen. Normal me bakllavë, me mysafir, me tana të mirat si krejt edhe ne. Kuptimi është shumë i madh kush e kupton. Duhet me shku me hecë, me bo izaret familjen, e jo vetëm për një ditë. Tash duhet pak më mirë me e vazhdu traditën”.

Qytetar

“Shumë mirë mezi se e presim. Jo jo nuk i kemi renet për kurban, nuk janë edhe shumë shtrenjtë por neve nuk po na e qet me rrogë të vogël. Po takimet me familjarët, tek vllaznia, tek minxhallarët e kështu. Nuk mungon mishi, patjetër mishi është. Ëmbëlsira bakllava e ka vendin e parë. Dashuri, më të mira tana. Po kemi blerë, nësë jo për fëmijët për kë”.

Qytetar

“po, kismet, nuk është i shtrenjtë, mundet edhe me lirë por mirë është. Traditat fetare edhe kombëtare. Krejt, azgjë nuk mungon, krejt janë tradicionale me bakllavë e me krejt”.

Ndërkohë, një shitës ka folur për rritjen e çmimeve. Ai ka thënë se rritja e çmimeve në përgjithësi i ka detyrur që të rrisin edhe ata çmimet e produkteve elementare.

Qytetar, shitës

“Po për festën e bajramit tash marrin bakllavë, kadaif, arra për festat më shumë shkojnë këto, bakllava ka më shumë interesim për bajram,ka interesim më shum se sa ditëve të tjera. Mirë e presim me punë me festë. Po ka dallim te çmimet, janë rrit pak nuk janë si më parë, çdo artikull ka hyp edhe ne e kemi hyp çmimin. Po kanë ankesa, kanë mungesa të rrogave. Po bakllavën, kadaifin ajo është tradita e bajramit, si mos të ketë bakllavë nuk ka bajram”.

Qytetar

“Mir, si zakonisht mirë është, mesiguri po, në krahasim me vitet e tjera mirë është, prapë mirë është. Si zakonisht që i kan bë edhe ne i bëjmë, si të parët e tonë edhe ne. Po zbesoj që mungon dicka krejt janë si zakonisht, në përgjithësi të gjitha nga pak. Po normal, normal, si zakonisht si zakonisht krejt traditat tona që janë shqipëtare, krejt ato. Po në atë kuptimin e plotë dihet fetar, me rrëndësi është inshaallah çka është më mirë në këtë vit edhe për në kurban bajram po edhe çdoher të jemi mirë”.

Ndërsajanë duke u përmbyllur blerjet për Kurban Bajram, tregjet vazhdojnë të jenë të mbushura me lëvizje dhe gjallëri. Atmosfera e festës po ndihet gjithnjë e më shumë në çdo cep të qytetit, në pritje të ditës së Kurban Bajramit.

Anida Murati /SHENJA/

Lajme

Interesimi i madh për blerjen e kurbanëve, pavarësisht çmimeve të larta

Tregjet e shitjes së kurbanëve nuk janë mbushur veç me kurbana, por janë mbushur edhe me qytetarë që, pavarësisht sfidave ekonomike dhe rritjes së çmimeve, vazhdojnë ta ruajnë me përkushtim këtë traditë fetare.

MEVLUDIN IMERI –GAZETAR

Në vigjilje të festës së Kurban Bajramit, interesimi për blerjen e kurbanëve nga ana e qytetarëve është rritur, e kjo vërehet në pikat e shitjes së kurbanëve. Çmimi i kurbanëve, varion nga lloji dhe madhësia e kafshës që qytetarët e duan. Por, se ka dallime në çmime nga viti i kaluar, e pranojnë edhe vet shitësit.

Edhe qytetarët e konfirmojnë ndryshimin e çmimeve nga viti në vit, por thonë se Kurban Bajrami mbetet një obligim shpirtëror dhe një traditë që nuk mungon në familjet e tyre.

BLERËS

E pam që morët kurban? A prisni për çdo vit kurban Po presim për çdo vit, këtë vit do të prisni dele? Po kismet. A e vëreni dallimin në çmime, po ka dallim, lëviz çmimi për çdo vit.

Shitësit shprehen të kënaqur nga interesimi i qytetarëve por e pranojnë edhe faktin se çmimet kanë ndryshuar për dallim nga viti i kaluar.

SHITËS

A ka interesim? Po, ka interesim, ai që e ka menden me ble, vjen nuk bën shumë pauar e merr shkon, Allahu ishalla ja ban kabull. Çmimi ka pak dallim, po malli i mirë gjithmonë vlerësohet. Fillojnë nga 250, 300, 350, ka edhe 200, po simbas mallit edhe pazari.

Për shumë besimtarë, prerja e kurbanit nuk është vetëm një rit fetar, por edhe simbol i solidaritetit, sakrificës dhe ndihmës për familjet në nevojë. Ndërsa festa afrohet, atmosfera festive dhe përgatitjet për kremtim tashmë ndihen në çdo treg të shitjes së kurbanëve.

Lajme

MPB del me sqarim për të shtënat në Haraçinë

Rasti i djeshëm në Haraçinë i cili bëri bujë në opnion, ku policia ka shtënë me armë zjarri, pasi të njëjtët kanë tentuar ta ndalojnë një kamion, i cili ishte i ngarkuar me dru, sot nga Ministria e Punëve të Brendshme kanë dalë me sqarim rreth ngjarjes. Sipas MPB-së, policia gjatë ditës së djeshme ka shtënë me armë në formë paralajmëruese gjatë ndjekjes së një personi të dyshuar për kontrabandë me dru.

MINISTRIA E PUNËVE TË BRENDSHME

“Më 24.05.2026 rreth orës 12:00, në hyrje të fshatit Haraçinë, në rajonin e Shkupit, zyrtarët policorë i kanë dhënë shenjë për ndalim një kamioni të ngarkuar me dru, por shoferi nuk është ndalur dhe ka vazhduar lëvizjen. Më pas, shoferi e ka drejtuar kamionin drejt policëve dhe automjetit zyrtar, pas së cilës policët kanë shtënë plumba paralajmërues në ajër. Shoferi i ka shkarkuar drutë në rrugë dhe është larguar me automjetin në drejtim të panjohur. Nuk ka persona të lënduar, ndërsa drutë i janë dorëzuar Policisë Pyjore. Po ndërmerren masa për gjetjen e shoferit dhe automjetit”.

Reagim për këtë ngjarje ka bërë edhe kryetari i komunës së Haraçinës, Daut Beqiri, i cili thotë se çdo aksion nga policia duhet të zhvillohet me profesionalizëm dhe kujdes maksimal ndaj sigurisë së qytetarëve.

DAUT BEQIRI, KRYETAR I KOMUNËS SË HARAÇINËS

“Menjëherë pas rastit të ndodhur në Haraçinë, dola në vendin e ngjarjes për ta parë nga afër situatën dhe për të biseduar me qytetarët. Fatmirësisht nuk pati të lënduar, por shqetësimi tek banorët ishte i madh, pasi ngjarja ndodhi në një zonë të banuar me familje. Si kryetar komune, jam për zbatimin e ligjit dhe ruajtjen e rendit, por çdo aksion duhet të zhvillohet me profesionalizëm dhe kujdes maksimal ndaj sigurisë së qytetarëve”.

Beqiri kërkon nga institucionet kompetente që rasti të shqyrtohet me seriozitet, në mënyrë që siç tha, raste të tilla të mos përsëriten dhe qytetarët të ndihen të sigurt në vendin e tyre.