Lajme

Aeroplani i rrëzuar në Kazakistan, u godit gabimisht nga një raketë?

Një avion pasagjerësh që kishte në bord 67 persona, mes të cilëve 42 azerbajxhanë, 16 rusë, 6 kazakë dhe 3 kirgizë e që po udhëtonte nga Baku i Azerbajxhanit drejt Groznyt në Çeçeni, u rrëzua në orët e para të së mërkurës, në afërsi të qytetit Aktau të Kazakistanit.

Si pasojë e kësaj përplasjeje, autoritetet kazake njoftuan se 29 persona mbijetuan, ndërsa 38 të tjerë mbetën të vdekur.

Nisur nga hetimet e deritanishme, gjithnjë sipas mediave në Kazakistan, dy mbeten pistat kryesore që mund të jenë shkak i këtij aksidenti ajror.

Raportet fillestare tregojnë se gjatë fluturimit avioni ka ndeshur një tufë zogjsh duke pësuar kështu dhe goditjen që rezultoi me rënien në tokë.

Një tjetër hipotezë që po vlerësohet, sipas burimeve ukrainase që sjellin një version të ri të këtij aksidenti, është se avioni u godit gabimisht nga sistemet ruse të mbrojtjes ajrore çeçene.

Anton Gerashenko, këshilltar i Ministrisë së Brendshme të Kievit, nga profili i tij në Telegram, vë në qendër të vëmendjes disa të dhëna.

“Videot e disponueshme, theksonin dëmtimin e një krahu të avionit dhe të trupit të tij. Avioni u përpoq të ulej në Grozny dy herë, por nuk u autorizua. Gjatë përpjekjes së tretë, një shpërthim ndodhi në një distancë të shkurtër nga avioni: mund të ishte shkaktuar nga sistemet e mbrojtjes ajrore”, tha Anton Gerashenko.

Sipas kësaj hipoteze, aeroplani ka përsëritur tre herë manovrën e uljes për shkak të motit të keq. Duke tentuar uljen, personeli çeçen i mbrojtjes kundërajrore mund të jetë ngatërruar nga manovra e aeroplanit dhe kanë menduar se mund të ketë qenë dron ukrainas. Kjo për shkak se ditët e fundit, dronët ukrainas kanë goditur disa herë kryeqytetin çeçen, Grozny.

Aeroplani i pasagjerëve që u rrëzua ishte një model Embraer, konkurrent modest i Beoing dhe Airbus. Embraer është një prodhim brazilian që ka të dhëna të shkëlqyera të sistemit të sigurisë. Avioni e kishte kaluar inspektimin e fundit Tetorin e kaluar. Ndërsa piloti kryesor kishte eksperiencë 15 mijë orë fluturim.

Çka pritet të hedhë më shumë dritë për shkaqet e rrëzimit është kutia e zezë e aeroplanit, ku pas analizës do të dëgjohen komunikimet e fundit të pilotëve me qendrën e kontrollit. /tvklan.al

Lajme

Kumanovari dhuron 26 mijë euro për rrugën që mundëson qasjen në xhaminë më të vjetër në rajon

Husejn Bajrami, djali i të ndjerit hoxhë Nexhmedin Bajrami nga Kumanova, ka financuar blerjen e rrugës që mundëson qasjen në Xhaminë “Koxha Mehmed Beu” në fshatin Tabanoc.

Marrëveshja për blerjen u nënshkrua më 19 tetor 2026, në prani të myftiut të Kumanovës, h. Abedin ef. Imeri, dhe anëtarëve të familjes Selmani nga Llojani.

Rruga ka një sipërfaqe prej 529 metrash katrorë, me gjerësi prej shtatë metrash, ndërsa vlera e blerjes arrin në 26.450 euro, shumë e paguar nga Husejn Bajrami.

Muftinia e Kumanovës e falënderoi z.Bajrami për këtë kontribut, si dhe familjen Selmani për bashkëpunimin, duke shprehur lutjen që kjo vepër të pranohet si sadaka dhe të shpërblehet me të mira.

Lajme

Të dielën nis ora dimërore, akrepat lëvizin një orë prapa

Ora verore këtë vit përfundon të dielën, më 25 tetor në orën 3:00 të mëngjesit duke u zhvendosur një orë prapa.

Në vitin 2018, Komisioni Evropian shqyrtoi heqjen e ndërrimit të kohës sezonale dhe më pas zhvilloi një konsultim publik në të cilin morën pjesë rreth 4.6 milionë njerëz.

Megjithatë, ndonëse 84 përqind e të anketuarve ishin në favor të heqjes së tij, anëtarët nuk arritën të arrinin një marrëveshje se cila kohë do të ishte e përhershme, kështu që propozimi nuk u zbatua.

Vendet e BE-së ende kalojnë në orën e verës në pranverë dhe në orën e dimrit në vjeshtë.

Në Azi, Kina, India, Japonia, Koreja e Jugut, Tailanda, Vietnami, Indonezia, Malajzia dhe Singapori nuk e përdorin kohën e kursimit të verës.

Kina e hoqi orën e verës në vitin 1991.

Në Lindjen e Mesme , Arabia Saudite, Emiratet e Bashkuara Arabe, Katari, Kuvajti dhe Bahreini nuk e ndryshojnë orën gjatë vitit.

Irani e hoqi ndërrimin sezonal të orës në vitin 2022, dhe që nga viti 2023 nuk e ndryshon më kohën midis verës dhe dimrit.

Në Amerikën e Jugut , Brazili, Argjentina, Kolumbia, Peruja dhe Ekuadori nuk e përdorin kohën sezonale.

Në Australi, rregullat ndryshojnë sipas shtetit. Uellsi i Ri Jugor, Viktoria, Australia Jugore, Tasmania dhe Territori i Kryeqytetit Australian po kalojnë në orën verore, ndërsa Queensland, Australia Perëndimore dhe Territori Verior nuk e ndryshojnë orën, raportoi portali Maariv.

Ndër arsyet për heqjen e ndërrimit të kohës sezonale janë funksionimi më i thjeshtë i jetës së përditshme , shmangia e problemeve në sistemet kompjuterike, transportin dhe biznesin, si dhe fakti që në vendet pranë ekuatorit, gjatësia e ditës nuk ndryshon ndjeshëm gjatë vitit.

Lajme

„Pesë veta rrahin një fëmijë dhe e filmojnë“: Dëshmi shqetësuese nga Tetova

Pesë të mitur, të moshës rreth 13 dhe 14 vjeç, sipas pretendimeve të një prindi, kanë ndaluar dy fëmijë 11-vjeçarë në qendër të Tetovës, i kanë kapur për fyti dhe janë përpjekur t’ua heqin xhaketat për të kontrolluar nëse mbanin veshje me simbolet e grupit të tifozëve „Vojvodi“. Incidenti, sipas prindit, ka ndodhur derisa fëmijët po shkonin në stërvitje.

Për rastin ka alarmuar publikisht Darko Gavro, i cili në një postim në grupin e Facebook-ut „Go ljubim Tetovo“ pretendon se djali i tij dhe një fëmijë tjetër janë keqtrajtuar pranë ëmbëltores „Geopiko“ dhe objektit „Nashe dete“.

Sipas dëshmisë së tij, fëmijët ishin rrugës për në Qendrën Sportive, ku duhej të merrnin pjesë në stërvitjen e klubit për fëmijë „Fit Kid“, kur u ndaluan nga grupi i të miturve.

„I kanë kapur për fyti dhe janë përpjekur t’ua heqin xhaketat për të parë nëse janë ‘Vojvodi’“, ka shkruar prindi.

Ai pretendon se njëri prej të miturve e ka filmuar incidentin me telefon celular. Sipas informacioneve që ka marrë, videoja ishte menduar të publikohej në një grup të veçantë në TikTok, ku, siç thotë ai, shpërndaheshin pamje të rrahjeve nëpër Tetovë.

Prindi bën të ditur se rasti është denoncuar në polici dhe se bashkëshortja e tij ka shkuar për të dhënë deklaratë.

Në postimin e tij, ai paralajmëron se nuk bëhet fjalë për një incident të izoluar, pasi pretendon se ka informacione edhe për raste të tjera të keqtrajtimit të fëmijëve, gjatë të cilave të miturve u janë hequr xhaketat dhe trenerkat.

„Policia hesht. Të gjithë e dinë dhe i lëshojnë fëmijët në rrugë me frikë“, ka shkruar Gavro, duke kërkuar shtim të pranisë policore dhe të patrullave nëpër Tetovë.

Ai u ka bërë thirrje publike edhe institucioneve përgjegjëse për delikuencën e të miturve që t’i hetojnë rastet e tilla, duke paralajmëruar se keqtrajtimi i fëmijëve nga grupe po shndërrohet në një problem serioz.

Deri më tani, informacionet për rrethanat e incidentit bazohen në dëshminë publike të prindit. Ministria e Punëve të Brendshme nuk ka dhënë konfirmim zyrtar për denoncimin, as për pretendimet lidhur me filmimin e organizuar dhe publikimin e incidenteve të tilla./Skopje1.mk