Lajme

VLEN: BDI dhe Jeton Shaqiri kanë shkatërruar arsimin

Raporti i Entit Shtetëror të Revizionit për vitin 2023 është një aktakuzë direkte kundër BDI-së dhe ish-ministrit të Arsimit Jeton Shaqiri. Ky raport ekspozon qartë nivelin e korrupsionit, paaftësisë dhe papërgjegjësisë kriminale që ka sunduar në Ministrinë e Arsimit nën drejtimin e BDI-së.

3.4 milionë euro janë harxhuar për një konvikt në Tetovë që nuk funksionon, pa ventilim, pa ushqim, pa kushte minimale për studentët. 18 milionë euro kredi studentore të papaguara që nga viti 1998, pa asnjë përpjekje për t’i zgjidhur. 13 milionë euro për libra shkencorë që as nuk janë shpërndarë, as nuk janë regjistruar, thjesht janë kalbur nëpër depo. 2.9 milionë euro për studentë jashtë vendit, pa asnjë strategji për t’i kthyer dhe angazhuar në vend.

Paratë u hodhën, rinia u braktis. Projekte ndërtimore të braktisura që nga viti 2016, që kërkojnë edhe 22 milionë euro të tjera për përfundim, një vrimë e zezë për buxhetin e shtetit.

Këto nuk janë thjesht dështime administrative. Kjo është vjedhje sistematike dhe krim i organizuar kundër arsimit! BDI ka shkatërruar të ardhmen e brezave të rinj dhe ka fundosur arsimin në kolaps të plotë.

Por ky nuk është i vetmi skandal i kohëve të fundit. Brenda një kohe të shkurtër, dy raporte negative nga Enti i Revizionit kanë ekspozuar keqpërdorimet e funksionarëve të BDI-së: Ky raport për Ministrinë e Arsimit dhe Jeton Shaqirin, dhe Raporti për keqpërdorimet në organizimin e samitit të OSBE-së në Shkup, gjatë kohës kur Bujar Osmani ishte ministër i Punëve të Jashtme, një tjetër dëshmi e papërgjegjësisë dhe mungesës së transparencës në menaxhimin e parasë publike.

VLEN kërkon hetim të menjëhershëm dhe përgjegjësi penale për të gjithë ata që kanë abuzuar me fondet publike. Askush nuk është mbi ligjin. Koha e hajnisë në arsim dhe institucione ka marrë fund.

VLEN sjell fundin e pandëshkueshmërisë së BDI-së dhe fillimin e llogaridhënies së vërtetë!

Lajme

Vjedhje prej 5 milionë eurosh në një nënstacion hekurudhor në Shkup

Në nënstacionin për tërheqje elektrike në Draçevë, mes stacioneve hekurudhore Lisiçe dhe Draçevë, është kryer një vjedhje e përmasave të mëdha, gjatë së cilës është shkatërruar një pjesë e konsiderueshme e pajisjeve elektroenergjetike, njoftoi Ndërmarrja për Infrastrukturë Hekurudhore.

Sipas informacioneve, hajdutët kanë rrëzuar me forcë dy transformatorë me peshë mbi 30 tonë, kanë derdhur vajin e transformatorëve dhe kanë vjedhur mbështjelljet e bakrit, si dhe tela bakri, shina dhe pajisje të tjera të domosdoshme për funksionimin e nënstacionit, i cili tani është plotësisht jashtë funksionit.

Nga ndërmarrja vlerësojnë se bëhet fjalë për një sulm serioz ndaj infrastrukturës kritike hekurudhore, me një dëm material të vlerësuar fillimisht rreth 5 milionë euro. Ata kërkojnë një hetim urgjent dhe përgjegjësi penale për autorët dhe për të gjithë ata që kanë qenë të përfshirë në vjedhje dhe në tjetërsimin e mëtejshëm të materialeve të vjedhura.

Lajme

Ministri i Shëndetësisë: Uji në Gostivar ende nuk është i sigurt

Ministri i Shëndetësisë, Sasho Klekovski, gjatë vizitës në Spiatalin Special për Sëmundjet e Mushkërive dhe Tuberkulozin në Leshkë të Tetovës bëri të ditur se situata me helmimin nga uji në Gostivar po përmirësohet dhe se kriza ka hyrë në një fazë qetësimi. Sipas të dhënave të fundit, numri i personave që kërkojnë ndihmë mjekësore është ulur ndjeshëm. Gjatë ditës janë regjistruar 80 raste të reja, që është rreth dy herë më pak krahasuar me ditët paraprake, ndërsa numri i përgjithshëm i të prekurve arrin rreth 4 mijë persona. Ministria e Shëndetësisë dhe institucionet kompetente tashmë kanë nisur një analizë të plotë epidemiologjike, me qëllim përcaktimin e saktë të zhvillimit të situatës dhe ndarjen e rasteve të shkaktuara nga epidemia prej rasteve të zakonshme të gastroenteritit. Megjithëse numri i pacientëve është në rënie, uji nga rrjeti i ujësjellësit të Gostivarit ende nuk lejohet të përdoret as për qëllime teknike, pasi analizat e fundit kanë treguar nivel të pamjaftueshëm të klorit.

SASHO KLEKOVSKI, MINISTËR I SHËNDETËSISË

“Siguria e ujit vlerësohet edhe përmes sasisë së klorit që përmban ai, por ende nuk është arritur niveli i kërkuar. Aktualisht po kryhen analiza të vazhdueshme në disa pika të ndryshme dhe, sapo klorinimi të arrijë nivelin e duhur, do të jepet leja për përdorimin e ujit teknik”.

Duke iu referuar informacioneve se edhe uji në Leshkë është i papërshtatshëm për konsum dhe nuk duhet të pihet, Klekovski tha se kjo situatë nuk është e re dhe nuk është mbajtur e fshehtë. Sipas tij, problemi në këtë zonë vazhdon prej më shumë se një dekade.

SASHO KLEKOVSKI ,MINISTËR I SHËNDETËSISË

“Gjatë kësaj jave pritet të kryhen dy testime për të vërtetuar se uji nga ujësjellësi nuk do të jetë më vetëm për përdorim teknik, por do të jetë i përshtatshëm edhe për pije, si për spitalin ashtu edhe për të gjithë banorët e zonës”.

Ndërkohë, ditët e fundit nga opozitarja LSDM kanë deklaruar se rasti i Gostivarit nuk është një rast i izoluar, por pasqyron dobësi sistemore dhe mungesë efikasiteti të institucioneve. Duke u thirrur në një raport të siguruar nga sinjalizues, kryetari i LSDM-së, Venko Filipçe, deklaroi se uji në Spitalin Special për Sëmundje të Mushkërive dhe Tuberkuloz në Leshkë ka qenë i ndotur. Ai kërkoi kontroll të jashtëzakonshëm urgjent dhe analiza të të gjitha sistemeve të furnizimit me ujë në vend. /SHENJA/

Lajme

2 turke arrestohen pasi i sulmuan policët në “Bit Pazar” të Shkupit

Më 24.07.2026 në orën 23:40, në zonën e Bit Pazarit, nëpunës policorë nga Stacioni Policor Bit Pazar i privuan nga liria B.D. (23) dhe E.D. (54), të dyja nga Turqia me qëndrim të rregulluar në Shkup, për shkak se kanë sulmuar fizikisht nëpunës policorë të cilët kanë kryer veprime zyrtare.

Të dy u ndaluan në stacion policor dhe pas dokumentimit të plotë të rastit kundër tyre do të ngrihet kallëzim përkatës.