Lajme

Në Tearcë të Tetovës shënohet dita e fasules

Me një manifestim kulturor e artistik, për të trembëdhjetën herë me radhë, në Tearcë të Tetovës shënohet dita e fasules. Mjeshtri i zierjes së fasules Dobre Nikollovski, thotë se e veçantia e fasules që zihet sot, është se ajo bëhet kajmak e shijshme.

“Kjo groshë është kajmak. Shumë mirë i zier, me mish viçi, me qepë, hudhër, biber, karotë dhe krejt kjo zihet dy ore apo tre, që të bëhet kajmak grosha. Grosha na shton jetën, e tradita bashkëjetesën dhe i kënaqemi kësaj dite”, tha Dobre Nikollovski, Kuzhinier.

Grosha nuk është e vetmja që do zihet sot në Tearcë. Ka edhe një gatim tjetër që është shumë i mirë i njohur e tradicional. E kam afër meje zotëri Adem Alitin këtu që do kujdeset për ëmbëlsirën. Na thuaj atëherë çka përgatit?”

“Atëherë unë po përgatis hallvën, është tradicionale e mbetur nga kohërat e vjetra, dhe e bëjmë në ditën e groshës bashkë edhe ëmbëlsirën. Jam tu bë hallvë për të paktën 350 persona”, tha Adem Aliti, Kuzhinier.

Nuk mungonin as banorët, që mezi prisnin ta provojnë groshën, ndërsa banorët e Tearcës por edhe nxënësit, kishin përgatitur edhe ëmbëlsira të tjera për vizitorët.

“Rëndë gjendet grosha e Tetovës, por kur e blejmë të gjithë thonë është i Tetovës, edhe i avganistanit me qenë, por nëse jo tjetër emri ka mbet”, tha një banor.

“E përdorim groshën si se përdorim. Gatuajmë shpesh groshë por është bë 400 denar”, u shpreh një tjetër banor.

“Groshën e përdorim shumë gjithë njerëzit po është bë çmimi i lartë i groshës është bë sa mjalti, megjithatë njerëzit e pëlqejnë shumë e hanë”, theksoi një tjetër banor.

Organizatori këtij manifestimi, shpreson se në të ardhmen kjo do të bëhet tradicionale, ndërsa kërkon nga institucionet që të futet në agjendën e tyre të financimit dhe organizimeve vjetore.

“Përveç degustimit të groshës në ngjarje do ketë edhe shoqëri kulturore artistike, pra Xheladin Zeqiri dhe Jeni Hajat nga Tetova…Kemi edhe ekspozitë nga shkollat, prodhime bujqësore të Sharrit dhe lojëra të ndryshme për të rinjtë. Sivjet do e jenë edhe të ministrisë së bujqësisë dhe shpresojmë që të vetëdijsohen sivjet që në ardhmëri këtë ngjarje ta vendosin në programet e tyre për mbështetje të shoqatave dhe organizatave që implementojnë aktivitete të ngjashme”, tha Metin Muaremi, CED.

Ata që më shumë iu gëzuan Ditës së Groshës, ishin fëmijët, të cilët zunë të parët vendet e tyre dhe po prisnin ta shijojnë groshën./Alsat.mk

Lajme

Netanyahu: Irani shënjestroi një nga djemtë e mi

Kryeministri izraelit, Benjamin Netanyahu, ka deklaruar se Irani është përpjekur të vrasë një nga djemtë e tij ndërsa informacioni për komplotin e dyshuar është mbajtur i fshehtë për disa muaj.

Netanyahu e bëri deklaratën gjatë një interviste telefonike me korrespondentin ushtarak të Channel 14, Noam Amir, duke e lidhur kërcënimin me nevojën për masa të vazhdueshme sigurie për familjen e tij.

“Irani shënjestroi një nga djemtë e mi. U përpoq të vriste një nga djemtë e mi. Kjo është arsyeja pse kjo siguri nuk është luks. Pa të, ata do të kenë sukses”, tha Netanyahu.

Kryeministri izraelit nuk bëri të ditur se cili prej dy djemve të tij, Yair apo Avner, ishte objektivi dhe nuk dha detaje mbi mënyrën apo kohën kur dyshohet se ka ndodhur komploti.

Netanyahu tha gjithashtu se kishte komunikuar me kreun e Shin Bet, David Zini, të cilit i kishte kërkuar që të sigurojë mbrojtjen e përshtatshme për çdo kandidat për postin e kryeministrit, veçanërisht në periudhën e fushatës zgjedhore.

Deklaratat vijnë në një kohë tensionesh të larta mes Izraelit dhe Iranit, ndërsa Netanyahu u bëri thirrje gjithashtu aktorëve politikë që të tregojnë përmbajtje gjatë fushatës.

Lajme

“Lotaria” / Prokuroria me 231 prova dhe 7 dëshmitarë kundër Grubit dhe 7 personave të tjerë

Me shoqërim policor, ish zëvendëskryeministri i parë, Artan Grubi, nga paraburgimi u soll sot në Gjykatën Penale të Shkupit për seancën e parë gjyqësore lidhur me lëndën për shpërdorim e 8.2 milionë eurove në Lotarinë Shtetërore.

Grubi i shoqëruar nga dy avokatët, Goce Ristevski dhe Vlladimir Donevski u ul në bankën e të akuzuarit, ndërsa për veprën që i ngarkohet, Kodi Penal parashikon prej 1 deri në 5 vjet burg.

Krahas tij, sot në seancë janë paraqitur edhe 6 të akuzuar të tjerë. Në afërsi të tij, është ulur Metodija Dimovski, ish sekretar i Qeverisë, por edhe të akuzuarit Skender Memeti, Bojan Janev, Fatmir Ramadanovski, Bashkim Avdi dhe Aleksandar Dimitrieski. Mungoi vetëm ish drejtori i Lotarisë Përparim Bajrami, i cili është i akuzuar i parë në këtë lëndë, por që mbetet në arrati prej dhjetorit të vitit 2024.

Megjithatë seancë e sotme zgjati shkurt, meqë organi i akuzës nuk ua ka dorëzuar palëve provat. Për këtë, prokurorët e lëndës Daniel Kocev dhe Aleksandar Davçevski kishin përgatitur tetë pako me prova, të cilat i morën avokatët e të akuzuarve. Siç shpjeguan prokurorët, ata posedojnë listë me 231 prova materiale, të cilat thanë se do t’i prezantojnë brenda një seance gjyqësore, ndërsa ato verbale, respektivisht dëshmitë e 7 dëshmitarëve për 2 deri në 3 seanca, ndonëse kjo nuk mund të përcaktohet pasi do të varet edhe nga numri i pyetjeve të kryqëzuara nga ana e avokatëve të mbrojtjes.

Meqenëse mbrojtja nuk ka pasur mundësi të përgatitet për shkak se nuk i ka pasur provat, gjykatësja e lëndës Biljana Shuplinovska – Jovevski u dha dy javë kohë, respektivisht caktoi seancën e radhës për më 7 shtator. Deri atëherë, avokatët duhet t’i studiojnë provat e Prokurorisë, të përgatisin mbrojtjen dhe të dorëzojnë listë të tyre me prova.

Njëkohësisht, gjyqtarja në pajtim me palët caktoi dinamikën e gjykimit për periudhën e ardhshme, e cila sipas terminëve do të jetë mjaftë e ngjeshur. Gjatë muajit shtator, do të mbahen 6 seanca gjyqësore, ndërsa 7 të tjera janë caktuar në tetor.

Sipas Prokurorisë, Artan Grubi dhe 7 persona të tjerë akuzohen se kanë “Keqpërdorur detyrën zyrtare” pasi kanë qenë pjesë e operacionit për furnizimin e VLT aparateve për lojëra elektronike të fatit, për nevojat e Lotarisë Shtetërore edhe pse të njëjtat asnjëherë nuk janë përdorur, pasi që Lotaria Shtetërore nuk ka të drejtë ligjore për organizimin e pavarur të lojërave elektronike të fatit. Prokuroria e zhvilloi hetimin për veprën penale “Mashtrim në shërbim” për të cilën parashihet dënim me burg prej 4 deri në 20 vjet burg, megjithatë propozim akuzën e dorëzoi për vepër tjetër penale që parashikon dënim më të butë, respektivisht prej 1 deri në 5 vjet burg. /Alsat.mk

Lajme

E dhimbshme: Ky është kosovari që vdiq në detin e Shëngjinit

Një 18-vjeçar nga Kosova ka humbur jetën në zonën e Kunes, në Shëngjin, ndërsa burime të Klankosova.tv bëjnë të ditur se i riu është identifikuar si Shpëtim Syla.

I riu është gjetur pa shenja jete në ujë. Ende nuk janë të qarta rrethanat e sakta të ngjarjes, ndërsa autoritetet po hetojnë nëse 18-vjeçari është mbytur gjatë qëndrimit në det apo ka pësuar arrest kardiak.

Trupi i pajetë është transportuar në morgun e Lezhës, ku pritet t’i nënshtrohet ekspertizës mjekoligjore. Ekspertiza pritet të ndihmojë në përcaktimin e shkakut të vdekjes./Klankosova.tv