Lajme

Truproja e Mickoskit ka sulmuar policët, ministri i VMRO-së premton zbardhje të rastit

Shefi i sigurimit të kryetarit të VMRO-së Hristijan Mickoskit ka sulmuar fizikisht policët. Në ditën e djeshme në mbrëmje, para kafenesë “Mosh”në Shkup, Ivica Bisovski, ka sulmuar një punonjës policie. Ndërkaq, pas kësaj ministri Teknik i Punëve të Brendshme nga radhët e VMRO-së, Pançe Toshkovski, ka reaguar në profilin e tij në Fejsbuk, duke dënuar incidentin.

PANÇE TOSHKOVSKI, MINISTËR TEKNIK I PUNËVE TË BRENDSHME

“Për ngjarjen e lartpërmendur është njoftuar menjëherë prokurori publik kompetent, i cili ka dhënë udhëzime sipas të cilave janë duke u vepruar. Kam kërkuar që shërbimet kompetente në ministri të veprojnë në mënyrë sa më profesionale dhe në përputhje me procedurat standarde të punës, të gjitha me qëllim zbardhjen sa më të shpejtë të këtij rasti dhe për rezultatin e veprimeve të ndërmarra do të njoftohet menjëherë publiku.”

Pas këtij incidenti ka reaguar edhe LSDM duke thënë se sulmi ndaj policisë është sulm ndaj shtetit.

LSDM

“Sulmi ndaj policisë, sulmi ndaj policëve është sulm ndaj shtetit. Fjala është për të njëjtin Ivica Bisovski, i cili gjatë pandemisë së Covid-it ka qenë së bashku me Mickoskin në palestër dhe më pas në një lokal në rrugën Boemska, edhe pse ishte e ndaluar. DPMNE tregon çdo ditë fytyrën e saj të vërtetë dhunuese dhe kriminale. Kanë mjaftuar vetëm disa ditë pas hyrjes në Qeverinë teknike. Ky skandal hap shumë dilema për rolin e Mickoskit dhe VMRO-së. Presim sqarim të situatës nga ministri Toshkovski dhe Hristijan Mickoski. Ky skandal duhet të zbardhet plotësisht”

Në njoftimin e LSDM-së thuhet se shefi i sigurimit të Mickoskit u përpoq të parandalonte një bastisje të policisë për drogën. Sipas LSDM-së, institucionet duhet të veprojnë dhe të gjithë ata që janë të përfshirët duhet të mbajnë përgjegjësi.

Lajme

Kush është Valdrin Uka, drejtori i ri ekzekutiv i Shkëndijës

Më shumë se shtatë vite pjesë e klubit, Uka është një nga kuadrot e rritura dhe të përgatitura brenda strukturave të Shkëndijës, ndërsa ndryshimet e fundit pasqyrojnë planin e klubit për të ndërtuar një menaxhment të qëndrueshëm me njerëz nga brenda.

Ndryshimet e fundit në strukturën e KF Shkëndija nuk janë të rastësishme. Përtej emërimeve të reja në pozita drejtuese, ato pasqyrojnë një filozofi të qartë të klubit për të përgatitur kuadro nga brenda dhe për t’u besuar atyre përgjegjësi gjithnjë e më të mëdha.

Në qendër të këtij riorganizimi është Valdrin Uka, i cili është emëruar Drejtor Ekzekutiv i Shkëndijës. Uka është pjesë e klubit prej më shumë se shtatë vitesh dhe gjatë kësaj periudhe ka qenë pranë strukturave drejtuese, duke ndjekur nga afër funksionimin dhe zhvillimin e klubit. Vitet e kaluara në menaxhmentin e Shkëndijës e kanë shërbyer si një proces i gjatë përgatitjeje dhe kalitjeje për përgjegjësinë e re.

Në të njëjtën linjë janë edhe ndryshimet në Departamentin Sportiv. Erhan Selimi, deri tani Drejtor i Shkollës së Futbollit, avancon në pozitën e Drejtorit Sportiv, ndërsa Festim Ademi, pas rolit të Team Menaxherit, emërohet Drejtor Teknik i Departamentit Sportiv.

Të tre emërimet kanë një të përbashkët: bëhet fjalë për njerëz që tashmë njohin nga afër klubin, strukturën dhe mënyrën e funksionimit të tij. Kjo tregon se Shkëndija prej kohësh ka punuar në krijimin dhe përgatitjen e kuadrove të veta për pozita udhëheqëse.

Me vizionin dhe mbështetjen e drejtuesve dhe sponsorit të klubit, ndryshimet janë pjesë e një plani për një organizim më të balancuar dhe më profesional, duke ndjekur modelin e klubeve moderne ku investimi nuk bëhet vetëm te skuadra, por edhe te njerëzit që e drejtojnë dhe e zhvillojnë organizatën.

Në këtë drejtim, Shkëndija po tregon se kuadrot nuk kërkohen vetëm jashtë klubit, por ndërtohen, zhvillohen dhe përgatiten edhe brenda tij.

Lajme

Ardian Cuculi e mbyll kapitullin si drejtor sportiv i Shkëndijës

Pas tre viteve në pozitën e Drejtorit Sportiv, Ardian Cuculi përfundon angazhimin e tij te Shkëndija, njofton klubi kuqezi.

Pas përfundimit të angazhimit të Ardian Cuculit në pozitën e Drejtorit Sportiv, mbyllet një tjetër kapitull në rrugëtimin e tij të gjatë me klubin kuqezi.

Ish-kapiteni dhe një prej emrave që ka dhënë kontribut të madh për Shkëndijën në periudha të ndryshme, Cuculi përfundoi karrierën e tij si futbollist pikërisht me ngjyrat kuqezi, për të vazhduar më pas për tre vite në pozitën e Drejtorit Sportiv, duke qenë pjesë e sukseseve historike.

Klubi tetovar e falënderon Ardian Cuculin për punën, përkushtimin dhe kontributin e dhënë gjatë gjithë viteve në Shkëndijë, duke i uruar shëndet, suksese dhe çdo të mirë në të ardhmen.