Lajme

Analizë/ Kazinot në Tetovë – Pse kapitali kërkon paratë e shqiptarëve, por jo edhe pjesëmarrjen e tyre?

Industria e lojërave të fatit në Maqedoninë e Veriut prej vitesh mbetet një nga sektorët më të mbyllur, më pak transparentë dhe më të kontestuar publikisht. Qytete si Tetova, që kanë një popullatë të madhe shqiptare, janë të mbushura me kazino, bastore dhe automjete të lojërave të fatit, ndërsa qarkullimi i kapitalit në këtë industri kap miliona euro çdo vit. Por megjithëse bizneset funksionojnë kryesisht falë konsumit të komunitetit shqiptar, pronësia dhe menaxhimi mbeten pothuajse ekskluzivisht në duar tjera.

Kjo ka krijuar gjithnjë e më shumë bindjen se në Tetovë dhe në shumë zona tjera me popullatë shqiptare, shqiptarët janë të mirëseardhur vetëm si klientë, por jo edhe si pronarë, investitorë apo vendimmarrës brenda këtij sektori. Një realitet i heshtur, i cili vitet e fundit po ngjall pakënaqësi të hapur sidomos te brezi i ri.

Dominim i tregut dhe mungesë barazie në pronësi

Shumë prej brendeve të mëdha të basteve dhe kazinove që operojnë në Tetovë janë në pronësi të biznesmenëve maqedonas ose grupeve financiare të lidhura me qarqe qeveritare ndër vite. Kjo strukturë pronësie ka prodhuar një treg të mbyllur, ku hyrja e sipërmarrësve shqiptarë rezulton thuajse e pamundur.

Pavarësisht faktit se:

mbi 70% e klientelës në Tetovë janë shqiptarë,
shumica e lokacioneve janë të hapura pikërisht në lagje shqiptare,
qarkullimi ekonomik vjen kryesisht prej komunitetit shqiptar,
prapëseprapë, shqiptarët nuk paraqiten askund në piramidën e menaxhimit, vendimmarrjes apo pronësisë.

Kjo krijon perceptimin se kontrolli i tregut është i qëllimshëm: një interes i strukturuar për të mbajtur të mbyllur një industri me qarkullim të madh parash dhe fitime të menjëhershme.

“Qetësia është mashtrim” – një gjeneratë që nuk pranon margjinalizim ekonomik

Në rrjetet sociale po qarkullojnë mesazhe të forta dhe deklarata kritike që pasqyrojnë zemërimin e brezit të ri shqiptar në Tetovë, të cilët ndjehen të përjashtuar dhe të nënvlerësuar nga një industri që jeton pikërisht prej tyre.

“Kazinot në Tetov duan vetëm paratë e shqiptarëve, por jo edhe shqiptarët të jenë pjesë e tyre.”

Për shumë të rinj, kjo situatë shihet si shembull klasik i një ekonomie të ngritur mbi pabarazi. Sipas tyre, bizneset e lojërave të fatit kërkojnë “qetësi” dhe klientelë të rregullt, por nuk duan konkurrencë nga sipërmarrësit shqiptarë dhe as përfaqësim të tyre në menaxhim.

Kjo e ka bërë këtë brez të jetë gjithnjë e më i vetëdijshëm, më kritik dhe më pak i gatshëm të heshtë përballë asaj që e shohin si padrejtësi strukturore.

A duhet rregullim më i fortë?

Me rritjen e pakënaqësisë publike, kërkohen:
transparencë mbi pronarët realë të kazinove,
rregulla të reja për shpërndarjen e licencave,
mekanizma për të mbrojtur komunitetet e prekura,
masa për të shmangur monopolizimin etnik të tregut.

Në fund, pyetja kryesore mbetet:

A mund të vazhdojë një industri të marrë miliona nga një komunitet, ndërsa e përjashton atë krejtësisht nga fitimi?

Lajme

Ali Ahmeti priti në selinë e BDI-së të riun nga Gostivari, Naser Veliun

Kreu i Bashkimit Demokratik për Integrim (BDI), Ali Ahmeti, priti sot në selinë e partisë Naser Veliun nga Gostivari, nipin e bashkëveprimtarit të tij të hershëm, të ndjerit Naser Veliu.

Gjatë takimit, Veliu u prezantua si elektroinxhinier i diplomuar në universitete prestigjioze në Mbretërinë e Bashkuar. Takimi u vlerësua si një mundësi për bashkëbisedim me të rinj të arsimuar dhe me përgatitje profesionale, të cilët, sipas Ahmetit, përfaqësojnë një brez me potencial për të kontribuar në zhvillimin shoqëror dhe institucional.

Ahmeti theksoi rëndësinë e përfshirjes së të rinjve në procese shoqërore dhe profesionale, duke vlerësuar se kapitali njerëzor i arsimuar jashtë vendit është një vlerë e shtuar për komunitetin dhe vendin.

Në përfundim të takimit, ai i uroi Naser Veliut suksese të mëtejshme në rrugëtimin e tij profesional dhe personal.

Ja postimi plotë:

Sot kisha kënaqësinë ta pres në selinë e BDI-së Naser Veliun, të riun nga Gostivari, nipin e bashkëveprimtarit tim të hershëm, të ndjerit Naser Veliu.

Naseri është elektroinxhinier, i diplomuar në universitete prestigjioze në Angli. Takime me të rinj të arsimuar, të përgatitur profesionalisht dhe me vizion për të ardhmen janë gjithmonë të këndshme dhe japin shpresë se brezat e rinj do të vazhdojnë të kontribuojnë me dije, përkushtim dhe përgjegjësi për zhvillimin e shoqërisë sonë.

I uroj suksese të mëtejshme në rrugëtimin e tij profesional dhe personal.

Lajme

Kasami mirëpret kryetarin e Kukësit, në fokus projektet ndërkufitare

Kryetari i Komunës së Tetovës, Bilall Kasami, ka pritur në një takim kryetarin e Bashkisë së Kukësit, Albert Halilaj, me të cilin ka diskutuar për sfidat dhe perspektivat e zhvillimit lokal.

Kasami bëri të ditur se takimi shërbeu për shkëmbimin e mendimeve dhe përvojave lidhur me çështje me interes për të dy komunat, ndërsa theks i veçantë iu kushtua mundësive për realizimin e projekteve ndërkufitare.

Sipas tij, projekte të tilla mund të kontribuojnë në zhvillimin e qëndrueshëm, shkëmbimin e përvojave dhe krijimin e përfitimeve konkrete për qytetarët në të dy anët e kufirit.

Takimi u vlerësua si një hap i rëndësishëm drejt forcimit të bashkëpunimit ndërmjet Tetovës dhe Kukësit, me synim realizimin e iniciativave të përbashkëta në të ardhmen.

Lajme

Filloi Misioni Monitorues i WBIF në Maqedoninë e Veriut, Bekim Sali: Fokus te zbatimi efikas dhe rezultatet konkrete për qytetarët

Filloi Misioni Monitorues i WBIF në Maqedoninë e Veriut, Bekim Sali: Fokus te zbatimi efikas dhe rezultatet konkrete për qytetarët

Ministria për Çështje Evropiane organizoi takimin e nivelit të lartë në kuadër të Misionit Monitorues të Kornizës Investuese për Ballkanin Perëndimor (WBIF), me pjesëmarrjen e përfaqësuesve të Komisionit Evropian, Delegacionit të Bashkimit Evropian, institucioneve financiare ndërkombëtare, ministrive resore dhe institucioneve zbatuese.

Në hapje të takimit, Zëvendëskryeministri i parë dhe Ministri për Çështje Evropiane, Bekim Sali, theksoi se WBIF mbetet një nga instrumentet më të rëndësishme për mbështetjen e zhvillimit ekonomik, përmirësimin e lidhshmërisë rajonale dhe avancimin e procesit të integrimit evropian të vendit.

“Përgjegjësia jonë nuk përfundon me sigurimin e financimit. Matësi i vërtetë i suksesit është implementimi. Çdo projekt i realizuar do të thotë më shumë mundësi për qytetarët, ekonomi më konkurruese dhe standard më të lartë jetese”, theksoi ministri Sali.

Ai nënvizoi se monitorimi duhet të shihet si një instrument strategjik i qeverisjes që mundëson identifikimin e hershëm të sfidave, koordinim më efikas ndërinstitucional dhe vendimmarrje të bazuar në rezultate.

Gjatë takimit u diskutuan sfidat kryesore në implementimin e projekteve infrastrukturore, përfshirë kapacitetet e njësive implementuese, procedurat e prokurimit, ndryshimet në fushëveprimin e projekteve, koordinimin ndërmjet institucioneve dhe procedurat administrative për leje dhe miratime.

Sali theksoi se Agjenda e Reformave dhe Instrumenti për Reforma dhe Rritje kanë krijuar një qasje më strategjike në planifikimin e investimeve, ndërsa fokusi në periudhën e ardhshme duhet të jetë rritja e efikasitetit të implementimit dhe sigurimi i rezultateve konkrete për qytetarët.

Pjesëmarrësit riafirmuan përkushtimin e përbashkët për forcimin e mekanizmave të monitorimit, rritjen e kapaciteteve institucionale dhe përshpejtimin e realizimit të projekteve strategjike që kontribuojnë në zhvillimin ekonomik dhe afrimin e vendit me Bashkimin Evropian.

Misioni Monitorues i WBIF do të vazhdojë gjatë dy ditëve të ardhshme me takime tematike në fushën e transportit, energjetikës dhe mjedisit jetësor, si dhe me vizitë në terren në projektin e Impiantit për Trajtimin e Ujërave të Zeza në Shkup.