Lajme

Kur politika harron qëllimin e vërtetë dhe shndërrohet në një skenë të pafund, populli mbetet vetëm spektator

Kur politika harron qëllimin e saj të vërtetë dhe shndërrohet në një skenë të pafund, ku deklaratat e ditës mbulojnë realitetin e hidhur të natës, atëherë populli mbetet vetëm spektator. Ne i kemi ndjekur këto shfaqje për vite me radhë, me shpresën se një ditë do të ndryshojë kapitulli, se do të vijë një akt i ri me më shumë ndershmëri e më shumë përgjegjësi.

Shkruan: Valon Qyra

Por e vërteta është se jemi lodhur. Lodhur nga premtime që zgjohen vetëm gjatë fushatave dhe flenë sërish sapo mbyllen kutitë e votimit. Lodhur nga udhëheqës që e shohin pushtetin si privilegj, jo si detyrim ndaj qytetarëve. Lodhur nga një sistem që shpesh duket i mbyllur, i pandjeshëm, i palëvizshëm.

Në këtë lodhje kolektive, një plagë e hapur mbetet e ardhmja e të rinjve. Sepse rinia nuk është vetëm një grupmoshë. Rinia është energjia që mban gjallë çdo shtet. Por në vend të mbështetjes, shpesh ata përballen me pasiguri. Në vend të mundësive, me dyer të mbyllura. Në vend të vizionit, me raporte që flasin qartë: përparimi është i ngadaltë, i brishtë, e në disa fusha mungon krejtësisht. Edhe vlerësimet ndërkombëtare këtë e theksojnë. Kjo e bën pyetjen edhe më të rëndë: si t’i bindim të rinjtë të ndërtojnë jetën e tyre këtu, në një vend që nuk ua ofron qartë të ardhmen që meritojnë?

Kjo gjendje nuk është ajo për të cilën kemi ëndërruar. Nuk është vendi që duam t’u lëmë brezave që vijnë. Dhe, ndoshta më e dhimbshmja nga të gjitha, është humbja e besimit. Besimi është themeli mbi të cilin ndërtohet çdo marrëdhënie mes qytetarit dhe institucionit. Por kur premtimet thyen, kur përgjegjësia shmanget dhe kur askush nuk mban fjalën e dhënë, ai themel kriset. E kur humbet besimi, humbet edhe motivimi.

Megjithatë, edhe në momentet më të vështira, ekziston një e vërtetë që nuk duhet harruar: ndryshimi fillon te qytetari. Fillon te ne. Nuk është një dhuratë që vjen nga lart, as një mrekulli që ndodh vetvetiu. Është proces që kërkon zë të fortë, kërkon bashkim, kërkon që të mos heqim dorë. Ka nevojë për guxim, për maturi dhe për vetëdijen se politika nuk është pronë e askujt, por është shërbim ndaj popullit.

Prandaj është koha të flasim me qetësi, me argumente dhe me përgjegjësi. Është koha të kërkojmë transparencë, llogaridhënie dhe respekt. Të mos pranojmë më që lodhja jonë të jetë normalitet. Të mos pranojmë që rinia të largohet si zgjidhja e vetme. Të mos pranojmë që e ardhmja të shtyhet pafundësisht.

Sepse një shoqëri që zgjohet, nuk mund të injorohet. Një popull që flet, nuk mund të heshtet. Një rini që qëndron e bashkuar, nuk mund të pengohet.

Ndryshimi nuk është një fjalë e madhe. Është proces. Është këmbëngulje. Është vetëdije. Dhe fillon në momentin kur secili prej nesh vendos të mos rrijë më spektator, por të bëhet pjesë e skenës së vërtetë, asaj të jetës së përditshme, ku vendimet që merren prekin secilin prej nesh.

Kemi të drejtë të kërkojmë më shumë. Kemi të drejtë të ëndërrojmë më shumë. Dhe, mbi të gjitha, kemi të drejtë të jetojmë në një vend që na jep shpresë, siguri dhe dinjitet.

Rinia meriton një të ardhme. Populli meriton dinjitet. Ndryshimi është i domosdoshëm. Dhe është i mundur.

Lajme

Ali Ahmeti priti në selinë e BDI-së të riun nga Gostivari, Naser Veliun

Kreu i Bashkimit Demokratik për Integrim (BDI), Ali Ahmeti, priti sot në selinë e partisë Naser Veliun nga Gostivari, nipin e bashkëveprimtarit të tij të hershëm, të ndjerit Naser Veliu.

Gjatë takimit, Veliu u prezantua si elektroinxhinier i diplomuar në universitete prestigjioze në Mbretërinë e Bashkuar. Takimi u vlerësua si një mundësi për bashkëbisedim me të rinj të arsimuar dhe me përgatitje profesionale, të cilët, sipas Ahmetit, përfaqësojnë një brez me potencial për të kontribuar në zhvillimin shoqëror dhe institucional.

Ahmeti theksoi rëndësinë e përfshirjes së të rinjve në procese shoqërore dhe profesionale, duke vlerësuar se kapitali njerëzor i arsimuar jashtë vendit është një vlerë e shtuar për komunitetin dhe vendin.

Në përfundim të takimit, ai i uroi Naser Veliut suksese të mëtejshme në rrugëtimin e tij profesional dhe personal.

Ja postimi plotë:

Sot kisha kënaqësinë ta pres në selinë e BDI-së Naser Veliun, të riun nga Gostivari, nipin e bashkëveprimtarit tim të hershëm, të ndjerit Naser Veliu.

Naseri është elektroinxhinier, i diplomuar në universitete prestigjioze në Angli. Takime me të rinj të arsimuar, të përgatitur profesionalisht dhe me vizion për të ardhmen janë gjithmonë të këndshme dhe japin shpresë se brezat e rinj do të vazhdojnë të kontribuojnë me dije, përkushtim dhe përgjegjësi për zhvillimin e shoqërisë sonë.

I uroj suksese të mëtejshme në rrugëtimin e tij profesional dhe personal.

Lajme

Kasami mirëpret kryetarin e Kukësit, në fokus projektet ndërkufitare

Kryetari i Komunës së Tetovës, Bilall Kasami, ka pritur në një takim kryetarin e Bashkisë së Kukësit, Albert Halilaj, me të cilin ka diskutuar për sfidat dhe perspektivat e zhvillimit lokal.

Kasami bëri të ditur se takimi shërbeu për shkëmbimin e mendimeve dhe përvojave lidhur me çështje me interes për të dy komunat, ndërsa theks i veçantë iu kushtua mundësive për realizimin e projekteve ndërkufitare.

Sipas tij, projekte të tilla mund të kontribuojnë në zhvillimin e qëndrueshëm, shkëmbimin e përvojave dhe krijimin e përfitimeve konkrete për qytetarët në të dy anët e kufirit.

Takimi u vlerësua si një hap i rëndësishëm drejt forcimit të bashkëpunimit ndërmjet Tetovës dhe Kukësit, me synim realizimin e iniciativave të përbashkëta në të ardhmen.

Lajme

Filloi Misioni Monitorues i WBIF në Maqedoninë e Veriut, Bekim Sali: Fokus te zbatimi efikas dhe rezultatet konkrete për qytetarët

Filloi Misioni Monitorues i WBIF në Maqedoninë e Veriut, Bekim Sali: Fokus te zbatimi efikas dhe rezultatet konkrete për qytetarët

Ministria për Çështje Evropiane organizoi takimin e nivelit të lartë në kuadër të Misionit Monitorues të Kornizës Investuese për Ballkanin Perëndimor (WBIF), me pjesëmarrjen e përfaqësuesve të Komisionit Evropian, Delegacionit të Bashkimit Evropian, institucioneve financiare ndërkombëtare, ministrive resore dhe institucioneve zbatuese.

Në hapje të takimit, Zëvendëskryeministri i parë dhe Ministri për Çështje Evropiane, Bekim Sali, theksoi se WBIF mbetet një nga instrumentet më të rëndësishme për mbështetjen e zhvillimit ekonomik, përmirësimin e lidhshmërisë rajonale dhe avancimin e procesit të integrimit evropian të vendit.

“Përgjegjësia jonë nuk përfundon me sigurimin e financimit. Matësi i vërtetë i suksesit është implementimi. Çdo projekt i realizuar do të thotë më shumë mundësi për qytetarët, ekonomi më konkurruese dhe standard më të lartë jetese”, theksoi ministri Sali.

Ai nënvizoi se monitorimi duhet të shihet si një instrument strategjik i qeverisjes që mundëson identifikimin e hershëm të sfidave, koordinim më efikas ndërinstitucional dhe vendimmarrje të bazuar në rezultate.

Gjatë takimit u diskutuan sfidat kryesore në implementimin e projekteve infrastrukturore, përfshirë kapacitetet e njësive implementuese, procedurat e prokurimit, ndryshimet në fushëveprimin e projekteve, koordinimin ndërmjet institucioneve dhe procedurat administrative për leje dhe miratime.

Sali theksoi se Agjenda e Reformave dhe Instrumenti për Reforma dhe Rritje kanë krijuar një qasje më strategjike në planifikimin e investimeve, ndërsa fokusi në periudhën e ardhshme duhet të jetë rritja e efikasitetit të implementimit dhe sigurimi i rezultateve konkrete për qytetarët.

Pjesëmarrësit riafirmuan përkushtimin e përbashkët për forcimin e mekanizmave të monitorimit, rritjen e kapaciteteve institucionale dhe përshpejtimin e realizimit të projekteve strategjike që kontribuojnë në zhvillimin ekonomik dhe afrimin e vendit me Bashkimin Evropian.

Misioni Monitorues i WBIF do të vazhdojë gjatë dy ditëve të ardhshme me takime tematike në fushën e transportit, energjetikës dhe mjedisit jetësor, si dhe me vizitë në terren në projektin e Impiantit për Trajtimin e Ujërave të Zeza në Shkup.