Lajme

Durmishi: Për pagën minimale nuk duhet të sillen zgjidhje afatshkurte politike ose nën presion

Çështja për pagën minimale është e ndijshme dhe pikërisht për këtë nuk merren vendime nën presione ose zgjidhje afatshkurte politike, deklaroi ministri i Ekonomisë dhe Punës, Besar Durmishi.

Ai sonte në TV Telma potencoi se priten të dhënat e Entit shtetëror për statistikë (ESHS) dhe se në mars do të ketë barazim ligjor të pagave prej 1500 deri 2000 denarë.

Durmishi informoi se Qeveria nuk i ka pranuar vërejtjet nga institucionet ndërkombëtare për rritjen e tatimeve dhe të kufirit të moshës për pensionim, me qëllim, siç tha, “t’u ndihmohet qytetarëve, edhe pse kanë trashëguar buxhet të zbrazët”.

Sipas Durmishit, sindikatat paraprakisht thonin se me zgjidhjen aktuale ligjore, “përgjithmonë do të mbrohen të drejtat e punëtorëve”, por se tani “për çdo ditë po manipulohet me opinionin”.

Ai përsëriti se Qeveria do të mbështesë marrëveshje midis punëdhënësve dhe sindikatave për paga më të larta, ndërsa lidhur me kërkesën që shteti të mbulojë kontributet në rast të rritjes së pagave, theksoi se sektori privat ka marrë mbështetje në periudhën e kaluar.

“Ne kemi bërë shumë për sektorin privat deri tani dhe do të vazhdojmë ta bëjmë këtë, përmes Ligjit për mbështetje financiare për investimet, Planit operativ, mbështetjes për ndërmarrjet e vogla dhe të mesme, konkurrencës, linjës së kredisë prej 250 milionë eurosh…Kur të merret e gjithë kjo mbështetje, ata mund të punësojnë më shumë njerëz dhe të paguajnë paga më të larta për punonjësit. Ekziston një kornizë ligjore për pagën minimale, nëse sindikatat dhe punëdhënësit dakordohen, ne do ta mbështesim atë. Por jo këtë pjesë, pasi kemi ofruar mbështetje që nga fillimi i qeverisjes”, tha Durmishi.

Ai theksoi se me punonjësit e sektorit publik është rrumbullaksuar dialogu, duke përkujtuar se dje Qeveria arriti marrëveshje me disa nga sindikatat përfaqësuese për një rritje të pagave të 11.000 administratorëve, pasi paraprakisht kjo ndodhi me pagat në shëndetësi, arsim, mbrojtje dhe polici.

“Kjo tregon se dialogu mund të funksionojë kur ka gatishmëri nga të dyja palët”, tha Durmishi.

Durmishi paralajmëroi se në rendin e ditës së seancës së ardhshme të Këshillit ekonomik-social do të përfshihet metodologjia e re e shpallur për llogaritjen e shportës së konsumatorit, pas çka llogaritja do të kryhet sipas saj. Metodologjia është përgatitur dhe është dorëzuar për shqyrtim te anëtarët e KES-së.

“Ne nuk jemi kundër shportës minimale sindikale, por aty llogariten pemët dhe perimet që nuk konsumohen në një periudhë të caktuar kohore, si dhe qiraja, ndërsa sipas regjistrimit të Entit shtetëror të statistikave, 90 për qind të qytetarëve jetojnë në shtëpitë e tyre. Gjithashtu, çmimet merren nga dy markete, jo nga 10, siç bëjmë ne. Do të llogaritet në mënyrë reale dhe do të jetë e qasshme shporta e konsumatorit për tërë opinionin”, tha ministri Durmishi.

Lajme

Kush është Valdrin Uka, drejtori i ri ekzekutiv i Shkëndijës

Më shumë se shtatë vite pjesë e klubit, Uka është një nga kuadrot e rritura dhe të përgatitura brenda strukturave të Shkëndijës, ndërsa ndryshimet e fundit pasqyrojnë planin e klubit për të ndërtuar një menaxhment të qëndrueshëm me njerëz nga brenda.

Ndryshimet e fundit në strukturën e KF Shkëndija nuk janë të rastësishme. Përtej emërimeve të reja në pozita drejtuese, ato pasqyrojnë një filozofi të qartë të klubit për të përgatitur kuadro nga brenda dhe për t’u besuar atyre përgjegjësi gjithnjë e më të mëdha.

Në qendër të këtij riorganizimi është Valdrin Uka, i cili është emëruar Drejtor Ekzekutiv i Shkëndijës. Uka është pjesë e klubit prej më shumë se shtatë vitesh dhe gjatë kësaj periudhe ka qenë pranë strukturave drejtuese, duke ndjekur nga afër funksionimin dhe zhvillimin e klubit. Vitet e kaluara në menaxhmentin e Shkëndijës e kanë shërbyer si një proces i gjatë përgatitjeje dhe kalitjeje për përgjegjësinë e re.

Në të njëjtën linjë janë edhe ndryshimet në Departamentin Sportiv. Erhan Selimi, deri tani Drejtor i Shkollës së Futbollit, avancon në pozitën e Drejtorit Sportiv, ndërsa Festim Ademi, pas rolit të Team Menaxherit, emërohet Drejtor Teknik i Departamentit Sportiv.

Të tre emërimet kanë një të përbashkët: bëhet fjalë për njerëz që tashmë njohin nga afër klubin, strukturën dhe mënyrën e funksionimit të tij. Kjo tregon se Shkëndija prej kohësh ka punuar në krijimin dhe përgatitjen e kuadrove të veta për pozita udhëheqëse.

Me vizionin dhe mbështetjen e drejtuesve dhe sponsorit të klubit, ndryshimet janë pjesë e një plani për një organizim më të balancuar dhe më profesional, duke ndjekur modelin e klubeve moderne ku investimi nuk bëhet vetëm te skuadra, por edhe te njerëzit që e drejtojnë dhe e zhvillojnë organizatën.

Në këtë drejtim, Shkëndija po tregon se kuadrot nuk kërkohen vetëm jashtë klubit, por ndërtohen, zhvillohen dhe përgatiten edhe brenda tij.

Lajme

Ardian Cuculi e mbyll kapitullin si drejtor sportiv i Shkëndijës

Pas tre viteve në pozitën e Drejtorit Sportiv, Ardian Cuculi përfundon angazhimin e tij te Shkëndija, njofton klubi kuqezi.

Pas përfundimit të angazhimit të Ardian Cuculit në pozitën e Drejtorit Sportiv, mbyllet një tjetër kapitull në rrugëtimin e tij të gjatë me klubin kuqezi.

Ish-kapiteni dhe një prej emrave që ka dhënë kontribut të madh për Shkëndijën në periudha të ndryshme, Cuculi përfundoi karrierën e tij si futbollist pikërisht me ngjyrat kuqezi, për të vazhduar më pas për tre vite në pozitën e Drejtorit Sportiv, duke qenë pjesë e sukseseve historike.

Klubi tetovar e falënderon Ardian Cuculin për punën, përkushtimin dhe kontributin e dhënë gjatë gjithë viteve në Shkëndijë, duke i uruar shëndet, suksese dhe çdo të mirë në të ardhmen.