Lajme

Deputetët u pajtuan: Nuk do të ketë rritje të pagave të zyrtarëve, por as ulje

Të gjithë deputetët u pajtuan që të mos rriten pagat e zyrtarëve. VMRO-DPMNE paraqiti propozim-ligj për ndryshimin e koeficientit për llogaritjen e pagave të deputetëve, si dhe të pagave dhe kompensimeve të tjera të personave të zgjedhur dhe të emëruar. Me këto ndryshime ligjore, pagat aktuale të zyrtarëve nuk do të ulen, por as nuk do të rriten për 10.000 deri në 13.000 denarë.

“Për deputetët dhe zyrtarët e pushtetin ekzekutiv ulim koeficientin, me çka drejtpërdrejt e zvogëlojmë barrën e shpenzimeve, për gjyqtarët dhe prokurorët publikë parashikojmë harmonizim të koeficientit, me qëllim që pagat e tyre të jenë në përputhje me mundësitë reale ekonomike të shtetit, ndërsa për kryetarët e komunave propozojmë shkallë të re të koeficienteve, varësisht nga numri i banorëve në komunat”, deklaroi Bojan Stojanovski, deputet i VMRO-DPMNE.

Sipas partisë “E Majta”, ky veprim i pushtetit ka për qëllim pengimin e rritjes së pagës minimale.
„Pajtohemi me këtë, por megjithatë mendoj se kjo është përpjekje e partisë në pushtet për të mos rritur pagën minimale”, tha Rexhep Ismail- E Majta.

Ndërkohë, Shoqata e Prokurorëve Publikë kërkoi nga deputetët që të mos ua ulin pagat. Thonë se sipas Ligjit për pagat e Prokurorëve Publikë, të ardhurat nuk mund të ulen me ligj ose me vendim të organit shtetëror, përveç në rast të përgjegjësisë disiplinore të konstatuar.

“Funksioni i prokurorit publik është jo-kompatibil me ushtrimin e çfarëdo funksioni apo veprimtarie tjetër. Për këtë arsye, paga është e vetmja e ardhur për prokurorët publikë dhe ajo lëviz nga minimumi më pak se 90.000 denarë deri te maksimumi 130.000 denarë. Me këto shuma, pagat e prokurorëve publikë janë absolutisht më të ulëtat në rajon”, thonë nga Shoqata e Prokurorëve Publikë.

Pagën më të lartë e marrin presidenti, kryetari i Kuvendit dhe kryeministri, edhe atë 215.084 denarë. Me 190.911 denarë pasojnë kryetari i Gjykatës Kushtetuese dhe Nënkryetari i Kuvendit. Ministrat, Guvernatori, Avokati i Popullit, si dhe sekretarët e Kuvendit dhe të Qeverisë marrin 176.654 denarë në muaj. Zëvendësministrat, Drejtorët, këshilltari i presidentit dhe zëvendësguvernatori marrin pagë mujore prej 162.398 denarë. Te kryetarët e komunave, pagat lëvizin nga 128.927 denarë në komunat deri në 10.000 banorë, deri në 162.398 denarë në komunat me mbi 50.000 banorë. Kryetari i Shkupit merr 176.654 denarë në muaj. /Alsat.mk

Lajme

Kush është Valdrin Uka, drejtori i ri ekzekutiv i Shkëndijës

Më shumë se shtatë vite pjesë e klubit, Uka është një nga kuadrot e rritura dhe të përgatitura brenda strukturave të Shkëndijës, ndërsa ndryshimet e fundit pasqyrojnë planin e klubit për të ndërtuar një menaxhment të qëndrueshëm me njerëz nga brenda.

Ndryshimet e fundit në strukturën e KF Shkëndija nuk janë të rastësishme. Përtej emërimeve të reja në pozita drejtuese, ato pasqyrojnë një filozofi të qartë të klubit për të përgatitur kuadro nga brenda dhe për t’u besuar atyre përgjegjësi gjithnjë e më të mëdha.

Në qendër të këtij riorganizimi është Valdrin Uka, i cili është emëruar Drejtor Ekzekutiv i Shkëndijës. Uka është pjesë e klubit prej më shumë se shtatë vitesh dhe gjatë kësaj periudhe ka qenë pranë strukturave drejtuese, duke ndjekur nga afër funksionimin dhe zhvillimin e klubit. Vitet e kaluara në menaxhmentin e Shkëndijës e kanë shërbyer si një proces i gjatë përgatitjeje dhe kalitjeje për përgjegjësinë e re.

Në të njëjtën linjë janë edhe ndryshimet në Departamentin Sportiv. Erhan Selimi, deri tani Drejtor i Shkollës së Futbollit, avancon në pozitën e Drejtorit Sportiv, ndërsa Festim Ademi, pas rolit të Team Menaxherit, emërohet Drejtor Teknik i Departamentit Sportiv.

Të tre emërimet kanë një të përbashkët: bëhet fjalë për njerëz që tashmë njohin nga afër klubin, strukturën dhe mënyrën e funksionimit të tij. Kjo tregon se Shkëndija prej kohësh ka punuar në krijimin dhe përgatitjen e kuadrove të veta për pozita udhëheqëse.

Me vizionin dhe mbështetjen e drejtuesve dhe sponsorit të klubit, ndryshimet janë pjesë e një plani për një organizim më të balancuar dhe më profesional, duke ndjekur modelin e klubeve moderne ku investimi nuk bëhet vetëm te skuadra, por edhe te njerëzit që e drejtojnë dhe e zhvillojnë organizatën.

Në këtë drejtim, Shkëndija po tregon se kuadrot nuk kërkohen vetëm jashtë klubit, por ndërtohen, zhvillohen dhe përgatiten edhe brenda tij.

Lajme

Ardian Cuculi e mbyll kapitullin si drejtor sportiv i Shkëndijës

Pas tre viteve në pozitën e Drejtorit Sportiv, Ardian Cuculi përfundon angazhimin e tij te Shkëndija, njofton klubi kuqezi.

Pas përfundimit të angazhimit të Ardian Cuculit në pozitën e Drejtorit Sportiv, mbyllet një tjetër kapitull në rrugëtimin e tij të gjatë me klubin kuqezi.

Ish-kapiteni dhe një prej emrave që ka dhënë kontribut të madh për Shkëndijën në periudha të ndryshme, Cuculi përfundoi karrierën e tij si futbollist pikërisht me ngjyrat kuqezi, për të vazhduar më pas për tre vite në pozitën e Drejtorit Sportiv, duke qenë pjesë e sukseseve historike.

Klubi tetovar e falënderon Ardian Cuculin për punën, përkushtimin dhe kontributin e dhënë gjatë gjithë viteve në Shkëndijë, duke i uruar shëndet, suksese dhe çdo të mirë në të ardhmen.