Lajme

Dënohen policët që lejuan ikjen e Grubit

Përderisa Artan Grubi ndodhet në arrest shtëpiak nën mbrojtje policore, pas një arratisjeje që zgjati 14 muaj, zyrtari policor i cili e lejoi atë të kalonte kufirin ditën e largimit nga Maqedonia e Veriut, më 15 dhjetor 2024, është përballur me sanksione të rrepta ligjore dhe disiplinore.

Sipas informacioneve të siguruara nga Televizioni Telma, polici i cili nuk e ndaloi ish-zëvendëskryeministrin Artan Grubi, edhe pse ai figuronte në “listën e ndalimit” (stop-lista), është dënuar me burgim me kusht. Gjykata e ka dënuar atë me 2 vite burg, dënim i cili nuk do të ekzekutohet nëse i dënuari nuk kryen vepër të re penale brenda një periudhe prej 5 vitesh pas plotfuqishmërisë së aktgjykimit. Gjithashtu, të njëjtit zyrtar i është ndaluar ushtrimi i veprimtarisë policore për dy vitet e ardhshme.

Nga ana tjetër, Ministria e Punëve të Brendshme (MPB) ka konfirmuar se polici në fjalë është shkarkuar nga puna. Për policin e dytë që ishte në ndërrim atë mëngjes, është marrë vendim për degradim në një pozitë më të ulët.

“Pas procedurës disiplinore të zbatuar nga Departamenti për Procedura Disiplinore dhe Gjyqësore, Ministri i Punëve të Brendshme për punonjësin B.J. ka sjellë Vendim për shqiptimin e masës disiplinore – ndërprerje e kontratës së punës. Ndërsa për punonjësin B.A., është sjellë Vendim për shqiptimin e masës disiplinore – rregullim në një nivel më të ulët se vendi i punës ku punonjësi ka punuar deri atëherë,” – thuhet në përgjigjen e MPB-së për Telma-n.

Ky zhvillim vjen pas kritikave të shumta për dështimin e institucioneve për të parandaluar largimin e zyrtarëve të lartë që janë nën hetim ose ndjekje penale.

Lajme

Kasami për protestën: BDI “hedh gurin dhe fsheh dorën”

Bashkëkryetari i VLEN-it dhe kryetari i komunës së Tetovës, Bilall Kasami në emisionin “On Time” në “TV Koha” duke komentuar protestën e së nesërmes në Tetovë thotë se BDI në një farë forme luan rolin e saj në stilin “hedh gurin dhe fsheh dorën”!

Sipas tij, bëhet fjalë për situatë absurd.

“BDI nuk deklarohen se qëndrojnë zyrtarisht pas protestës. Këshilltarët e BDI-së para një kohe kërkuan seancë të jashtëzakonshme të Këshillit komunal dhe kur morën informatë se kjo nuk është çështje e Këshillit komunal dhe në situatë kur Këshilli komunal mund të përsërisë gabimin që është bërë në 2007, me automatizëm Këshilli komunal shkon në zgjedhje në bazë të Ligjit dhe Kushtetutës dhe e heshtën atë çështje. Duke e ditur që faji më shumë është i atyre, sepse nuk kemi ne aspak faj si VLEN as në pushtetit qendror e as në atë lokal, ata po mundohen edhe një herë të ‘hedhin gurin dhe të fshehin dorën’. Konkretisht ata duhet të tregojnë se cili është faji i kësaj qeverise aktuale të komunës dhe kësaj qeverie aktuale në pushtetin qendror”, ka thënë Kasami.

Lajme

Kasami: Vendimi i Gjykatës Kushtetuese nuk do të ndryshojë asgjë

Bashkëkryetari i VLEN-it dhe kryetari i komunës së Tetovës, Bilall Kasami në emisionin “On Time” në TV Koha ka thënë se vendimi i Gjykatës Kushtetuese për emrat e rrugëve në Tetovë, nuk do të ndryshojë asgjë.

I pyetur se çfarë do të ndodhë me fatin e rrugës “Dervish Cara”, Sheshin “Iliria” dhe cili do të jetë epilogu, Kasami shprehet i prerë:

“Vendimi i Gjykatës Kushtetuese nuk do të ndryshojë asgjë. Komuna do të vazhdojë të përdorë emërtimet e vitit 2007 e këndej, institucionet do të vazhdojnë të përdorin emërtimet si gjithmonë, ndërkohë Komuna e Tetovës do të vazhdojë me procesin e emërtimit të rrugëve. Ky proces do të përfundojë konform Ligjit dhe Kushtetutës dhe nga ai moment edhe këta rrugë dhe shumë rrugë tjera do të kenë emërtime shqiptare”, ka thënë mes tjerash Kasami.

Lajme

Kasami: BDI dhe Gjykata Kushtetuese të sinkronizuar dakorduan vendimin

Bashkëkryetari i VLEN-it dhe kryetari i komunës së Tetovës, Bilall Kasami në emisionin “On Time” në TV Koha duke komentuar protestën e nesërme tha se qytetarët nuk do t`i përgjigjen pozitivisht protestës së BDI-së, duke pranuar se integristët megjithatë kishin harxhuar kohën e tij, siç tha ai, “për të trajtuar një problem inekzistent”.

Ai tha se le të tregojnë se cila është përgjegjësia e Tetovës, cila është përgjegjësia e kësaj qeverie që ne siç tha, “të dalim e t`u përgjigjemi”.

“E vetmja përgjegjësi këtu është e Gjykatës Kushtetuese dhe e BDI-së që në mënyrë të sinkronizuar dakordojnë një vendim për abrogim të këtij vendimi në momentin kur jemi në fazën finale të emërtimit të rrugëve konform Kushtetutës dhe Ligjit. Dhe një herë duhet të pyes publikisht BDI-në ‘A është edhe një tentim i BDI-së, për të ndalur procesin e emërtimit të rrugëve në Tetovë?”, ka thënë Kasami.