Lajme

Tetova dhe Gostivari “pushtohen” nga fëmijë lypës

Rrugët e dy qyteteve të Pollogut, respektivisht Tetovës dhe Gostivarit në këtë periudhë të vitit janë stërmubushur me lypës, kryesisht të moshave të mitur. Të njëjtit mund të hasen në vende më të frekuentuara, kryesisht pranë institucioneve, qendrave tregtare, në trotuare, afër lokaleve dhe gjetiu. Bëhet fjalë për fëmijë të komunitetit rom në moshë të mitur të cilët shfrytëzojnë edhe muajin e Ramazanit për të kërkuar lëmoshë. Jo rrallë herë të njëjtit nuk janë të shoqëruar nga më të moshuarit që përbën edhe një shkelje më të rëndë të ligjeve në fuqi për shkak se lypsaria është e ndaluar rreptësisht, sidomos për fëmijët.

Dyshimet janë se këta fëmijë sillen nga qytete tjera dhe pastaj I lëshojnë në rrugët e Tetovës dhe Gostivarit për të kërkuar lëmoshë. Institucionet sociale që merren me këtë problematikë, më vështirë e kanë me fëmijët të cilët sillen nga qytete tjera, pa asnjë dokument dhe pastaj është problem që të gjenden prindërit.

Lypësit e vegjël të cilët hasen në rrugë largohen dhe marrin vërejtje që sërish mos e kryejnë këtë veprimtari por sipas informacioneve zakonisht lypësit janë nga qytete tjera pa dokumente dhe është vështirë të identifikohen sepse sillen në mëngjes në këtë qytet dhe në mbrëmje largohen, pohojnë nga policia dhe nga qendrat sociale në Gostivar dhe Tetovë. Nga aksionet e përbashkëta të policisë dhe qendrave për punë sociale janë larguar dhjetëra fëmijë nga rrugët që shtrijnë dorën për lëmoshë dhe janë ndihmuar por problem mbetet se këta fëmijë shpesh herë detyrohen nga persona tjerë të ushtrojnë këtë veprimtari.

Nga këta institucione thonë se nëse një fëmijë nuk është i qytetit, atëherë kontaktojnë qendrat tjera sociale ose policinë dhe kur mësohet se nga cili qytet janë atëherë ata kthehen atje. Ndërsa, për fëmijët që janë të qytetit ose rrethinës, kontaktojnë me prindërit dhe njoftohen me pasojat që sjell dukuria e lypsarisë. Por, edhe përskaj këtyre aksioneve, rrugët e këtyre dy qyteteve vazhdojnë të vërshohen kryesisht gjatë ditës, ndërsa gjatë natës ose kthehen në shtëpi ose kërkojnë lëmoshë nëpër fshatra.

Kësisoj, rrugëve të Tetovës dhe Gostivarit numri I fëmijëve që kërkojnë lëmoshë gjatë kësaj periudhe është shumëfishuar. Kryesisht, të njëjtit hasen pranë objekteve fetare ku edhe ka frekuentim më të madh të qytetarëve dhe aty kërkojnë para nga besimtarët, të cilët nuk ngurrojnë të ndihmojnë. Sipas punëtoreve social fillimisht kur do të takojnë një nënë me fëmijë në rrugë i jepet vërejtje me shkrim se fëmijët duhet të dërgohen në shkollë, duhet që të ketë sigurim shëndetësor dhe e tërë kjo bëhet në interes të fëmijëve, por shpesh herë këto vërejtje hasin në vesh të shurdhër.

Nga Sektori për Punë të Brendshme Tetovë sqarojnë se ky fenomen është në kundërshtim me ligjin për kundërvajtje kundër rendit dhe qetësisë publike, kurse gjobat janë nga 15 deri në 50 euro në kundërvlerë në denarë, ndërsa prindërit të cilët do të përfshijnë fëmijët e tyre në kërkim të lëmoshës dhe do t`i lënë pasdore do të përballen me përgjegjësi penale dhe me burg. (koha.mk)

Lajme

Skandal në Shkup: Nëna e rreh mësuesen gjatë mbledhjes prindërore

Më datë 15.04.2026, rreth orës 22:10, në SPB Shkup, personi me iniciale K.K.L. nga Shkupi ka denoncuar se rreth orës 17:00 është sulmuar fizikisht në vendin e saj të punës.
Sipas denoncimit, ngjarja ka ndodhur në një klasë të një shkolle fillore në zonën e komunës së Aerodromit, derisa denoncuesja së bashku me një koleg tjetër po mbanin mbledhje me prindër. Sulmi fizik ndaj mësueses është kryer nga M.M.G. nga Shkupi, e cila është prind (nëna) e një nxënësi të asaj shkolle. Policia po ndërmerr të gjitha masat e nevojshme për zbardhjen e plotë të rastit.

Lajme

Zgjatet gjendja e krizës për furnizimin me naftë

Kvendi i Maqedonisë së Veriut ka miratuar zgjatjen e gjendjes së krizës për furnizimin me naftë dhe derivate, e cila do të zgjasë deri më 20 korrik 2026 dhe hyn në fuqi nga 21 prilli, pas publikimit në “Gazetën Zyrtare”, përcjell TV21.

Vendimi vjen si pasojë e situatës së rënduar ndërkombëtare të sigurisë dhe energjisë, sidomos pas përshkallëzimit të konfliktit në Lindjen e Mesme dhe ndërprerjeve serioze në transportin e naftës përmes Ngushticës së Hormuzit, një nga korridoret më të rëndësishme energjetike në botë.

Sipas autoriteteve, sulmet dhe bllokimet e fundit kanë ulur ndjeshëm rrjedhën e naftës, duke rritur rrezikun për mungesa dhe çmime më të larta në tregun global, me ndikim të drejtpërdrejtë edhe në vend. Deri më tani, Qeveria ka ndërmarrë masa për të zbutur pasojat, përfshirë uljen e TVSH-së për energjentët dhe reduktimin e akcizave për karburantet, me qëllim mbrojtjen e standardit të qytetarëve dhe sigurimin e furnizimit stabil.

Lajme

Çairi përgjigjet për Haqim Ramadanin: Çdo angazhim është ligjor dhe i lidhur me punë konkrete

Nga komuna e Çairit kanë dalë me sqarim rreth punësimit të ish-kandidatit për kryetar të komunës së Bërvenicës, Haqim Ramadani, i cili në Open Finance, figuron se merr pagë mujore prej rreth 1,000 euro nga Komuna e Çairit. Komuna e Çairit deklaron se të gjitha angazhimet dhe pagesat bëhen në përputhje me ligjin dhe janë të dokumentuara e të verifikueshme. Nga komuna hedhin poshtë pretendimet për parregullsi.

“Komuna e Çairit informon opinionin publik se të gjitha angazhimet realizohen mbi bazën e procedurave të qarta ligjore, kontratave dhe shërbimeve konkrete të kryera. Çdo person i angazhuar ka detyrime të përcaktuara, ndërsa çdo pagesë është e evidentuar, e dokumentuar dhe plotësisht e verifikueshme. Komuna nuk praktikon dhe nuk do të lejojë angazhime fiktive apo pagesa pa bazë reale. Në përpjekje për të devijuar vëmendjen nga thelbi, po plasohen konstrukte politike që nuk kanë asnjë lidhje me faktet. Në vend që të shtrohet çështja nëse dikush është banor i caktuar, thelbi është nëse puna është kryer dhe në këtë rast ajo është qartësisht e dokumentuar dhe e konfirmuar. Është ironike që pikërisht ata që për vite me radhë nuk vendosën standarde të transparencës, sot përpiqen të mbajnë leksione për llogaridhënie. Dallimi sot është i qartë: çdo proces është i hapur, i verifikueshëm dhe i nënshtrohet shqyrtimit publik. Komuna e Çairit mbetet plotësisht e përkushtuar ndaj parimeve të ligjshmërisë, llogaridhënies dhe menaxhimit profesional. Nëse ekziston çfarëdo dyshimi për keqpërdorim, ne jemi të parët që do të kërkojmë zbardhje të plotë dhe përgjegjësi”, thuhet në reagimin e Komunës.